هي رواية من النوع اللي ممكن يبان هادي جدًا في البداية،
بس كل ما تكمل فيها، بتحس إن في حاجة بتتكون وتتراكم جواك من غير ما تاخد بالك.
اللي شدني فيها إن الإحساس تقيل رغم إن الأحداث مش كتير والزمن مش طويل.
كل تفصيلة ولو صغيرة ليها وزن، حتى الحاجات اللي ممكن تبان عادية أو عابرة، بتكتشف بعدين مع النهاية إنها كانت بتبني حاجة أكبر.
وأكتر نقطة قوة في الرواية، بالنسبة لي، هي النهاية.
مش لمجرد إنها صادمة بشكل مفاجئ وخلاص، لكن لأنها بتخلي كل اللي قريته قبل كده أعيد قرايته بشكل مختلف، وأعيد تفسيره في دماغي وأملا الفراغات اللي كنت حاساها وأجاوب على الأسئلة اللي كانت محيراني.
مع النهاية اكتشفت إن في مواقف كنت فاهماها بطريقة، ممكن تتفهم بطريقة تانية وحاجات كانت شبه واضحة، وطلعت مش بالبساطة دي.
الرواية بتلعب على فكرة معينة بذكاء.. إن إحنا مش دايمًا بنشوف الحقيقة كاملة، وإن أحيانًا بنختار نصدق النسخة الواضحة اللي نقدر نتحملها ونعيش بيها.
الشخصيات كمان كانت نقطة مهمة، مفيش حد متقدم على إنه صح أو غلط بشكل واضح، مش شخصيات أبيض أو أسود، كلهم في منطقة رمادية وده خلاني كقارئة مش متأكدة من مشاعري طول الوقت، لا عارفة أكره ولا أتعاطف، بس برضو مهتمة أكمل.
اللغة بسيطة ومباشرة وفي نفس الوقت قوية وأنيقة زي عادة الكاتبة، وده خلا التركيز كله على الإحساس.
لو في حاجة ممكن تتقال كملاحظة، فهي إن الإيقاع هادي، لكن لو دخلت في الجو هتلاقيه مقصود ومخدوم، لأنها في الآخر مش رواية إثارة.
الرواية مش هدفها تحكي قصة أو مجرد حكاية وأبطال، بس بتخليك تفكر إنت شايف اللي قدامك فعلا ولا شايف اللي مريح لك؟
شايف حقيقتك، ولا دي صورتك في عيون اللي حواليك؟
أحييك يا أستاذة وموفقة دايما
