هالمرة قررت اني اقرا رواية لطيفة وخفيفة ترجعلي شغف القراءة والخيال

انا ك ساره من عشاق استوديو غيبلي وكان لهاد الفيلم اله وقع خاص بقلبي وكتير بحبه وشايفته مرات كتيرة ولهيك قررت بعد سنين اني اقرا الرواية تبعه

وفعلا بكل مرة بنبهر اديش الكتاب دوما قادر يعطينا تفاصيل وعمق اكبر بكتير من الشاشة رغم كل متعتها والموثرات الصوتية او السينمائية الي بتكون موجودة

الا ان خيال الانسان وهو عم يقرا يفوز دوما طبعا هاد غير متعة انه تشوف كل شخصية كيف عم تفكر بعقلها واكيد غير الاسلوب الادبي الي يكتسب مع كثر القراءة

يلا نربط الاحزمة ونبلش رحلة مراجعة الكتاب 💖💖💖

لح احكي عن رمزية كل شخصية رئيسية وليس سرد القصة حتى ما احرق الاحداث 😂😂😂💖💖💖

قلعة هاول المتحركة: لما يكون السحر الحقيقي هو بالتخلي عن أقنعتنا

كتير منقرأ روايات الفانتازيا لنعزل حالنا عن الواقع بس رواية (قلعة هاول المتحركة) للكاتبة ديانا وين جونز عملت العكس تماما هي سحبتنا إلى داخل انفسنا

خلف أبواب هي القلعة العجيبة، وخلف سحر السحرة وشياطين او عفاريت النار منشوف في قصة عميقة جدا عن الهوية، والأقنعة الي منفيق كل يوم ومنحطها على تعابير وجهنا، وثقل التوقعات التي تفرضها علينا الحياة من كلشي حولينا

صوفي:

اللعنة التي كانت في الحقيقة (حرية)

بالعادة، منشوف خسارة الشباب في القصص الخيالية مأساة كبرى بس الكاتبة بعبقريتها ساوت تحول صوفي إلى عجوز طاعنة في السن أعظم هدية تلقتها في حياتها

صوفي كانت تعيش مقيدة بـ مسار محتوم صنعته الها عائلتها ومجتمعها

كانت شخصيتها هادئة ومطيعة، ومفكرة حالها أنها مجرد شخصية ثانوية بهالحياة ومالح يكون الها اي شان

بس لحظة غزت التجاعيد تفاصيل وجهها سقطت معها كل الحاجات المزعجة لإرضاء الآخرين

وهاد بيسلط الضوء على حقيقة نفسية منعيشها

لما نصل لمرحلة معينة من النضج، وبعد سنين طويلة من التنقل بين أدوار وخبرات ومسؤوليات متنوعة في الحياة، منكتشف أن التحرر الحقيقي يبدأ لحظة نوقف الاهتمام بـ كيف بشوفونا الناس

صارت صوفي العجوز حادة الذكاء، شجاعة، وبتقول الي بتفكر فيه بدون فلاتر بس بنفس الوقت بدون تجريح، لتثبت أن أقوى تعويذة فينا نكسرها هي خوفنا من حكم المجتمع علينا

هاول:

واجهة مثالية وخراب داخلي

على النقيض تماما، منشوف الساحر هاول الوسيم والقوي، بس هو من جوا كان شخص خايف، بيهرب من مسؤولياته، ومخبى ورا مظهره الجذاب

بالواقع، هاد بيذكرنا إنه مو كل شي بنشوفه مثالي من برا هو فعلا هيك

كتير منا بيحملوا أعباء ومخاوف ما حدا بيعرف عنها

والحل مو بالهروب ولا بالاهتمام المبالغ فيه بالقشور بل بمواجهة هالمخاوف وبناء علاقات حقيقية بتساعدنا نلاقي قلبنا المفقود

القلعة: تجسيد لرحلة الحياة الفوضوية

القلعة بحد ذاتها مو مجرد مكان، بل هي استعارة بصرية مذهلة لعقولنا وحياتنا

هي بناء غريب، غير متناسق، مرقع بقطع مختلفة، فوضوي جدا من الداخل، ويتحرك بطريقة بتحسسك وكأنه حينهار بأي لحظة

بس دقيقة مو هيك هي طبيعة الحياة؟

مجموعة من التجارب المتناثرة، المحطات المختلفة، والقرارات التي بتبين احيانا بدون اي ترابط بينها بس بطريقة ما بتشكل كيان واحد عم يتقدم الى الأمام

والي مخلي هي القلعة متماسكة ومتحركة هو كالسيفر، شيطان او عفريت النار وهو بمثل الشغف الداخلي والروح

مهما كانت حياتنا مليانه بالتخبطات والخبرات المتنوعة، طالما عم نحافظ على شرارتنا الداخلية مشتعلة حنستمر بالحركة للامام

ليش بشجعكم بقراءة هاد الكتاب؟

لأنه علمنا أن السحر الحقيقي مو بالعصي السحرية أو التعاويذ، بل في التفاصيل اليومية الصغيرة

في تقبلنا لفوضانا الداخلية

وفي شجاعتنا لنكون على طبيعتنا الحقيقية

قلعة هاول المتحركة هي دعوة لطيفة لكل شخص حاسس أنه علقان في دور ما يشبهه انه يفتح باب جديد وتسمح لقلعتك الخاصة بأن تتحرك نحو آفاق أرحب

رواية كلاسيكية وفعلا تستحق الجوائز الي نالتها ولما كاتبي المفضل نيل غاييمان مدحها بانه تصلح لكل زمان ومكان فعلا كان كلامه صحيح جدا

وشكرا لكل مين وصل لهون

💖💖💖💖💖