لو حبيت أسّمي قراءة الرواية دي هيبقي اسمها قراءة بالصدفة لأني بعد ما شوفت reel بيتكلم عنها ، لقيتها اتوفرت علي أبجد فقولت ليه لأ ، اشوف الرواية دي بتقول ايه
⚠️تحذير بحرق للاحداث
رواية حديقة الحيوان البشرية
رواية حلوة و لكن ...
و هنا لكن مش عشان الجرأة لأني في سن كبير كفاية يخليني أقدر أقرأ النوعية دي من الأعمال ، لكن هنا أنا في رأيي الشخصي الرواية كان ممكن تكون أفضل في تنفيذ أجزاء منها ، عشان تخدم جرأة طرح الموضوعات في العمل.
خليني أقول اني جالي احساس ان الكاتب اخد من حياة ثابت بطل العمل مقطع بشكل هندسي غير منتظم ، ومن أكتر العيوب اللي انا شوفتها في العمل الخط الزمني في الرواية بسبب الفلاش باك سواء قبل السفر أو قبل و بعد عرض فيلم ثابت واللي سبب ليا ربكة و كنت بعض الوقت بأتوه ، أعتقد كان الأفضل نمشي فلاش باك بتسلسل الأحداث لتجنب ده ، و كمان عشان أقدر أحس بمدة ال ٤ سنين اللي البطل قضاها في امريكا.
بالنسبة لي شخصية ثابت لغز كبير كان مقبول بشكل كبير شخصيته و كمان فكرة الانطواء و هو في بلده ، رغم ان نسبة بسيطة اووي في الزمن ده اللي ممكن يبقي علي نياته ، لأن العالم قرية مفتوحة دلوقتي بسبب النت ، لكن الغريب في ثابت هو بعد السفر و قضاء ٤ سنوات في أمريكا و احساس الوحدة فضل موجود ، و عدم القدرة علي تكوين صداقات و شعوره بالفقد من رحيل الأصدقاء اللي قدر يكونهم.
انا قادر اتصور رفض بعض الأمريكان له كعربي ، لكن في وسط جامعي فيه جنسيات مختلفة و مع الانفتاح في شخصيته اللي حصل كان سهل يكون بعض الصداقات ، ولقيت تفاصيل ظهرت من غير مبرر ، يعني فجأة ظهر إنه معاه عربية طيب و لما بدأ يبقي عنده مشاكل مالية راحت فين العربية دي؟
كمان النهاية بالنسبة لي كان ممكن تكون أفضل و مختلفة ، يمكن ثابت عاش جزء من حياته مجبور علي حاجات كتير من سيطرة عمه و الحب اللي عمي عينه ، لكن قرار دراسة السينما حتي لو حصل بسبب موقف معين فمش معني كده انه كان مجبر عليه ، لكن فكرة إنه فجأة بقي واقف في التسلل زي لاعب كورة أعتقد مش افضل خاتمة لتعب ال٤ سنين دراسة.
