إيه اللي ممكن يجمع بين أشخاص ما بينهمش أي علاقة… غير إن كل واحد فيهم مخبي جانب مظلم محدش يعرفه؟

حافلة تسع الشياطين

للكاتبة لبنى حمادة

الصادرة عن دار سين للنشر والتوزيع

عدد الصفحات: 261 صفحة

الرواية بتدور حول مجموعة من الأشخاص بيظهرلهم فجأة مكان غامض يجمعهم في رحلة إلى سانت كاترين، وكل واحد فيهم شايل جواه سر أسود أو ذنب بيحاول يهرب منه.

ومع الوقت بنبدأ نتعرف على الشخصيات واحدة واحدة، وكل فصل بيكشف جانب مختلف من حياتهم وأفكارهم، لحد ما نكتشف إن كل الطرق بتتقاطع عند طفلة صغيرة اسمها شروق، وإن وجودهم في الحافلة مش صدفة أبدًا…

وسط أجواء نفسية مرعبة وأحداث مليانة توتر، الرواية بتطرح أسئلة عن الشر، والذنب، وهل الإنسان ممكن فعلًا يتغير لو أُتيحت له فرصة تانية؟

رأيي

فكرة الرواية كانت مختلفة جدًا وجذبتني من البداية، خصوصًا طريقة ربط الشخصيات ببعض تدريجيًا، وكل شخصية كان وراها حكاية صادمة بشكل أو بآخر. الكاتبة ناقشت مواضيع حساسة ومظلمة جدًا، وده خلى الرواية تقيلة نفسيًا في أوقات كثيرة.

أكتر حاجة عجبتني كانت الغموض ومعرفة إيه الرابط الحقيقي بين كل الشخصيات، والنهاية كانت مفتوحة بشكل يخلي كل قارئ يفسرها بطريقته.

لكن بصراحة الرواية +18، والألفاظ الموجودة فيها كانت مزعجة جدًا بالنسبالي وكنت شايفة إنها زيادة ومش مناسبة إنها تكون مكتوبة بالشكل ده داخل الرواية، لأن الفكرة نفسها قوية ومميزة فعلًا وكانت تقدر توصل نفس الرسائل من غير استخدام الألفاظ دي. عشان كده استمتعت بالفكرة والأحداث، لكن أسلوب الألفاظ خلاني ما أرتاحش للرواية بشكل كامل.

#مسابقة_أبجد_وسين