أطلق الحكم صافرة نهاية المباراة ليعلن بذلك عن فوز الفريق العربي ببطولة كأس العالم أمام نظيره الأمريكي..

رواية الحي العربي

للكاتب/ دكتور أسامة علام

عدد الصفحات/ ٢٩٢

عن دار الشروق للنشر والتوزيع

****

أطلق الحكم صافرة نهاية المباراة ليعلن بذلك عن فوز الفريق العربي ببطولة كأس العالم أمام نظيره الأمريكي..

للمرة الأولى في التاريخ فريق عربي يحمل الكأس

كان الجميع يتسائل دوماً هل يحدث يوماً وننال هذا التتويج التاريخي؟ في كل مرة تنال الفرق العربية الفرصة وفي كل مرة لا نرى إلا ضياعها، لكن الآن اختلف الأمر، لقد ارتشفنا حلاوة الفرصة لآخر قطرة وها نحن أمام احتفال هستيري، لم يدرك أطرافه أنه سيغير مجرى حياتهم وخريطة العالم وربما مجرى التاريخ!

*******

فرنسا.. مونتريال.. الحي العربي الذي يضم هؤلاء من يبحثون عن فرصة أخرى جديدة في تلك الأرض بعيداً عن مهدهم وأوطناهم، جمعاً في بدايات جديدة ربما تحمل لهم اقداراً مختلفة وحياة أفضل..

لكن هل كل من منحه القدر فرصة أخرى سيحسن استغلالها؟ هل الجميع يمكنه في نهاية المطاف أن يتوج بطلاً لقصته ويحمل كأس انتصاره في طريقه وهدفه؟

بين أجواء احتفالات أبناء الحي العربي ستصلك الإجابة

على يد رحمن، زينب، نرجس، ياسين، وديع، حسان وكل من وهبه القدر فرصة جديدة ..

*******

رواية الحي العربي، بقلم أسامة علام بنشوف حكاية جديدة، بيحكي فيها عن ليلة بيتغير فيها حياة أهل الحي العربي، بقعة الأرض البسيطة اللي بتضم مهاجرين أغلبهم عرب، اللي فجأة ليتحول احتفالهم بفوزهم الأول في كأس العالم لكرة القدم، لحدث سياسي ضخم بيحول الحي العربي من أرض فرنسية لدولة عربية جديدة بقوانين وحدود وأشخاص فجأة بيلاقوا نفسهم وجها لوجه مع مسؤوليات جديدة وحياة مختلفة بتديهم فرصة تانية يا يستغلوها للأفضل وتخرج منهم الابداع والمسؤولية زي رحمن زعبوط الرأسمالي اللي كل همه نزواته ومقهاه بس فجأة يبقى رئيس دولة فيتحول لشخص مبدع حالم قادر أنه يبني للي حواليه اللي عجز عن بناءه لنفسه وأسرته، ونرجس ووديع وحسان اللي كل واحد منهم تايه في دنياه ضاع منه هدفه وانطفى النور في قلبه لكن تيجي الدولة الجديدة ولقائهم ببعض عشان يديهم فرصة تانية تخليهم رمز للمحبة والفن وتخليد كل ما هو قيم ومستمر..

مروراً بياسين وسناء اللي فرصتهم التانية ضاعت بكامل إرادتهم عشان حد يقرر بس يمشي والتاني يبقى مسخ مشوه وصمة لنفسه وللي حواليه..

وأخيراً وقود العمل، الشخصية اللي لمحات ظهورها بسيطة لكنها كانت القائد الحقيقي للجميع حتى وهي جثة لا اكتر ولا أقل الأم.. زينب..

****

الكاتب اهتم برسم الشخصيات بشيء كبير من الحياد، مفيش ابيض واسود، لا خير مطلق ولا شر مطلق، المنطقة الرمادية، الإنسان اللي عنده الشر والمجون، وعنده المحبة والرحمة والمباديء.. اللي مارس شروره ونزواته، لكن لما قدمله القدر فرصة جديدة كشف برضه عن جانب الخير والأمل والرغبة في ان بكرة يكون أفضل ليه وللجميع..

الحي العربي، الدولة الوليدة اللي قدمت للعالم نموذج حي عن الإرادة والرغبة في إثبات الوجود حتى وهي بتخبط وتغلط وتحرق لكن في النهاية وصلت للبناء والوجود الحقيقي..

*****

الشخصيات اللي صعب تقول أنا فلان فيها، لكن في كل حد منهم في حاجة هتكون جواك، حلم ضاع أو حلم بتسعى ليه، ذنب بتتخلص منه، أو ذنب مسيطر عليك..

رغبة في الوجود لكن وجود حقيقي جميل

أو الوجود وخلاص حتى لو على جثث العباد..

إنسان زيك زيهم وقاعد بتقرر طريقك ومصيرك وبتشوف فرصتك اللي ممكن تكون طريق جديد يغيرك..

ويفضل اكتر المشاهد اللي هتفضل محفورة في بالي، رغم أنه متوزع يعتبر على كل العمل، مشهد موت زينب اللي هو وقود العمل وشرارة البداية، وانتظاري طول الوقت اعرف راحت فين ومستنية دفنها بما يليق، عشان تتعلم منها أنه مش كل حي هو إنسان على قيد الحياة

ولا كل ميت هو إنسان مات وغاب أثره

لكن على العكس

إنسان حي بيتحرك لكنه ميت في نظره ونظر اللي حواليه

وإنسان مين لكنه لسه مصدر أمل وحياة لكل اللي حواليه..

رحلة جديدة جميلة وطرح جريء من الكاتب الدكتور أسامة علام، عجبتني جداً جداً وفاجأني بأن قلمه متنوع وقادر يبحر في أفكار مختلفة بمنتهى السلاسة وكل مرة بنفس القدر من الجمال..

بالتوفيق دائما يا رب

#نور

#عالم_اسامة_علام_الروائي_في_الفنجان

#مسابقات_فنجان_قهوة_وكتاب