غرباء حميمون

تروى هذه الرواية على لسان الابن الأصغر لعائلة تبدو متماسكة من الخارج، لكنها في الحقيقة تعيش مسافات وغربة صامتة بين أفرادها. حيث يعمل هذا الابن مهندسًا معماريًا، يرى الرسومات الهندسية والمعمارية في مختلف ما يدور حوله من مساكن وطرقات، وقد ورث المهنة عن والده، لكنه لم يشعر بالانتماء قط. يطاردُه الإحساس بالغربة في منزله، وبين أفراد أسرته، وحتى في علاقته بزوجته، حيث تتسع فجوة الصمت والوحدة يومًا بعد يوم. رواية شعرت بأنها تطرح سؤالًا في معظم صفحاتها وهو: كيف يمكن أن نكون قريبين من الآخرين، لكن غرباء عنهم في الوقت نفسه؟

ماعرفت احدد مشاعري ناحية الرواية للحين، انتظرت وقت قبل اكتب المراجعة لكن باقي مب متأكدة! بداية الرواية فيها شي مشوق يخليك تنتقل للفصل التالي، لكنها حزينة وسوداوية، مااعرف اغلب الروايات السعودية اللي قريتها هذا طابعهم الغالب مع ان فيه مجالات اكثر ممكن ينكتب عنها! الرواية احداثها بالخبر وفترتها ٢٠١٦ الى ٢٠٢١ يمكن، تعتبر قريبة يعني الاجواء والاشارات اللي فيها مألوفة، الرواية بلسان الشخصية الرئيسية والاحداث تدور حوله وتطور نظرته للاشخاص بحياته منطقي بتطوره بالعمر والتجارب لكن القناعة اللي وصلها بالاخير مب شرط تكون صحيحة او حقيقية حتى. الاجزاء اللي يتكلم فيه عن زوجته فيها غموض وينفهم ان الشخصية الرئيسية تجهل او تتجاهل الدخول بالتفاصيل وتحاول تمشي على السطح بدون ماتتعمق او تغوص بالداخل، وهذا هو عنوان الرواية، تفسيره للحياة اللي عاشها واللي وصلها الان قد يكون منطقي، بس للحين احس ناقصها شي وفيه شي مفقود عجزت احدده !! هذي اول رواية اقراها للكاتب شجعتني اقرا روايته الاولى واللي غالبا تكون انجح واقوى، لكن اعتقد الطابع الحزين بيكون غالب عليها وانا ماعندي طاقة للحزن الان.