خائن اون لاين

خائن .. اون لاين للكاتبة سٌلافه الشرقاوي

دار ابداع للنشر والترجمة

عدد الصفحات ١٩٢ صفحة

حوار وسرد بالعربية الفصحى

في البداية هتكلم عن الغلاف لأنه شدني جدا وخطف عيني من أول مرة شوفته وسلافه أغلقة رواياتها بتتميز بالأختلاف والاهتمام بالتفاصيل

الرواية بتتكلم عن الخيانة مع انتشار وسائل التواصل والسوشيال ميديا واختلاف مفهوم الخيانة بالنسبة للرجل والمرأة وهل الخيانة الجسدية هي بس اللي تعتبر خيانة فقط وهي اللي الزوجة للي المفترض تحاسب عليها غير كده لا

من خلال نموذجين للخيانة مع اختلاف ردة فعل وتعامل كل زوجة للموقف

كالعادة سلافه نجحت انها توصل لنا شعور البطلتين واحساسهم بالألم حتى ولو الخيانة ما كانتش مكتملة ووضحت ان احساس الألم واحد وان الخيانة واحدة مهما أختلفت درجتها

وحقيقي كان سرد سلافه لوجع واحساس البطلات بالخيانة يدخل القلب مباشرة وكمان يفضل معلق في دماغك

حبيت شخصية سمية جدا وحسيت أنها الأقرب لقلبي وحبيت قوتها في انها تحافظ على بيتها وأولادها واحتوائها الكبير لورد مع ان في ناس ممكن تشوف تصرفها ضعف ولكن هو منتهى القوة والمناسب لشخصيتها المعطائة اللي عندها حس أمومي مش بس لأولادها ولوجود أطفال لازم تفكر فيهم وفي نفسيتهم ولشخصية رياض الهادية الصبورة اللي عندها أستعداد تعترف بغلطها وتكفر عنه

وفي المقابل ومع التناقض مع شخصية سمية بنلاقي شخصية ورد المدللة المندفعة الجامحة اللي ما كانش ينفع تتصرف غير كده وبالذات مع شخصية مراد وكبريائه ورفضه انه يعترف بخطئه

حبيت مشهد المواجهة الاخير اللي كان ما بين مراد وورد وحبيت اعتراف مراد بخطئه واستعداده انه يتحمل غضبها وشكها وعدم ثقتها فيه وده فعلا حصل في الاخر وأنه بيوضح ان الست ممكن تسامح سواء علشان بيتها او أولادها او حبها لزوجها لكن النسيان والثقة بيكونوا صعبين وبيفضلوا زي السحابة اللي بتظهر من وقت للتاني

من الشخصيات اللي حبتها مع ان ما كانش ليها ظهور الباشا والد ورد حبيت وحسيت بحبه واحتوائه ليها وحبيت كلامه اللي دايما كانت ورد بتفتكره

وفي الاخر تسلم ايدك يا سلافه كل رواية بقراها ليكي بيكون عندي ثقة ان دايما معالجتك ونهايتك بتكون واقعية ومنطقية ودايما بتقنع دماغي

«خائن أون لاين».

كنت داخلة وأنا متوقعة إني عارفة هقرأ إيه… خيانة إلكترونية، زوج خائن، وزوجة مكسورة. لكن كالعادة، الكاتبة كانت أذكى من توقعاتي بكتير.

الخيانة هنا مش هي المفاجأة الحقيقية… المفاجأة في إحساسك وإنت بتعيشها مع البطلة.

أنا الحمد لله ماجربتش النوع ده من الخيانة، ومش عارفة أصلًا كنت هتصرف إزاي لو اتحطيت مكانها، لكن وأنا بقرأ كنت حاسة إني عايشة معاها كل حاجة… وجعها، كسرتها، إحساسها بالهزيمة، وحتى الرغبة في الانتقام. كأن الكاتبة مش بتحكيلي عن شخصية، لكنها بتحطني جوا دماغها وقلبها.

وأكتر حاجة علقت معايا في الرواية إنها ماوقفتش عند الخيانة نفسها، لكنها كشفت وجع أكبر… مجتمع لسه قادر يبرر للرجل حاجات، ويحاسب الست حتى على أبسط حقوقها.

خلتني أخرج من الرواية وأنا ناقمة على كل رجل شايف إن الخيانة «غلطة عابرة»، وناقمة أكتر على كل مجتمع بيحاول يجمّل الغلط لمجرد إن اللي عمله راجل.

لكن وسط كل الوجع، الرواية ما سابتنيش مكسورة.

كان فيها صوت بيقول إن مش كل جرح لازم يلتئم علشان نكمل… فيه جروح ممكن تفضل موجودة، لكن الألم اللي فيها يهدأ، ونتعلم نعيش من غير ما يفضل هو المتحكم فينا.

وهنا جات فكرة الفرصة الثانية.

الفرصة الثانية مش معناها إننا ننسى أو نمسح اللي حصل، ولا معناها إن الخيانة لها أي مبرر… بالعكس.

لكن أحيانًا القلب اللي لسه بيحب بيختار إنه يدي فرصة أخيرة.

وفرصة واحدة بس.

يمكن علشان الحب، ويمكن علشان الذكريات، ويمكن علشان الإنسان نفسه يستحق إنه يعرف إذا كان القرار اللي هياخده بعد الوجع هو فعلًا القرار اللي يقدر يعيش بيه.

وده يمكن أكتر درس خرجت بيه من الرواية:

مفيش أي فعل يبرر الخيانة، مهما كانت أسبابه أو مبرراته.

لكن فيه قلب بيحب… وممكن يسامح مرة.

فما تخسرش قلب حبك، لأنك ممكن تخسر معاه مش بس الشخص… ممكن تخسر صورتك الحلوة عن نفسك في عينيه.

«خائن أون لاين» من الحكايات اللي بتخليك تقفل الكتاب، لكن الحكاية تفضل مفتوحة جواك شوية.

شكرًا للكاتبة اللي عرفت تخليني أعيش كل ده وأنا قاعدة في مكاني، وتدخلني جوه وجع شخصياتها بالشكل ده.

بادئ ذي بدء، أرجو أن تكون مراجعتي دافعا للكاتبة إلى التطوير لا إلى الإحباط. راجية أن أرى روايتها التالية وقد تفادت ما كان يعيقني عن متابعة الأحداث والمواقف بسلاسة. آملة منها الاستعانة بمدقق لغوي وإملائي لتجنب الوقوع في هذه الأخطاء. مجددة التعبير عن هدفي بتطوير الجوانب اللغوية أو النحوية والإملائية ليستمتع القارئ بسياق الرواية وتسلسل أحداثها وقوة الحبكة الفنية. مع تمنياتي بالتوفيق والنجاح في عمل إبداعي قادم.

ر

بصراحة قصة جوفاء و ترابط غير حقيقي اقرب ماتكون لقصص المراهقة و مبالغة بالوصف على بللت شفاهها و مط شفتيه …

قعدت كتير اتأكد ان اللي كاتب الكتاب ست مش راجل.. ملخصه "معلش الستات اللي مش متجوزة بتجيب رجلين الرجالة المتجوزة و بيبقي غلط بسيط.. ستاتهم المفروض تبقي اعقل و تسامح"