فتاة تندر - ليست الأشياء كما تبدو, وكذلك الأشخاص

سيكون كتاب السنه أنها قصه مشوقه

كاتبه ممتازة وأسلوب مغرى للسرد وبجد روايه مشوقه و تحس انها قريبه مننا جدا ....اسلوب رائع فى القرب من القلوب

رائعه جدااا حبيت خلصتها ف جلسة واحده استمتعت بقرائتها حقاً

اولى قراءات ٢٠٢٤ والحمدلله رواية موفقة جدًا.

بتبدأ الرواية بتعارف هاني و اروى عن طريق تطبيق تندر، وبتطور العلاقة بينهم اعجاب ثم حب، لحد ما يبدأوا يجهزوا للجواز..

لحد ما يظهر أسرار وأكاذيب كتير.. وتشويق اكتر.

رواية مشوَّقة جدا جدا جدا خلصتها في جلسة واحدة خلتني معرفش أنام الا لما اخلصها.

تقييمها ⭐️⭐️⭐️⭐️⭐️

رغم ان رايي ممكن يكون مختلف و لكن كارما ضحيه الام و الاخت طبعا و كنت اتمني ان هاني يتقبل بعد ما قرا مذاكرتها و تفهم الموقف ان يسامحها و ميمشيش و يفضل معاها و لكن انا فاهم ان منطق القتل لا يمكن السماح بيه و لكن فعلا كارما تستحق فرصه حياه تانيه افضل حتي بعد ما تم ارتكابه

متقلقش اللي على الغلاف أكتر كلمة بتخلي الواحد يقلق

والقلق ده بياخدنا لحد نص الكتاب تقريبا

من أول صفحة لحد نص الكتاب ممكن الواحد ميفوقش غير لما ينتهي منهم

بعد كدة بيحصل تسلسل منطقي وسلس للأحداث وبياخدنا لنهاية منطقية جدا

اظن ان رواية تندر ستكون من اجمل الروايات في ٢٠٢٣ فرواية تنتهي بجلسة واحدة وتحمل لغزا حتي منتصفها تقريبا ونهاية منطقية جدا لعوامل علي نجاحها وان كنت اقرا للكاتبة لاول مرة فبألتاكيد ليست اخر مرة

شكراا استاذة لبني حماد

فتاة تندر

رواية بوليسية على لمسة رعب وهي أول مرة لي مع الكاتبة "لبنى حماد" ولن تكون الأخيرة إن شاء الله!

رواية خفيفة ولطيفة مكتوبة بأسلوب جيد وبانسيابية وبلغة فصحى سرداً وعامية مصرية حواراً

القصة عن رجل يتعرف على فتاة من تطبيق "تندر" ولكنه يشعر ببعض التصرفات الغريبة من ناحيتها والتي تجعله يحاول كشفها وسبر أغوارها!

اقتباسات

"التأخر في الانتقام يجعل الضربة أشد قسوة"

استمعت إليها على تطبيق "إقرألي" وموجودة على أبجد

#فريديات

ثاني قراءتي في العام، والحمدلله للمرة الثانية على التوالي يقع في أيدي عمل جميل، شكلها هتبقي سنة حلوة أدبياً ان شاء الله 😊♥️

بتبدأ القصة بــهاني، شاب عايش حياة نمطية، من الشغل للبيت والعكس صحيح زي ما بنقول كدا و بيهوي علي نفسه بقعدة القهوة، وفي احد الأيام بتجره رجليه انه يتصفح تطبيق (تندر).. وهو عبارة - بإختصار - عن منصة للتعارف مش اكتر

بحيث كل واحد/ة يعرض صورته مع شوية بيانات عن شخصيته وحياته لكي تكن فرصة بلقاء شريك حياته

وهاني بيتشد لأحد البنات علي المنصة من صورتها وبيبدأ يتكلم معاها، ومن هنا وهما بيفضلوا فترة طويلة بيدور بينهم محادثات ((فقط)) لحد ما في مرة بيقرروا يتقابلوا علي ارض الواقع، وهنا كانت المفاجأة بالنسبة لهاني.. لأن أروي - فتاة تندر - كانت مختلفة شوية عن صورها.. هي نفس البنت لكن في اختلافات شكلية ملحوظة، بررت بها البطلة انها فلاتر السوشيال ميديا ودا كان منطقي ومقبول لهاني.. ومع تقدم الاحداث بيكتشف هاني بعض الأمور عن شريكة حياته الجديدة.. وزوجته المستبقلية كمان!!

⚠️ يصلح العمل لمن هم +18 لوجود احداث عنيفة ⚠️

السرد واللغة في العمل كانوا بدرجة جيد جداا.. سرد سلس، تسلسل أحداث منظم وغير مربك، يحمس القارئ علي إكمال العمل بدون ملل.. لغة عربية فصحي سليمة وليس عليها غبار وماشية مع اجواء العمل دون استعراض عضلات، حوار بالعامية المصرية ودا احد سلبيات العمل (مش كونه عامية إطلاقاً ولكن هذكر ليه تحت👇👇)

ينتمي العمل لفئة الاعمال ذات الشخصيات القليلة.. يعني تقريبا الرواية كلها بتتمحور حول ثلاث شخصيات رئيسية وكام شخصية مساندة للأحداث.. ودا من المفترض ان يعطي للكاتبة فرصة بناء تاريخي وتصميم جيد لأن مفيش شخصيات محورية كتير نشتغل عليهم.. هل دا نجح؟؟

بنسبة كبيرة جدا، آه

شخصية أروي (وشخصية اخري مستحيل اذكرها لأن فيها حرق وش 😂).. أروي زي ما قلت كانت البنت الي أرتبط بها هاني عن طريق المنصة، والي كانت متصممة بشكل رائع يا صديقي، من حيث التصاعد الجيد (الممهد) عشان توصل للذروة في دورها في العمل، مش عايز ادخل في تفاصيل عن بناءها عشان فعلا الحرق لكن بجد شاطرة يا ا لبني علي الشخصية دي بالذات..

اما هاني.. كان جيد، مش واخد حقه زي اروي بس جيد.. وانت كقارئ مش هتحس انه كان شخصية مسطحة مثلا او ضعيفة في التصميم.. بس عظمة اروي غطت عليه شوية

من افضل جوانب العمل او أفضلها والله، هو الـتوجس🧐

الي هو انت مش عارف في ايه، هو الاحداث ماشية عادي.. بس انت خايف وقلقان.. طب من ايه متعرفش😂

ودي بقي وظيفة الكاتب/ة الشاطر/ة، انه يكتب عمل اثارة وغموض يكون في اثارة وغموض فعلا فاهم قصدي؟

فبرده تحية للكاتبة

و مستحيل اغفل عن التصاعد الممتاز للعمل حتي النهاية.. حقيقي حاجة نضيفة 😅

الـflashbacks الي كانت عن طريق خطابات اتعملت حلو اووي

النهاية كانت.. ختامها مسك كدا

قفلت كل الثغرات.. جاوبت كل الأسئلة وكانت مقفولة الحمدلله مش مفتوحة عشان بتغاظ

نرجع لنقطة الحوار والسلبيات..

الحوار طول العمل كان زي الفل.. من حيث الكثافة والجودة.. تمام

لكن في اخر فصول العمل وهو ظهور الحبكة وتفجر الاحداث بقي، في شخصية - مش هوضح بنت ولا راجل- الكاتبة قررت انها تحكي أحداث بحوار كتيييير كان ممكن يبقي سرد سينمائي.. ودي للاسف مشكلة بصراحة من وجهة نظري لانها قللت نسبة المتعة

ان الاحداث تتحكي في صورة حوار بدل سرد، مش احسن قرار

من الحاجات برده الي هتقلل من متعة التجربة عند معظم القراء.. هو التوقع للحبكة بدري..

شوف، هي مش ظاهرة اوي لأن زي ما قلت الكاتبة ممتازة في عامل الغموض..لكن.. الي بيقرأ من زمان (في الفئة دي من الأعمال) الي هو حريف.. يعني اظن صعب تدخل عليه!

وانا مش بدعي اني كدا.. بس بقول الي شايفه او الي حسيته♥️

الخلاصة، عمل جيد جدا، صغير ويخلص في قعدة، فيه قدر لا يستهان به من الغموض و المتعة.. ونهاية جميلة هتعلق معاك 😉😉

إذا ما خاب ظنّي هذي أول تجربة للكاتبة في أدب الجريمة و الغموض، كـ تجربة أولى؟ جيدة جداً للأمانة.

قبل لا أبدا قراءتها كنت متوقع عمل أقل من متوسط لكنه فاق توقعاتي، رواية تناسب عطلة نهاية الأسبوع و قراءتها في جلسة.

عموماً تشوّقت لأعمال الكاتبة المستقبلية، قلمها سلس وأسلوبها في السرد جذّاب حتى الحوارات رتمها ممتاز ومع القليل من التطوّر ستصبح أسم لامع في الوسط الأدبي المصري.

كل التوفيق لها.