رواية تقيلة، مش من نوع الكتب اللي تخلصها وتقفلها وتنساها، هي من النوع اللي تسيبك شوية ساكت بعدها وكأنك محتاج تعيد ترتيب أفكارك

بطلتها مش مثالية ولا قوية بالشكل المعتاد هي قريبة مننا وزينا، يمكن زيادة عن اللزوم

وأكتر حاجة شدتني إنها مش بتتحاكم ولا بتتبرر

الكاتبة ما بتفرضش عليك رأي ولا بتحاكم شخصياتها.. بتسيبك تمشي معاهم وتسأل نفسك في النص طب أنا كنت هعمل إيه؟

سايبة بطلتها قدامنا زي ما هي..

ضعيفة، مترددة، بتغلط وهي عارفة إنها بتغلط، وبتلجأ للي يؤذيها لأنه في لحظة ما كان أرحم من المواجهة

اللي عجبني جدًا كمان إن الرواية ذكية في فكرتها وإن المرآة مش رمز سطحي.. بالعكس بتطرح سؤال طول الرواية.. إحنا بنشوف نفسنا فعلًا؟ ولا بنشوف النسخة اللي نقدر نكمّل بيها حتى لو مش حقيقية؟

لو بتحب الروايات النفسية الهادية، اللي بتشتغل على الإحساس ومش بتدي إجابات جاهزة، الرواية دي هتعجبك.

رواية عن التيه والحيرة، وعن اللحظة اللي بنختار فيها الحاجة الأسهل حتى لو مش صح

وطبعا بدون ذكر النهاية اللي كانت ملعوبة، وبعد المتاهة الطويلة اللي لفينا فيها دي جت وغيرت كل حاجة في الفصل الأخير، حتى البطلة نفسها..

مش هحرق بس الرواية ممتعة جدًا، وتستاهل تتقري

ومش هنسى الغلاف المعبر والمناسب جدا بلوني المفضل 💙