مراجعات رواية وقريبا.. سيحل الظلام

اوفر دوس عظمة بجد ايه العظمة دي انا حرفيا كنت بنهج و انا بقرأ اول مرة اكون بقرأ رواية رعب و اكون خايفة و متحمسة كده من غير التأثيرات الخارجة للجو العام تكون مهيأة للخوف ده بجد كل مرة بنبهر

🔪اسم العمل : وقريبًا سيحل الظلام

🔪اسم الكاتب : خالد أمين

ثانية واحدة بس يا جماعة عشان نفهم!!!

بقالي ساعات بحاول أستجمع خطوط الرواية.

فاكرين لما قلت على العالم الروائي للكاتب خالد أمين إنه عالم مقبض بيفكرني بعوالم مدينة جوثام لو كانت في الشرق؟؟

رواية "وقريبا سيحل الظلام" هي الدليل العملي العلمي على حقيقة النظرية دي.

حرفيا أنا كنت بقرأ وحاسس وكأني في أجواء فيلم batman the dark knight rises الموسيقى المتوترة حرفيا كانت عمالة ترن في وداني.

ومن غير ما نضيع وقت طويل يلا بينا نبدأ المراجعة زي العادة.

وخلونا نبدأ مع الانطباع الأخيرة

من المرات القليلة اللي خلصت فيها قراءة ولقيت نفسي مبرق ومش قادر افكر أو خلوني أقول متنح ومفيش صوت حوالين مني خالص.

عارفين الشعور ده؟؟

أنا فعلا مكنتش عارف استوعب كل الدراما دي، ومش عارف اتخطى النهاية والأحداث والحبكة.

وعشان محدش يفهمني غلط خلوني أقول إن انطباعي بعد رواية "وقريبا سيحل الظلام" هو كان نفس انطباعي بعد مشاهدة فيلم avengers endgame.

ويلا بينا ندخل على الانطباع الأول والبداية والافتتاحية.

الانطباع الأول مع الغلاف القاتم الدموي والعنوان وخلوني أقول للمرة التانية أو التالتة تقريبا إن كلمة الظهر من وجهة نظري مش أحسن حاجة ممكن تعبر عن الرواية.

كان من الواضح إن العمل ينتمي للجريمة والمغامرة أو عالم التحقيقات مع شوية رعب.

لكن لو أنت عارف الكاتب وأعماله فأنت لازم تكون متأكد إن العمل رعب نفسي في المقام الأول.

وطبعا كنت متحمس جدا للقراءة وقلت أكيد الرواية دي هتخلص في جلسة واحدة يعني وفعلا ده اللي حصل.

وتعالوا نبدأ الرواية مع جزء من مذكرات جادو وهو في الحقيقة مجرم أو خلونا نقول سفاح وده طبعا بيفكرنا ببداية رواية "زائر منتصف الليل" ومن هنا ندخل على طول على جرائم قتل فظيعة ورهيبة والغرض منها نشر الرعب في قلوب الناس.

ومعانا رجل غني جدا قرر قبل ما يموت يجمع فريق عشان يتصدى للسفاح ده ويكشف عن شخصيته الحقيقة وده طبعا يفكرنا بفكرة بروس وين في جمع فريق عصبة العدالة.

وفعلا ينطلق الخادم الوفي - شبيه ألفريد في عالم باتمان - في رحلة جمع الفريق.

يعني في أول خمسين صفحة عندنا جرائم مروعة تحمل توقيع "جادو" - وهو حاجة كده تفكرك بشخصية الجوكر بس على ميلودراما شبيهة بسفاح النساء، وألغاز وتحديات وفريق من أصحاب القدرات الخاصة وكل ده فعلا يسحل أفكارك معاه ويخلي النوم يطير من عينك.

الرواية جامدة جدا جدا لولا بعض الأخطاء الإملائية ما بين الوقت والثاني وعندنا عودة لكل الشخصيات الرئيسية في عالم الكاتب ومنهم طبعا "ناردين" "صلاح" و"حاتم" و"آدم" ومعانا ظهور قوي جدا لقصر الشر أو "قصر سليمان" وقرية الشمع.

ومش بس كده ظهر معانا شخصيتين جداد خالص انا مقريتش عنهم قبل كده وكان نفسي بصراحة أعرف عنهم قبل كده وهما "سليم" و"رودينا" و"عامر" و"رشدي" وآخرون مش عايز أذكرهم.

بشكل خاص كان تقديم الشخصيات دي حلو وسريع لكن أنا عندي لسه فضول واسالة كتير عنهم محتاجة إجابة.

كان نفسي جدا تظهر شخصية "آيتن" من رواية "ذات مرة في الطريق المظلم" بس يلا حصل خير.

وطبعا هنا لازم نتكلم عن الشخصيات يا جماعة.

الشخصيات في الرواية

الشخصية الرئيسية في الرواية هي "جادو" محور الشر في الرواية وكل الشخصيات التانية كانت أبطال محورية أو خلونا نقول فريق التصدي ومحور المقاومة.

كل شخصية في الرواية سواء كانت شريرة أو واقعية أو صاحبة قدرة خارقة ليها نمط ولغة وفكر وبسهولة ممكن تتعلق بيهم وتحبهم وتتعاطف معاهم.

عندنا مواجهة أولى وثانية وثالثة ورابعة وفي كل مواجهة شخصيات الفريق بتتغير وتنضج وشخصية جادو كمان بتتغير كل ده على خلفية مدينة الشمع وقصر سليمان والسفينة الملعونة.

الكاتب كان عبقري يا جماعة في توزيع الشخصيات وضبط إيقاع الرواية ما بين إيقاع سريع إلى سريع جدا.

نسبة التوتر والقلق والغموض كبيرة.

يمكن الرجل الذي عض التراب كان مخيب للآمال بالنسبالي - كنت مستني منه حاجات كتير أعظم وأكبر - ومعنديش تفسير لحد دلوقتي لبعض الأمور لكن بشكل عام أنا كنت مسحول وراضي عن تجاهل بعض التفاصيل الصغيرة.

وتعالوا هنا نتكلم عن الحبكة والفكرة.

طيب من الواضح طبعا إن الحبكة معقدة تشبه إلى حد كبير حبكة فيلم "avengers infinity war" من حيث التعقيدات ومسار محور الشر وللأسف انا مش هقدر أحرق أي حاجة في الرواية.

لكن خلوني أكون واضح إن الرواية مش سطحية خالص، الرواية تطرح فكرة مهمة وبطريقة جديدة وعبقرية وعندنا هنا رسالة قوية واضحة يمكن تم التركيز عليها بشكل مباشر أكثر من مرة من غير ما يغير إيقاع الرواية.

مش محتاج ذكاء كبير عشان تعرف إن "جادو" هو تمثيل لشر معين أو مركب من الشرور السبعة.

أجمل ما في الرواية هي العالم الروائي الواقعي والمتكامل اللي أحنا بنتعامل معاه.

عندنا تأثر واضح بالأدب الغربي لكن بطعم وصياغة وتمصير حقيقي رائع.

طبعا عندنا كروس أوفر وكام بلوت تويست حلو وكام خط مفتوح على الجديد منه في عالم الكاتب.

طبعا للمرة اللي مش عارف كام لازم نتكلم عن خيال الكاتب والثقافة بتاعته وقدرته على وضع الرعب والتوتر في ذهن القارئ من خلال اللفظ والكلمة والجملة.

وتعالوا هنا نتكلم عن اللغة في الرواية.

طبعا العمل بالكامل بالعربية الفصحى وعندنا وصف بطبيعة الحال عبقري وحوار قوي جدا ومكثف وطبعا ممكن تستخرج شوية اقتباسات كده عنب أحمر من غير بزر زي مثلا.

" الجحيم هو أن تقضي حياتك بأكملها في حافلة لا تصل إلى وجهتها.. "

" الخيال هو القدرة على الهروب من الواقع..‫ وأحيانًا هو الوسيلة لهزيمة الواقع. ❝

وأخيرا خلونا نتكلم عن الخلاصة

النهاية كانت حلوة ومثيرة للخيال ومنتظر الجزء الثاني من الملحمة دي.

مشكلتي بقى هنا إن أنا كنت أتمنى نهاية غير كده خالص.

الخلاصة إن الرواية فظيعة يا جماعة لكن في مشكلة بتقابل كل واحد مقراش للكاتب قبل كده.

لذلك ننصح بشدة بقراءة أعمال الكاتب من القديم للجديد عشان المتعة تكون أجمل.

ولو مش عندك وقت تقرا كل أعمال الكاتب فعلى الأقل لازم تقرأ "إنهم ياتون ليلا" و"ذات مرة في الطريق المظلم".

أما عن العمل المفضل بالنسبة ليا فهو "جرائم الغراب السبع" ثم "زائر منتصف الليل"

#أحمدمجدي

🌃 و قريبا سيحل الظلام 🌃

رواية للكاتب : خالد أمين

عدد الصفحات :

دار النشر: دار دون للنشر والتوزيع

تصنيف الرواية : غموض / تشويق / بوليسية / رعب

نوع القراءة : الكتروني ( تطبيق ابجد )

🌚 نبذة عن الرواية :

❞ اسمي هو جادو، وكما قلت لكم في البداية، لديَّ حاجة مُلِحَّة لا أريد مقاومتها. وهي القتل. ‫ وما حدث الآن هو مجرد الخطوة الأولى، بداية سلسلة من الأحداث ستجعل القاهرة تعيش في حالة من الذعر، لأن القاهرة قد أصبحت مدينتي الآن.. مدينة جادو..

‫ مرحبًا بكم في مدينة الخوف. ❝

قاتل مختل يلقب نفسه ب (جادو) العظيم امير المكر و الخداع يقوم بعمل جرائم قتل بشعة ومخيفة ، يقوم بتصوير كل جريمة متخفيا أثناء تنفيذها و يقوم بنشرها و عرضها على المواقع حتى يشاهدها الجميع

أصبحت القاهرة تعيش في رعب و ظلام وخوف بسبب جرائمه البشعة لم يسلم منه احد صغيرا او كبيرا له العديد و العديد من الضحايا و الكثير من الجرائم ( جريمة ركاب المترو - جريمة الاطفال الرضع في مستشفى الأطفال -

ابنتان طبيب نفسي مشهور و جرائم اخرى )

_ من هو جادو ؟؟ ولماذا لقب نفسه بهذا اللقب ؟؟ و ما معني (جادو) ؟؟

_ ما الدافع وراء ارتكابه كل هذة الجرائم ؟؟

لم ينجح أحد في الامساك به او القبض عليه . قرر رجل يدعى عامر عمران التصدي لجادو و مواجهته و الكشف عن هويته

قام عامر بتكوين فريق خاص لمجموعة من خمس اشخاص لمساعدته في كشف هوية جادو و القبض عليه

الأول كاتب و روائي

الثانية ممثلة مسرح

الثالث محقق تأمين متقاعد و معه كاتبة روايات رعب

الرابع رجل له اسطوره شعبية

و الخامس و الاخير مريض نفسي في مصحة نفسية

_ من هو عامر عمران ؟؟ و ما سبب قراره للتصدي لـ جادو و جرائمه و الكشف عنه ؟؟

_ لماذا اختار عامر عمران هولاء الاشخاص الخمس دونا عن غيرهم ؟؟

_ هل سينجح عامر في تكوين الفريق وإقناع هؤلاء الأشخاص و هل سينجحون في المساعدة للقبض علي جادو أم سينتصر عليهم ؟؟

كان هناك حلم يراود جادو و أعضاء فريق عامر عمران لم يجدوا له تفسير او معنى

(حلم عن قصر غريب مهيب في قرية مهجورة يطل علي النيل و حديقته خضراء يحيط بها سياج عملاق )

_ ما السر وراء هذا الحلم ؟؟ و لماذا يراود جادو و أعضاء فريق عامر عمران ؟؟

و ما ذلك القصر ؟؟ و ما السر وراء تلك القرية التي هجرها اهلها ؟؟

🌚 السرد والأحداث :

السرد كان بطريقة سلسة و ممتعة جدا و اسلوب الكاتب في السرد رائع جدا وصف الأماكن و طريقة السرد تجعل القارئ يعيش في أجواء الرواية ويراها رؤية العين

تتكون الرواية من ٢٢ فصل من الاثارة و التشويق فمن اول صفحة في الرواية تبدأ الاثارة و كل فصل يحتوي على مفاجأة جديدة و احداث اكثر اثارة و تشويق .

الاحداث سريعة و مشوقة لن تستطيع ان تلتقط انفاسك و لا مجال لتوقع الأحداث و ان حدث يضرب الكاتب بتوقعك عرض الحائط

🌚 اللغة :

استخدم الكاتب اللغة العربية الفصحى في السرد وكذلك في الحوار

🌚 الشخصيات :

تم رسم الشخصيات بطريقة رائعة جدا و رسم الكاتب و حدد وقت ظهور كل شخصية و دورها بطريقة مبدعة جدا

اعجبت بالعديد من الشخصيات و أحببت شخصية كلا من سليم و حاتم جدا

و كرهت شخصية جادو جدا جدا

🌚 رائي الشخصي :

🕍 رواية رائعة جدا جدا استمتعت جدا بقرائتها. يمكن انهائها في جلسة واحدة انهيتها على جلستين بسبب ان كنت مشغولة بس اول ما اروح كان لازم افتحها و اكملها من شدة التشويق والإثارة لمعرفة النهاية

🕍 رواية تشدك و تستحوذ على القارئ من أول صفحة يأخذك الكاتب مع جرائم جادو و الاحداث المشوقة و لا تستطيع التقاط أنفاسك الا مع اخر كلمة في اخر صفحة من الرواية

🕍 عجبني جدا جدا الـ twist اللي في الرواية والنهاية كانت صادمة و غير متوقعة

🕍 عجبني جدا ال cross over الموجود في الرواية حيث جمع الكاتب بين الرواية ورواية أخرى من حيث الاحداث و الشخصيات

🕍 و قريبا سيحل الظلام هي اللقاء الثاني لي مع روايات الكاتب خالد امين بعد قرائتي لرواية زائر منتصف الليل و اللي عجبتني جدا و ان شاء أكمل قراءة باقي أعمال الكاتب السابقة و في انتظار الروايات القادمة

🕍 ارشح الرواية لمحبي روايات الغموض و الرعب و البوليسية

اتمني للكاتب Khalid Amin التوفيق دائما

و دايما يارب من نجاح لنجاح

🌚 اقتباسات من الرواية :

🕍 غريب هو أمر الأشياء التي نعتادها والأشياء التي لا نعتادها، كيف نقبل الأولى مهما كانت منفِّرة ونرفض الثانية رغمًا عن جمالها.

🕍 أحيانًا تخطط لشيء ما جيدًا، لكنه لا يحدث، ويكون بداخلك الجزء المسؤول لئلا تندهش عند عدم حدوث هذا الشيء، الجزء المسؤول عن توقع فشل الخطط .

🕍 ‫ الخيال هو القدرة على الهروب من الواقع..

‫ وأحيانًا هو الوسيلة لهزيمة الواقع.

‏

تبدأ احداث الرواية ب ((جـــادو)) المختل - او العظيم كما كان يطلق علي نفسه 😂 - الفاعل بجرائم قتل مجنونة و مرعبة في احياء القاهرة الي بقت مظلمة بسببه.. وتم سفك الكثير من الدماء بها علي يد جادو... حتي الأطفال الرضع لم تُرحم منه😓

و دا السبب الي بيخلي مجموعة شخصيات كل واحد منهم يمتلك قوة خارقة خاصة يجتمعوا للقضاء علي هذا الشر الخام.. فهل يا ترى هيعرفوا يهزموا جادو العظيم؟!🙃

و ايه علاقة قصر سليمان بكل دا

و ايه علاقة آدم و حاتم الشخصيات القديمة من رواية ذات مرة في الطريق المظلم لنفس الكاتب بكل دا برده؟؟

اول حاجة وقبل اي شيء انا عايز اوضح ان خالد امين في العمل دا حرفياً - بمعني الكلمة - استعان بجميع الشخصيات الي كاتبها في جميع اعماله السابقة.. بل و كانوا هم الابطال مش مجرد شخصيات ثانوية مثلا

ف لو حابب تستمتع بالعمل دا اكتر اقرأ اعماله السابقة بالذات (( ذات مرة في الطريق المظلم -- أنهم يأتون ليلا -- زائر منتصف الليل))

والله العظيم ما بقول كدا دعاية مثلا للكاتب لكن لا الموضوع فعلا هيكون ممتع جدا لو انت قريتهم قبل دي... و طبعا تقدر تقرأ دي علطول لان من ناحية الاحداث مفيش اي ربط انا بتكلم علي الشخصيات ⚠️⚠️

السرد في العمل كان في تطور نسبي عن باقي اعمال الكاتب.. بلغة عربية فصحي و كذالك الحوار

اسلوب سرد الكاتب معروف انه سلس و بسيط و دا كان واضح في العمل برده

و في نفس الوقت مش ركيك بل يصل للقوة أحياناً.. بالذات في مشاهد الرعب

الوصف كان جيد جدا.. اذا كان مكاني او شخصيات.. و أشيد بمشاهد القصر و الاحداث الي دارت فيه

الشخصيات زي ما قلت فوق اي قارئ قديم للكاتب عارفهم كلهم و عارف تاريخهم و بنائهم (( و مع ذلك )) الكاتب لم يبخل بوضع لمحات للبناء التاريخي لكل شخصية مرضية للقارئ و تخليه يعرف يندمج معاهم (( عشان كدا بقول الي قرأ اعماله السابقة هيستمتع اكتر))

و طبعا لازم اتكلم علي شرير الرواية 😈 جادو

و دا كان شخصية لم تظهر من قبل.. تم تصميمه بطريقة ممتازة و صنع دوافع لافعاله

و حقيقي هو شخصية و انت بتقرأ هتحس بكيمة كره له رهيب و هتبقي نفسك تسلخه حي زي ما كان بيعمل في ضحاياه

و الكاتب عرف يخلي حضوره تقيل علي قلبك ❤️‍🩹

العمل في جرعة رعب نفسي محترمة جدا جدا جدا + رعب معوي و لكن مش مبالغ اوي

و كلها مشاهد اتكتبت كويس و هتأثر فيك

عجبتني جدا مشاهد القصر و المواجهة العنيفة الي حصلت في الاخر بين شخصيتين لو اتكلمت عليهم ممكن يبقي فيها حرق احداث

و طبعا رسالة الكاتب كانت واضحة زي الشمس وهي ان مواقع التواصل الاجتماعي و السوشيال ميديا قادرة علي هدم مجتمع كامل حرفياً

كانت سبب في صنع شخصية مريضة زي جادو و سبب في ان الناس تكون سلبية و تتهاون في ارواح الآخرين علي حساب شاشة هاتفهم و عدد متابعينهم 😑😑

عيوب العمل تكمن في الحوار الي كان ضعيف او ركيك في بعض الأجزاء ((مش كله بكل تأكيد))

و زيادة كثافته نسبياً مقارنة بالسرد + اخطاء املائية و عدم تنصيق بعض أجزاء الكتاب و دا شيء يخص دار النشر و ليس الكاتب

و كان ممكن حجم العمل يقل عن كدا لان بالقرب من نص العمل نمط الاحداث بقا بطئ شوية و رجع تاني لمعدل قوي بالذات في فصول النهاية

النهاية.. كان في تحدي بيني و بين الكاتب اني معرفش البلوت او الالطوائية بتاعت الرواية و انا هنا بقول بكل صدق انه نجح في دا ك العادة

نهايات خالد امين غير قابلة للتوقع💪♥️

و صادمة...

الخلاصة

عمل رائع من كاتب حقيقي ممتاز.. يمتلك خيال خصب و انا شايف انه من احسن كتاب الرعب حاليا في مصر

نبذة: تدور احداث الرواية حول شخص يُدعي جادو وهو انفلونسر وقانل متسلسل بيرتكب ابشع الجرائم وبيذب الرعي في قلوب اهالي القاهرة وبعد ان فشلت الحكومة في القبض عليه بيظهر شخص من اغني اغنياء مصر وبيقرر انه يشكل فريق لمحاربة جادو والقبض عليه.. ولكن ماهي مقومات اعضاء هذا الفريق ليواجهوا قاتل بتلك الخطورة ؟ وما الذي ينتصر الخير ام الشر ؟؟

رأي:رواية حلوة جداً ومليئة بالاحداث والاشخاص والخيال العالي جداً بصراحة انهيتها ف يومين بس بسبب جمال الاحداث

عيوب: مشاهد القتل كتير ومُفصلة جداً وهذا لا يتناسب مع بعض الناس 🤍

في البداية حابب اشكر الكاتب علي المجهود المبذول في وصف قصر سليمان والاحداث اللي حصلت فيه خاصة في الفصول الأخيرة وكمان في تقديم الشخصيات و تاريخ كل شخصية لكن للأمانة انا حبيبت جزء جادو و تفاعل الناس معاه و تكوين فريق سري لكشف هويته و ايقافه لكن اتفصلت من جزء الماورائيات و القصر و مشهد هروب رودينا وناردين منه و استحواذ القصر علي صلاح و فجأة لما ناردين كلمته رجع لطبيعته و عجبني الغموض اللي أتقدم في وصف شخصية حاتم او الرجل الذي عض التراب و عجبني اوي الخط بتاع ادجار الان بو اللي كان ملازم سليم بس من رأيي لو كانت الراوية كملت في سكة الغموض و مطاردة الفريق لجادو من غير اي ما ورائيات و قوي خارقة كانت هتبقي افضل و بالتوفيق للكاتب فيما هو قادم

تصنيف الرواية على ابجد بوليسية وغموض ورعب...ممكن رعب علي كوميديا لكن بوليسية وغموض ابعد ما يكون ...واحدة من أكثر الروايات الساذجة اللي قريتها ف حياتي.

متعودتش اسيب كتاب بدأته من غير ما اخلصه والا كنت سيبت الرواية من اول ٢٠ صفحة.

الرواية مليانة شخصيات غامضة مش منطقية بتعمل احداث غامضة مش منطقية عشان نعمل رواية غامضة فطلعت الرواية مش منطقية ...الرجل الذي عض التراب !!!!! ايه اللقب ده بالشخصية دي!!!

في لحظات عدم تركيز وسرحان من الكاتب ...الفريق رايح المصحة النفسية وتلاقي مكتوب رودينا تتظاهر بالنظر للبوابة الحديدية للقصر...وصف لادم أن شخص متين البنية وف نفس الوقت نحيف...النهر يمر خلف القصر والقصر ف قرية مهجورة في الصحراء!!! مشهد تاني ناردين بتعاتب رودينا أنها مش مصدقة البعبع وهي عندها قدرة التحكم في عقول البشر بس هي مش بتتحكم هي بتقرأ الافكار... الانفاق التي بناها سليم تحت القصر والمفروض سليمان مش سليم...بداية الرواية كتبنا أن العام ٢٠٢٢ ..وف الفصل ١٢ اتكتب العام ٢٠٢٠.

ادم السفاح المريض النفسي شخصية خارقة عارفة تفاصيل سرية عن شخصيات تانية لا وكمان بيحلل شخصية جادو كأنه طبيب نفسي خبير.

أخطاء املائيه كتير ف رواية طالعة من دار نشر كبيرة زي دار دون

.

بدون حرق مشهد هروب رودينا وبعديه هروب ناردين مفيهمش بربع جنيه منطق بكمية من السذاجة والاستخفاف فوق الوصف ..ده لو ماتوا كان احسن.

اعتقد دي اول واخر رواية اقرأها للكاتب مع تمنياتي له بالافضل ف قادم أعماله.

حاسس ان فيه أجزاء واسعة مكتوبة بال AI