رحلات إلى عوالم خفية

قصه مثيره تشدك من اول صفحه ، انا خلصتها فى اقل من يوم

"رحلات إلى عوالم خفية"

متعودة دايمًا لما بقرأ رواية فانتازيا أو بوليسية بلاقي سردها مش أحسن حاجة لأن الحبكة بتبقى صعبة جدًا، وعشان الكاتب يركز ويتقنها صح بتقع منه حاجات تانية..

من العنوان قدرت أخمن إن الرواية دي خيالية؛ فانتازيا أو خيال علمي وطلعت فعلًا خيال علمي أقرب للواقع..

الرواية مليانة أحداث رائعة بألغاز مبهرة معرفتش أحل ولا واحد منها رغم قراءاتي الكتيرة اللي كنت بتوقع فيها حلول الألغاز صح!

أنا حتى الآن مش قادرة أخرج من حالة الانبهار بالعمل، ولا قادرة أتخطى شعور السعادة بإني لقيت رواية حلوة كده، ولازال ملازمني إحساس إني عايزة أقول طول الوقت "إيه الدماغ دي!"

السرد كان معيشني جوا الأحداث لدرجة إني مركزتش آخد اقتباسات من العمل من كتر الاندماج، والشيء الغريب إنه الىاوي المتكلم مكشفش ولا لغز، بل إنه توهني أكتر على عكس المتوقع، ودي من أكتر الحاجات اللي أبهرتني.

الحوار مكانش في جملة منه بحسها حشو أو رغي وملهاش لازمة..

الحبكة كانت متقنة، والفكرة كانت قوية..

الأحداث كانت تشويقية ممتعة من الدرجة الأولى، ومن أول مشهد الكاتب قدر يقحمني في تفاصيل العمل بكل سلاسة!

الشخصيات كانت كلها مؤثرة، حتى اللي ظهر مشهدين تلاتة، كنت طول الوقت بشك في الأشخاص الغلط وبثق في أشخاص تانيين مش عارفة إزاي وثقت فيهم!

الإسقاط اللي في الرواية، والأسلوب العلمي المتبع جواها، والمعلومات الطبية والنفسية اللي احتلت جزء كبير منها كلهم كانوا مدروسين بحرفية مبهرة!

حاجة كمان اتفاجئت بيها لما دخلت أشوف باقي أعمال الكاتب بعد ما خلصت العمل اللي بعض أحداثه كانت في مصر؛ الكاتب أردني!

ومن خلال اللي قرأته الكاتب يا عاش في مصر فترة، يا يعرف كويس حد مصري، وإلا مكانش أتقن المشاهد دي بالشكل ده!

مش عارفة أكتب كلام مرتب لأني لسة تحت تأثير العمل، ومرضتش أؤجل كتابة رأيي بعد ما أتجاوز ده لأني اتمنيت إن أي حد هيشوفه يرتبط بالعمل من قبل ما يقرأ حرف فيه ويبدأ في قراءته بشغف زيي كده♥!

#ريڤيو_بس_مش_ريڤيو.

#زينب_إسماعيل.

اول رواية اقرئها في حياتي فلم اقراء بهذا المجال من الكتب من قبل لكن هذه الروايه عظيمة ، لقد انتهيت منها بيوم واحد فقط من جمالها وسلاسة الأحداث وترابطها لقد جعلني الكاتب اتخيل تفاصيل القصة كأنها عمل سينمائي من شدة روعة الكتابة والاتقان احييه على هذا .

قصه رائعه حبكه تشويق الواحد حس بدأ يقرأ تاني

احسنت شكرا

بيكون شيء في قمة المتعة لما تقرأ عمل و يكون جميل كدا و احداثه بتسحبك واحدة واحدة و انت عايش معاها بدون ملل

المواصفات دي من وجة نظري طبعا توافق الرواية دي ♥️

بنبدأ احداث العمل بالدكتور نور اكبر دكتور نفسي في مصر.. قاعد في جلسة - له هو شخصياً - مع دكتور نفسي اخر ولكنه من اكبر الدكاترة في هذا المجال في البلد برده.

شيء غريب شوية ان اكبر دكتور علم نفس يروح جلسات لدكتور تاني.. ولكن دا الي حصل

و بتبدأ الجلسة و الدكتور الأخر بيقرر انه يعالج بطلنا نور بطريقة النوم المغناطيسي او شيئا من هذا القبيل، و بعد كدا بيحصل احداث غريبة و بنكتشف مفاجات مكنتش ع البال🤨🧐

من اكثر الجوانب الي هتساعد القارئ انه يستمر في قراءة العمل دا بدون ملل.. هو سلاسة طريقة السرد، دا حقيقي شيء واضح جدا في العمل بل ان الكاتب بيتميز انه قادر علي جذبك حتي لا تترك الكتاب من يدك إلا وقد أنتهيت منه👌😁

بالإضافة ان الاحداث ذات نفسها سريعة.. يعني بالرغم انه كتاب مش صغير نسبياً، الا ان اي قارئ هيخلصه بسرعة و يمكن في يوم واحد بس..

العمل يصنف خيال علمي في المقام الاول.. ولكن دا لا يمنع ان الغموض و الاكشن و المطاردات كان ليهم نصيب لا يستهان به..

جماعة الكتاب متقسم ٣ فصول.. كل فصل هو رحلة كاملة متكاملة من المتعة و التشويق والاثارة

علي رأي اسم الكتاب اصلا هي ((رحلات إلي عوالم خفية)) و دا حقيقي 😊

الوصف ويمكن هنا يكمن بعض عيوب العمل.. كان غير كافي

هو كان موجود مش منعدم ولكنه غير كافي علي الاقل بالنسبة ليا.. يعني كنت اتمني التعمق اكثر في وصف الأماكن الطبيعية و الخارقة الي كنا فيها دا كان هيعمل معايشة اكتر من كدا

نفس الكلام مشاهد المطاردات و المعارك وما إلي ذلك.. كانت محتاجة بس بذل جهد اكتر و كانت هتبقي في حتة تاني.. و بالرغم من كدا استمتعت بيهم♥️

و برده عدم الجراءة في المشاهد الد.موية زعلني.. عارف ان في ناس كتير مش بتحب دا لكني انا بحبه بصراحة 😅😅😅

الشخصيات ♥️ كانت جميلة جدا.. اتعلقت بيهم.. و الكاتب عمل تقنية حلوة جدا في طريقة تقديم كل شخصية بأنها تبقي من منظور الشخص الاول (علي لسان الشخصية يعني ) يمكن كل شخصية كان لها بناء تاريخي جيد و كافي عشان تتعلق بها و احب اشيد جدااااااا بغابرييل😓

يعني انا اصلا حبيته جدا بس الشخصية دي بالذات لو قلت كلمة عنها ممكن احر.ق..

و طبعا البطل دكتور نور برده كانت جميلة جدا.

نهاية العمل عجبتني و كان في كذا بلوت تويست

حلويين من قبل النهاية كمان دا يمكن البداية فيها بلوت تويست😅😅

الخلاصة.. عمل حلو جداا يا معشر القراء♥️👌

جرعة كويسة من التشويق والإثارة و الغموض..♥️♥️♥️

و بأذن الله أبدا في سلسلة غموض علمي لنفس الكاتب حـمـزة فـهـد و متاكد من جودتها..

رواية أكثر من رائعة

يأخذك الكتاب في رحلة مليئة بالتشويق والاثارة

انا انهيت قرأتها بأقل من يوم

رواية خفيفه وممتعه، كتبت بأسلوب سلس ومبسط حيث نعيش معه في عالم ملئ بالصراعات الجاسوسية للسيطره على نوع خطير من البكتيريا قد يودي البشر جميعاً.. لكن رغم كل شئ فإن الإنسانية تنتصر في النهابة.

رواية مثيرة ومشوقة تشد القارئ وتجعله يلهث وراء أحداثها، أسلوب السرد والحوار جميل وسلس جدا، أنا فكرة الرواية فمستقاة من موضوعات أدب الخيال العلمي

قصة جدًا جميلها وداخل طياتها الكثير من العبر ، واول هذه العبر : علو الهمة يصل بك الى القمة. شكرًا للأستاذ حمزة على هذا الكتاب الرائع.

كتاب رائع جدًا استمتعت بكل لحظة فيه