قطط الكهوف

‫ لو خيروني كل يوم

‫ هاختار اللي قررته: ‫

مش عايز انشف

‫ واتقِفِل واتلفّ

‫ وانتقل للرف.

‫ عايز افضل ألفّ

‫ فوق طاولة الخزاف

انحني واتضمّ

‫ واتّني واتشد

‫ واتفرد واتقرّب.

‫ مش عايز اتعمّد

‫ عايز اتغرّب

‫ مش عايز اكون قدوة

‫ عايز أكون مهرَب.

‫ أوزن كلامي وأزخرفه وأساويه؟

‫ لأ.. أخرّب

‫ أبني اللي ضامن هيئته ومعانيه؟

‫ لأ..

‫ افضل باجرّب..

آخر وصية.. سيبني أكبر وأنتهي

‫ ما تخلينيش صنمك معاك بتنقّله

‫ والعمر غالي بس أغلى ما اتوجد

‫ إنك تشوف صُنعَك تقول ما أجمله

الصبح باصبح نوح

‫ بالليل أنام أيوب

‫ يمكن في آخر الحكاية

‫ أطلع نبي مجنون..

أطلع نبي معيوب..

‫ بس هابني

‫ وإلا إيه هيكون

‫ معنى اللي كان ويكون؟

‫ مش مهم..

‫ أنا خلاص

اخترت:

‫ أطلع نبي معيوب..

‫ ولا باتش يوم مغلوب.

الشعر طالع مني بالعافية

‫ وانا اللي كنت باقول

‫ فجأة وكده وعلى طول

‫ افرد دراعي.

الوزن يطاوعني

‫ وارمي الكلام الزَهْر

‫ تستوي القافية ‫

دلوقتي. ‫

طالع مني بالعافية

‫ يلا. نصيب.

‫ هاخد زمن غيري؟ ‫

يا ريت. ‫

يا ريتني أسكن كل بيت

‫ وأحب كل حبيبة

‫ واخبّط كل باب

‫ ياريتني أمسك كل معنى بإيدي

‫ وأشكّله لأبواب ‫

أمر منها لجناين شعر ‫

فاضية الطرقات

‫ يا ريت. ‫

يا ريت. ‫

يا ريت أرفع ستارة

‫ كل سر جميل

‫ يا ريت أحضر بكارة

‫ كل فجر وأصيل

‫ يا ريت أشوف كلمتي

‫ أبدية زي النيل..

‫ يا ريتني أبداً ماقولش

‫ لنفسي مرة يا ريت..

الناس ديابة.. إن شفت ديبك.. إقتله

‫ ما بين ضلوعك وحش لازم تعرفه

‫ لو سبته ضال.. هينهش اللي بيحمله