#مسابقات_ابجد

🍁التقييم 🌟🌟🌟🌟🌟

الغلاف

الغلاف اكتر من رائع متوافق تماما مع العنوان حائط الذكريات خاصة مع صورة كاميرا كوداك اللي كانت العشق لناس كتير

🍁نقاط القوة

✅عدد الصفحات مناسب

✅ عدد الصور أكثر

✅ الهوامش مناسبة ومفيدة

✅ الغلاف مناسب للمحتوي جدا

✅الكتابة بشكل حميمي وعائلي وليس لمجرد الكتابة

🍁🍁🍁

انا مش اول مرة اقرأ ادب رحلات عن اليابان لكن دي اول مرة استمتع بالقراءة عن اليابان

كنت بسمع دائما عبارة المارد الياباني والكتاب هنا وضح المعني بابسط صورة

ناس كتير معتقدة أن اليابان مكانتش متطورة قبل الحرب العالمية وتدمير اليابان وان عبارة المارد الياباني عشان تطورهم بعد الحرب وميعرفوش تاريخ اليابان اللي كان بعد كل واقعة بيقدر يقوم تاني زي المارد او زي العنقاء من رمادها

في الجزء ده مش بتمارس نهي عودة هواية الكتابة اد ما كانت بتمارس استعادة الذكريات في رحلة كأنها للماضي، رحلة حنين لأيام الطفولة الهانئة

بدأت الكاتبة رحلتها من استراليا إلي طوكيو بساعات طويلة لكنها مرت عليها سريعا لقصائها في النوم 😅

أول ما جذب انتباهي عدم استخدام اللغة الإنجليزية علي اللافتات الإرشادية أو واجهات المحال التجارية واستخدام اليابانية فقط لإعتزازهم بلغتهم اليابانية ولكن أعتقد أن ده ممكن يسبب بعض الصعوبات للسائحين

عجبني ف الجزء ده تقسيم الكتاب ل حوائط كل حائط عن شخص والصور أو الذكريات المتعلقة بيه مع تداخل ذكرياتها هي نفسها، بالرغم من أنه الجزء المتعلق برفيق الدرب كان صغير للغاية لكن الكلام فيه كان مؤثر

🍁الكاتبة كعادتها تدور بنا في المكان والزمان، الحاضر والماضي فقٔ وده واضحت لنا تاريخ الحروب وتوحيد اليابان واكثر ما استمتعت بقراءته هو تاريخ قلعة اوساكا

1️⃣في الحائط الأول تحدثت الكاتبة عن النظام والسرعة في المطار واكتشاف جراج عملاق للدراجات ثم الفندق ذا المراحيض الذكية اللي عجبتني بصراحة 😁 واستغربت جدا أن اليابان كان فيها حمامات بلدي زي عندنا😅

ولفت نظري الإطلالة اللي ف الفندق شبيه برج ايفل

2️⃣ الحائط التاني استمتعت مع نهي والعائلة بزيارة برج طوكيو الذي يشبه من بعيد برج ايفل لكنه عكسه لانه اطول منه بثلاثة أمتار ويتميز بلونه الجذاب الرومانسي +أنه اطول برج فولاذي مدعوم ذاتياً في العالم إلي أن تجاوزه برج سكاي تري عام 2012م سكاي تري زي برج القاهرة عندنا كدة مش ف الشكل لأ ف الأهمية والمشاعر الإنسانية استمتعت بقصة الكرة الغامضة داخل عمود البث الهوائي ف البرج وقتها جه ف بالي أنه لو الكرة دي عندنا كان قالو اية بتوع الكورة 😁 دي كورة شاطها كابتن فلان لا اللي شاطها كابتن فلان ف كأس العالم 🤣 كانت هتبقي مجززززرة بين فريقين

اكتر ما لفت نظري مش بس عدد الملاعب الرياضية والحدائق العامة والمساحات الخضراء لأ هو ناطحات السحاب لأن الصورة المصدرة لينا عن اليابان من زمان جدا أن المباني مش ليتجاوز ارتفاعها عن الطابقين وده بسبب الزلازل واكتشفت أنه طوكيو بتحتل المركز الثامن عالميا في عدد ناطحات السحاب وأنها من طليعة المدن اللي

بدأت في بناءها!!!

🤡 مكانش جديد عليا أنه اليابان بلد الأنمي لكن معرفش الذاكرة بتاعتي معرفتش ان كابتن ماجد ياباني🙄كابتن ماجد اللي عشنا معاه احلي طفولة والهدف اللي كان بيحب ف خمس حلقات والزحلقة والقفزة😍 وحبيت كرة القدم بسببه بس لما عرفت حقيقة كرة القدم كررررهتها واتجهت لحب التنس ومسابقات رولان جاروس و

واخر حاجة قرأتها عن اليابان كانت سلسلة جن الحافي اللي بتتكلم عن قنبلة هيروشيما وناجازاكي وجابت لي اكتئاب 🥹

عجبني تمسك الشعب الياباني بعاداته وديانته ومعابده

عجبتني المكتبة السرية جدا 💜 حتي لو كانت مجرد ورق حائط أو مكتبة ثلاثية الأبعاد

وبالرغم من اني بخاف شوية من موضوع الروبوت وعندي فوبيا من أنه ف يوم الروبوتات ممكن تتغلب ع الإنسان لكن حبيت فلفل جدا 💜 ياريتني كنت خديجة عشان يهتم بيا كدة🫣

عرفت بيل جيتس الياباني وان في أشخاص قصص نجاحهم ملهمة

النافذة الأرضية وصورة الاقدام من الاعلي خوفتني عشان خوفي من الأماكن المرتفعة

فسيفساء برج طوكيو 😍 لا لا لا مفيش كلام يقال ع الجمال مع شخص بيقدرالفن والجمال خصوصا انها من مجموعة صور

🍁 وادي القيقب وجماله وكل ما يتعلق به وخصوصا مع شخص بيحب الطبيعة والأشجار وكنت بتمني الحصول علي لعبة الحديقة المستوحاة من الحدائق اليابانية كاريسانسوي

لفت نظري أن الشعب الياباني مهتم بالأساطير زي الشعب المصري وده واضح في المعابد والرسومات والقصص المتداولة كمان البخور في المعابد

الجرس العملاق أو الجرس العتيق معرفش اية فكرني بقصة احدب نوتردام

🚥اشارات المرور وأزرار المشاة في اليابان قرأت عنها ف كتاب رحلات قبل كدة وكانت عجباني جدا خصوصا اني شخص بنسي أبص ف إشارة المرور وياخد شتييييمة كتير سواء من اصحابي اللي ماشين معايا أو من العربيات ف الطريق و السواقين اللي بيقولي نبوس ايدك بصي ف الإشارة الأول 😅🫣لو الإشارات دي ف مصر هتحل مشاكل ناس كتير خصوصا ضعاف السمع والبصر

عجبني أن سرعة السيارات لا تتعدي 60ك/ي وعجبتني ماريو كارت

🍁لمسة الجنون ف اليابان كانت ف المراحيض العامة العامة🙄 اللي مستحيل نفكرو نجربوها😅

🍁 مهرجان ناكي سومو عن رياضة السومو القتالية واللي فيها معلومات انا مكنتش اعرفها عن السومو ولا عن المهرجان لكن كنت دائما استغرب حجم الأشخاص ف الرياضة دي 🫣 كمان أن أكثر أو اطول طفل يبكي دي 🙄هو احنا ناقصين وجع دماغ 🙄 ده انا لما ابن اخويا بعيط جنبي بسيب لهم البيت وامشي 🥹

3️⃣ الحائط الثالث

كان بداية الجزء ده مع قطار الطلقة اللي قرأت عنه بالفعل لكن وجدت معلومات جديدة اضفتها الكاتبة لمعلوماتي من البوابات وفحص التذاكر وطاقم القطار

🍁الشعب الياباني مش بس منظم ومتطور لأ ده كمان شعب ببعشق النظافة وده شيء انا بعشقه تخيلوا لو الشعوب كلها كدة اكيد مش هيبقي في عندنا تلوث ولا امراض وهنبقي عايشين مرتاحين ومبسوطين، وطبعا شوفت الصورة اللي الطلاب هما اللي بينضفوا الفصول والمدرسة وكنت مقطورة م العياط وبقول يارب نبقي كدة احنا كمان ف مدارسنا

🍁انبسطت جدا من زيارة الفندق ذاتي الخدمة ومغامرة ترك الحقائب ومتحف أوساكا التاريخي بشكله المميز ثم زيارة قلعة اوساكا وتاريخها المميز ثم متحف كايودو ومتجره الخاص بالكثير من الشخصيات الافلام مثل جودزيلا وكينج كونج والكوميكس الجوكر وباتمان وكان وومن وغيرها وعجبني ان خديجة بتحب تجرب كل حاجة -البنت دي بتفكرني بنفسي وانا صغيرة – وعجبني ان كل أسرة من الأسر اللي حكمت اليابان كان لها رمز من الأشجار ولكن ورقة شجرة الباولونيا مقدسة في تاريخ اليابان حتي أنها أصبحت شعار مكتب رئيس الوزراء وعلي العملة فئة 500ين

🍁استغربت وجود غرفة الشاي الذهبية والتاتامي لسة موجود في اليابان وأنهم لسة محافظين علي عادات وتقاليد كجوهر للثقافة اليابانية

🍁في الجزء لفت نظري المتاجر المطاعم وشكلها المميز بالشخصيات الخيالية أو السلطعون أو الاخطبوط أو المدير الغاضب واللي تعتبر دعاية مجانية وعامل جذب مهم

4️⃣الحائط الرابع

يونيفرسال ستوديو ورحلة الأحلام وماريو والافعوانيات اللي شرحت لنا تاريخها وبداياتها في اليابان ثم الحديقة الجوراسية والليمون فيها معلومات كتير عن الديناصورات وياللصدفة كنت قبل فترة قليلة قرأت عدد من ناشيونال جيوغرافيك عن الديناصورات وكنت عارفة اغلب المعلومات ولكن استمتعت تاني 😍 بعدها كان عالم من الفوضي مع المينيونز🤣ولوحة انشتاين بصراحة الجزء ده كان في منتهي الفرفشة والضحك😍لغاية ما وصلنا ل هالو كيتي وانا مكنتش اعرف حاجة عن هالو كيتي بس كنت ولازلت بعشقها وعندي واحدة بموت فيها بس مخبياها في دهاليز دولابي عشان ولاد اخواتي طمعانين فيها 😅 حكاية كيتي حزينة وجميلة وانا مش قادرة اتخطاها حتي لو جه بعدها ماريو والأميرة علي الشرفة والفك المفترس

🕌عجبني جدا في الجزء ده أن الكاتبة تناولت تاريخ الاسلام في اليابان ووصف جامع طوكيو الكبير الذي يشبه جوامع اسطنبول ومع تتبع تاريخه عرفنا ليه هو شبه مساجد اسطنبول وأنه مش مسجد وبس لأ ده مركز الدعوة ومنارة للثقافة والتعليم وايضا متجر للأطعمة الحلال

🍁🥹 في الجزء ده انا خوفت من صورة تقاطع شيبويا 🥺الزحمة تخوف يا جماعة انا مستغربة نهي والاولاد ازاي متاهوش من بعض ف الزحمة دي 🫣 بس كفاية أن نهي تاهت منهم مرة في القطر🤣

🍁🕌 نهي والأسرة قابلوا مسلمين واتعرفوا عليهم وساعدوهم وساندوا بعض وأكثر موقف اثر في خطبة الجمعة عن فلسطي.ين وبكاء الفتاة ، والمواطن الذي رفع علم فلسط.ين

5️⃣ الحائط الأخير

برغم أنه مجرد صفحتين بس حسيت أن نهي بتقول فيهم أنه زوجها هو الملاز والأمان وأنه وطن ومهما تسافر وتبعد بترجع له تاني 😍

في الكتاب جبل فوجي كان حاضر بقوة زي ما يكون بيقول انا شاهد ع تاريخ حتي ولو كان قاسي ودموي لكن قدرت اني اتخطي كل الصعاب وابقي أقوي وأقوي

🍁🍁🍁 الحقيقة أنا حبيت الكتاب ده اكتر من اللي قبله وحسيت بيه مختلف ونهي عاملة مجهود رائع ومميز والصور اكتر من رائعة ويا سلام لو الصور بالالوان كلمت هتبقي اجمل لكن اعتقد كان هيبقي الكتاب اكيد اغلب🥹+ اسلوب نهي ف الكتاب ده كانت مش بتكتب بقلم لأ كانت بتكتب بقلبها وعواطفها مع اجترار ذكريات الطفولة عشان كدة الكتاب كان مختلف وحميمي 💜

شكرا لنهي ع الكتاب الجميل ده 💜💜😍