قليلاً من الفرح

#تقى_سرور

رواية: قليلًا من الفرح

للكاتب: علي جابر الفيفي

التقييم: ⭐⭐⭐⭐⭐

رواية أقل ما يقال عليها إنها رائعة، عالم مليان وحدة وعطف وألفة وحنان في أكتر مكان بيكون القلب محتاج فيه إنه ينضج ويكون آآمن، بيحتاج حد يحتويه ويفهم إللي بيكون شاغل باله من غير ما يتكلم ويفسر كتير ♥

المدرسة هي العالم الثاني اللي بنضطر فيه نلجأ للعالم الخارجي بعد حضن الأم، بنكون مضطرين نسيب الآمان كله عشان عالم ممكن ميكونش أحسن حاجة لكن بنبدأ فيه نتعلم أن الدنيا مش كلها آمان ولا كلها شر وبس دايما بيكون في مزيج بين الإثنين، بتعلمنا إن هنفضل نسير في طرق مش بتاعتنا أوقات بس عشان نتعلم منها عشان نعرف نمشي في طريقنا اللي شبهنا ♥

بتعلمنا إن كلنا بنغلط، ودايما هنلاقي ناس كتير واقفة ضدنا حتى لو مش عارفانا كل اللي بتعمله إنها تأذينا بالكلام أو تكون سبب في ظلمنا مش عشان هما وحشين بالعكس، هما لسه ميعرفوش النضج بمعناه الحقيقي، بيطلعو كل اللي اتعلموه سواء صح أو غلط على هيئة كلام جارح هدفه يخرج اللي جواهم حتى لو كان مليان نقص أو أذى..

الرواية مش بس خلتني استشعر كل دا، هي كمان عرفتني قيمة نعمة المُعلم والمربي وإن هو الأساس دايمًا مش مجرد هو بيأدي وظيفته في التدريس (اللي المفروض تكون بما يرضى الله) دا كمان دخل في عالم كل طالب منهم وبكل اللي بيمروا فيه ووقف جنبهم وساندهم وكان خير عون لكل طالب وكان نفسي أكون في المدرسة دي وأعيش كل تفصيلة فيها وأكون طالبة عنده لإن أكيد كانت هتكون أحسن فترة في حياتي! ♥♥

تستحق تتقرأ بجدارة، وبرشحها لأي حد فعلًا حابب يقضي وقت ممتع مع مدرسة "الإمام الشافعي للثانوية" ويشوف مين أ. راشد مين؟ ويعرف شخصيته كا شخص قبل ما يكون مُعلم ♥