‏#مسابقة_ريفيوهات_الذين_عرفوا_أنهم_غرباء

▪︎ اسم الرواية: الذين عرفوا أنهم غرباء

▪︎اسم الكاتب : بهاء عبد المجيد - إيمان الدواخلي

▪︎عدد الصفحات : ٢٥٠ على أبجد

▪︎اسم دار النشر : منشورات إبييدي -ibiidi Publishing

الرواية دي أخدتني من أول صفحة وحطّتني وسط عالم

مليان وجع وحنين وغربة. الغربة هنا مش بس إنك تسيب بلدك وتروح بلد تانية، الغربة كانت جوا القلب قبل ما تكون في الأرض.

▪︎الأبطال مختلفين جدًا:

○ديفيد اليهودي اللي هرب من جحيم النازية وجاء مصر يبحث على حياة جديدة.

○الشيخ عبد الحميد اللي ساب قريته ومراته عشان يلاقي نفسه في القاهرة.

○ياسين العراقي اللي مخبي هويته الشيعية وجوا قلبه حب كبير لمريم الفلسطينية.

○مجدي المسيحي اللي عايش في عزلة، لا هو لاقي مكانه في فرنسا اللي بيعشقها، ولا في مصر اللي هو منها.

▪︎اللي عجبني إن الرواية مشيت بين الشخصيات كأنهم خيوط متشابكة، كل واحد شايل همه وغربته، بس برغم اختلاف ديانتهم وجنسياتهم، لقوا في بعض صحبة تخفف عنهم. مصر كانت الحضن اللي جمعهم، حتى وهي مليانة صخب وأجناس وثقافات.

▪︎اللغة كانت بسيطة وسلسة، والوصف للأماكن خلاني أتخيل الإسكندرية وحارة اليهود والقاهرة وقتها كأني ماشي في شوارعها.

▪︎ محستش ان في اثنين كتبوا العمل بالعكس كان ماشي على نفس الوتيرة ونفس الأحاسيس النص بالنسبالي كان متقن كان كاتبه شخص واحد ووصلي معانيه ..

▪︎السلبيات:

○في بعض الفصول حسيت إن السرد بيتنقل بسرعة من شخصية للتانية من غير تمهيد كفاية، وده يخلّي القارئ يتشتت.

○في شخصيات كانت قوية جدًا زي ياسين ومريم، لكن في شخصيات تانية حسيت إنها ما أخدتش حقها في العمق.

○النهاية كان ممكن تبقى أقوى شوية، لأن الأحداث الكبيرة اللي اتبنت طول الرواية خلّتني متوقع لحظات أعمق وكماله لحدوته اخو الشيخ اللي اتسابت مفتوحه ..

○معجبنيش أبداً مشهد احتلام الشيخ عبد الحميد وهو

ازهري فالمسجد !!! وخروجه من الصلاة عشان تفكيره في ست ونسيانه للقرآن ، كان مش منطقي ومستفز صراحة ، وكمان نزوات ديفيد المتعدده اللي مش بتخلص ..

لكن برغم ده، الرواية قدرت تسيب بصمة وتخليني أفكر كتير في معنى الغربة والوطن..