📖أنصاف مُرة

للكاتبة: أمل العشماوي Amel Elashmawy

دار النشر: المحرر للنشر والتوزيع

تاريخ النشر: 2026

عدد الصفحات: 305

التقييم ⭐⭐⭐⭐

قربان البركة العرجاء

(ست وسابعهن القربان)

رواية أنصاف مرة مش مجرد سرد لحكايات متفرقة..ومش بس حكاية فردية عن الألم... دي لوحة كاملة لست نساء، كل واحدة فيهم شايلة وجعها بطريقتها كانت بتجري طول عمرها ورا نفس الحاجة: سند.. أمان... حد يحميها، سواء كان أب، زوج، حبيب، أو حتى وهم.

لكن المفارقة إنهم كلهم، رغم السعي ده، عاشوا ناقصين.. عاشوا “أنصاف”.

من البداية الرواية بتحطنا قدام انقسام واضح: وسام وحبيبة.

جسدين قريبين لكن روحين في اتجاهين عكس بعض.

وسام بتمثل محاولة التكيّف مع العالم بأي تمن حتى لو هتغيّر نفسها عشان ترضي الآخرين.

أما حبيبة، فبتاخد طريق أخطر بكتير: الانسحاب… لحد ما توصل لرغبة مرعبة في الاختفاء في إنها تبقى لا مرئية أو حتى شيء بلا إحساس عشان تهرب من وجع مش قادرة تتحمله فبتغرق جوا نفسها.

ومش بعيد عنهم، بتيجي حكاية هبة نموذج صريح للقهر الاجتماعي

بنت اتحرمت من حبها، واتجبرت تعيش حياة مش بتاعتها، باسم الواجب والوصية فبقت عايشة جسد بيؤدي دور الزوجة والأم لكن روحها معلقة في مكان تاني عند حب ما اكتملش

ومع تطور الأحداث، حبيبة نفسها بتتحول لرمز غريب تظهر في شكلها الأكثر قسوة“حبيبة المبروكة”

ونلاقي نفسنا قدام نساء بيجولها من كل حتة، شايلين وجعهم وجراحهم وأحلامهم المؤجلة:

واحدة محرومة من الخلفة.

واحدة مكسورة من جواز ظالم.

واحدة فقدت حبها.

واحدة بتجري ورا لقمة العيش.

واحدة مستنية فرصة.

واحدة عايزة تهرب من واقع خانق

ست نساء، ست حكايات، لكن الألم واحد

كل واحدة فيهم كانت فاكرة إن السند هيكملها، إن الأمان هيشفيها

كل واحدة فيهم عايشة بنص قلب، نص روح، نص حياة

نصف بيحلم، ونصف اتعلم يقبل بالوجع كأنه قدر

لكن الحقيقة إنهم اتربّوا على إنهم يدوروا برّه نفسهم، ففضلوا ناقصين جواهم.

لكن الاكثر قسوة ان حبيبة المبروكة الكل بيجري لها، بيحكي، بيطلب، بيتمسك فيها كأنها معجزة

رغم إنها نفسها تايهة، غايبة، ومش قادرة تنقذ حتى نفسها

هم مستنيين معجزة وهي نفسها محتاجة نجاة.

المشهد ده بيختصر كل حاجة:

نساء بتصرخ من جوّه،

ومجتمع ما بيسمعش،

فيتحوّل الأمل من حق طبيعي لوهم

“أنصاف مرة” مش عن ستات ضعيفة

دي عن ستات اتكسرت وهم بيدوروا على الأمان في المكان الغلط وعن كل امرأة اتربت على إنها تستحمل، تتنازل، وتدور على الأمان برّه نفسها. و إن المجتمع ممكن يكسر الإنسان لدرجة يخليه يدور على وهم بدل الحقيقة، وعلى معجزة بدل حق بسيط المفروض يكون متاح

وفي النهاية

لا السند جا،

ولا الأمان اكتمل،

ولا هم بقوا كاملين.

فضلوا دايما بين الرغبة في النجاة، والعجز عن الوصول.

📖الحبكة

الحبكة مش تقليدية ومش مبنية على أحداث سريعة أو مفاجات صاخبة بالعكس هي حبكة نفسية تقيلة بتتسلل بهدوء لحد ما تلاقي نفسك غرقان جوه الشخصيات من غير ما تاخدي بالك.

الأحداث بتمشي ببطء محسوب لكن كل مشهد بيضيف طبقة جديدة من الألم وكل حكاية بتتفتح جوه التانية لحد ما يتكون قدامك عالم كامل من المعاناة المتراكمة.

الرواية مأساوية جدا مش بس في اللي بيحصل لكن في الإحساس اللي بتسيبه جواك مفيش مبالغة ولا دراما مفتعلة الوجع هنا صادق لدرجة إنه تقيل تقيل يخليك تقفي مع كل شخصية وتحسي إنها حقيقية وإن اللي بيحصل لها ممكن يحصل لأي حد.

قوة الحبكة إنها مش بتقدم حلول ولا نهايات مريحة لكنها بتواجهك بالحقيقة زي ما هي إن بعض الحكايات ما بتكتملش،

وإن في ناس بتعيش عمرها كله تحاول تلم نفسها ومابتعرفش

دي رواية مش بتتقرأ عشان تتسلي

دي رواية بتتقرأ عشان تتوجع وتفهم.

📖الحوار والسرد

الحوار قليل نسبيا لكنه مؤثر جدا كل جملة حوار بتحمل معنى أكبر من كلماتها وغالبا بييجي بسيط ومباشر لكنه مليان وجع وسكوت بين السطور في لحظات كتير الصمت نفسه بيكون أقوى من الكلام وده واضح في مشاهد زي جلوس النساء مع حبيبة كلام كتير بيتقال لكن الرد الحقيقي غايب

السرد هو واحد من أهم عناصر قوة الرواية أسلوب الكاتبة شاعري جدا مليان صور وتشبيهات بتخلي المشاهد تتحس أكتر ما تتشاف بتوصف المشاعر بطريقة هادية لكن عميقة لدرجة إنك ممكن تقفي عند جملة واحدة وتحسي بثقلها كأنها بتتقال جواكي إنت السرد مش بيجري هو بيتمهل وده اللي بيدي مساحة لكل إحساس يظهر ويتراكم لحد ما يوصلك بشكل كامل.

📖الشخصيات

الشخصيات هنا مش أبطال رواية دي أرواح متعبة كل واحدة فيهم بتحاول تعيش وهي ناقصة حتة منها

الشخصيات مش مرسومة بشكل مثالي ولا تقليدي بالعكس كلها شخصيات حقيقية جدا مليانة تناقضات وضعف وخوف

وسام بالنسبة لي كانت نموذج لناس كتير بنشوفهم كل يوم برغم اختلاف حالتها بس بتحاول تتكيف مع العالم بأي شكل حتى لو ده هييجي على حساب نفسها كانت مؤلمة لأنها واعية بنقصها واختلاف هوايتها كانت مشتته لكن اختارت تعالج نقصها من بره من نظرة الناس ليها لكنها قدرت تواجه انه ليس من اختيارها مثل ياسين ولكنه واقع كان مفروض عليها

أما حبيبة فهي أكتر شخصية مؤثرة مش مجرد بنت حزينة دي حالة كاملة من الانسحاب التدريجي من الحياة كل تفكيرها كان بيوديها خطوة أبعد عن الواقع لحد ما بقت أقرب لفكرة أو رمز أكتر من كونها إنسانة شخصيتها مرعبة ومؤلمة في نفس الوقت لأنها بتجسد أقصى درجات الهروب و بسبب بقطة واحدة بعيدة في السماء تحولت حياتها

وهبة كانت صادمة بطريقتها لأنها بتمثل القهر الواضح والصريح حياتها اتسحبت منها واتفرض عليها دور تعيشه فبقت عايشة بجسدها بس لكن روحها في مكان تاني حسيتها مثال لإنسانة اتكسرت من غير ما حد يحاول يصلحها واول من كسرها اقرب الناس اللي من المغترض انهم مصدر الأمان

وباقي الشخصيات النسائية رغم اختلاف حكاياتهم حسيت إنهم نسخة من بعض في الألم كل واحدة عندها شكل مختلف من المعاناة لكن في النهاية كلهم بيدوروا على نفس الحاجة الأمان والاكتمال.

اما الشخصيات من الرجال ف كلهم مصطفي ابو حجر 🫣😂

📖رأيي

أكتر حاجة لمستني فيها إنها صادقة جدا الوجع فيها حقيقي والشخصيات شبه ناس بنشوفهم كل يوم أو يمكن جوانا إحنا حسيت إن كل واحدة فيهم بتمثل جزء مكسور فينا بشكل أو بآخر

يمكن مش رواية مريحة ومش كل الناس هتحب ثقلها لكن ده سر قوتها لأنها ما بتحاولش تزين الواقع ولا تدي حلول سهلة بالعكس بتواجهك بحقيقة إن في حكايات بتفضل ناقصة وفي ناس بتعيش عمرها كله تدور على حاجة تكملها ومابتلاقيهاش.

الرواية خلتني أحس إن “الاكتمال” مش دايما متاح وإن في ناس كتير حوالينا عايشين بس بنص روح من غير ما حد ياخد باله 💔

📖اقتباسات

📌❞ الحبُّ، تلك الكلمة الصغيرة التي تختلف معانيها باختلاف ثقافات المحيطين بالعاشقين.

‫ هناك من يراه نعمة، حالة نادرة يُباحُ فيها الجنون ويُحتفَى بالتمرُّد، وهناك من يراه رِجسًا يجب وأدُه في المهد، قبل أن يكبر ويصير فضيحة، كضوءٍ شاذٍّ يجرح عتمتهم المحبَّبة. وهناك من يدعه ينمو، يسقيه، يتركه يزهر، ثمَّ حين يبلغ ذروة بهائه، يقطفه أو يبتره، لأنَّ جماله بات يُؤذي أعين الناظرين. ❝

‏

📌❞ آهٍ من اشتياق امرأةٍ عاجزةٍ عن البوح به، اشتياق تحمله في صدرها، وتدفنُه في أعماقها، وتُخبِّئه في زوايا روحها، لئلَّا يراه أحدٌ فيُصادِره منها كما صادروا حقَّها في الحبِّ ذات زمن. ❝

‏

📌❞ ففي حضرة الابتلاء الشديد، يصير الإنسان أسيرًا للكلمات؛ كلمةٌ تمنحه كل طمأنينة العالم، وأخرى تسحقه حتى يتمنى لو لم يولد. ❝

‏

📌❞ أن البشر ما جاؤوا إلى هذه الدنيا إلا ليشهدوا انتزاع أغلى ما تعلَّقت به قلوبهم، ويُسلب منهم أحبَّتهم على حين غرَّة، فيعيشون أحياءً في أجسادٍ منخورة. ❝

‏

📌❞ فكيف للمظلوم أن يغفر لمن ظلمه؟ وهل يعقل أن يقف القتيل في لحظة الحساب، فيربت على كتف قاتله ويمنحه الغفران بعد أن حرمه من لذة الدنيا؟ ❝

‏#مسابقة_ريفيوهات_أنصاف_مُرة

#مراجعة_رواية_أنصاف_مُرة

#اقتباسات_رواية_أنصاف_مُرة

#أبجد

#أنصاف_مرة

#أمل_العشماوي