❝رفعت رايتي البيضا دلوقتي..
وبقول لكل الخلق: «أنا خسران»
الخوف هزمني جولة ورا جولة
وعينيها جت هزمتني هي كمان
واقع فِـ حفرةْ حُبّ متكتِّف
مش عارف أهرب ثانية مـ الأحزان
أنا مش عجوز على اللي حاصل ده
ومفيش فِـ جيبي حُقْنة ومُسكّن
أنا مش مريض غير بِـ اللي حبّيتهم..
والضعف دايمًا منّي متمّكِّن
كل أمّا ييجي الحب قُدّامي..
بيضيع وأحسّ بْـ إنِّي ضيَّعْتُه
لو كان في إيدي أغيَّر العالم..
والله كُنْت بْـ سرعة غيَّرته
يمكن ساعتها الدُنيا تتحسن..
وابدأ بداية جديدة ويّايا
يمكن هقابل حد يشبهني..
ويسد آخر شرخ جوّايا
أفتح بيباني للحياة تاني
وأكتب بِـ إيدي حياتي فِـ رواية
أنسى اللي عِشْتُه قبل ما تجيلي
وأضحك وأقول لك: «قلبي بيحبك»
أنا عشت عمري مريض بِـ كل الناس
وما اتعالجتش إلا من طبِّك. ❞
⭐️⭐️⭐️⭐️
❝ شُفتك حقيقة بس ما فضلتيش
حبيت حياتي ودُنيتي معاكي..
بس إنتي برضه اختارتي ما تحبّيش ❞
⭐️⭐️⭐️⭐️
❝ خلصت حكايتي اللي ابتدييها وحيد/
خلصت حكايتي ولسَّه برضه وحيد
الدنيا ساذجة وباهتة ومعاندة..
حالفة إنها هتلخبط المواعيد. ❞
⭐️⭐️⭐️⭐️
❝ وهسيب الخوف اللي مصاحبُه
مربوط بِـ الحمل اللي أنا ساحبُه
وأرميهم ورا ضهري وأجيلِك
ههرب مِ العالم وأجريلِك
وهجيب أحلامي وكشاكيلي
هقطف مِـ السّما نجمة ليلي
هنده ليلى تغنّي عشانك..
«قلبي دليلي» ❞
