لو اختفت القطط من العالم

للكاتب الياباني: غينكي كاوامورا

رواية من الأدب الياباني، ترجمة : ميسرة عفيفي

عن منشورات تكوين

********

لو قدامك يوم واحد بس وتموت، إيه اللي ممكن تفكر تعمله في يومك الأخير ؟

مش عارف؟

طيب هتزعل ولا هتفرح؟

شايف ان حياتك ما كانش فيها شيء ممكن تفتقده أو يسعدك ولا في؟

حياتك مهمة وخسارة تكون نهايتها الموت؟ ولا ممكن تقبل النهاية دي بس بعد شوية.. بلاش دلوقتي؟

.....

اسم الرواية غريب؟

خلينا في المهم

بطل الرواية، ساعي بريد في الثلاثين من عمره، عرف حالاً إن أيامه خلاص معدودة، مفيش مفر من الموت ومرضه ملوش علاج، لكن بتحصل حاجة غريبة، الشيطان بيقرر يتفق معاه على صفقة..

هطول في عمرك وهبعدك عن الموت بس بشرط بسيط جدا..

كل يوم زيادة في عمرك هيختفي قصاده حاجة من العالم..

= طيب بسيطة! هختار حاجات مش مهمة واعيش بدل اليوم أيام وسنين..

لا، الشرط ليه باقي، أنا اللي هختار إيه يختفي، وافقت عمرك يزيد يوم وتبعد عن الموت يوم، ولو رفضت انت اللي هتختفي...

قدام الألم والوهن الشديد وافق على الصفقة..

في اليوم الأول اختفى التليفون.. قبل ما يختفي اتمنى آخر مكالمة

تاني يوم اختفت كل الأفلام.. كان في فيلم نفسه يلحق يشوفه مع صديقته، وفيلم تاني كانت أمه بتحبه.. أمه اللي ماتت وسابته وحيد وحتى ذكراها دلوقتي اختفى منها حاجة ..

تالت يوم اختفت الساعات! عايش في يوم بدون توقيت، إيه أهمية الزمن لو هموت؟ لو كل حاجة بحبها بتختفي أو اختف

الأم ماتت والاب مفيش تواصل ؟ ماليش غير " كرنب" قطي الجميل وباقي ذكرى أمي..

رابع يوم وقف قدامه الشيطان، القطط تختفي ولا تموت؟

طب وكرنب!

....

****

رواية فلسفية عن الموت، لكن بنظرة مختلفة، نظرة مش حزينة، لكن ازاي الإنسان بيدرك قيمة الأشياء والأشخاص بعد فقدانهم، وان حاجات كتير ممكن تكون بسيطة ومهمة لكنها بتصنع معنى ولون للحياة، بتصنع سعادة وقيمة حتى لو بقدر بسيط لكن الإنسان دايما غافل عنها لحد ما يقابل الموت.. ساعتها بس يفكر كانت مهمة؟

كانت حلوة..

ويجي في ذهنه عاوز ١٠ حاجات اعملها بسرعة قبل ما أموت..

مع أن في حاجات كتير كانت بالفعل بتتعمل لكن بدون إدراك ليها ولا لوجودها..

حاجات ممكن تخليك تستقبل الموت برضا انك عشت ولو قدر بسيط من السعادة، وانك مهم لكن لابد من نهاية، وان الموت مش نهاية حزينة لو كنت اديت حياتك وما فيها قيمتهم ووضعهم الصحيح..

ساعتها ممكن ببساطة تنهي الصفقة وتلغي الاتفاق

وتختار " كرنب" والقطط ما تختفيش من العالم...

#نور

#مش-ريفيو