📌رواية بلاد جان

📌للكاتب أحمد فريد المرسي

📌دار النشر بيت الحكمة

📌عدد الصفحات 362 صفحة علي ابجد

الحياة أحيانا بتكون هروب داخلي من واقع مزعج وأحيانا سعي مستمر وراء أحلام صغيرة وكبيرة كل يوم بنعيشه هو رحلة بين محطات قصيرة بنعديها بسرعة ومحطات طويلة مليانة انتظار وأسئلة وفي كل محطة بنقابل ناس ونتعلم حاجة عن نفسنا وناخد قرارات ممكن تغير المسار كله المهم إننا نكمل حتى لو بخطوات بطيئة لأن كل محطة بتقربنا من الوجهة سواء كانت هروب، تحدي، أو مجرد لحظة هدوء وسط زحمة الحياة

ومن هنا بنسافر مع سراج

رحلته بتبدأ من أسوان تعدي على باريس وتوصل لحد أبيدجان لكن الرحلة دي مش جغرافيا وبس دي رحلة نفسية ومعنوية سراج ما كانش بيسافر عشان يشوف مدن جديدة هو كان بيحاول يهرب من صراعه الداخلي من ذكريات مؤلمة ومن أشباح ماضيه اللي ما سابتوش الرواية في أولها ممكن تحسي إنها مجموعة خواطر أو رسائل شخصية مش سرد تقليدي متسلسل الكاتب بيخلينا جوه عقله البطل بنسمع أفكاره ومشاعره الخام زي ما هي كأننا بنقرأ دفتر يوميات الأحداث

سراج شاب حياته اتشكلت باختيارات أهله حتى مستقبله كان مرسوم له قبل ما يحلم وترك امه له وذهابها الي باريس ترك ندبة كبيرة في حياته ولما قرر يحب لأول مرة باختياره حارب عشان يتجوز رغم رفض أهلها لكن بعد الزواج ظهرت الفجوات واختفى بريق الحب وانتهى كل شيء بالطلاق وهنا بدأ الهروب الحقيقي هروب بالسفر لكنه اكتشف إن الذكريات مش مربوطة بمكان الذكريات ساكنة جوانا بتسافر معانا مهما غيرنا العنوان

كانت تبدو أبيدجان مدينة نظيفة فيها من المحال والمتاجر ما يضارع مدينة كالقاهرة أو حتى مدنًا في أوروبا لكن هذه المدينة كانت تخفي أسرار كثيرة الفقر، الجريمة وتجارة السلاح والدعارة والمخدرات ومن الحاجات اللافتة في الرواية إن الكاتب استفاد من منصبه السياسي بشكل ذكي داخل العمل المنصب ده ما كانش مجرد خلفية شكلية لكنه كان مبرر منطقي وسلس لتنقل سراج بين البلدان وسهل فكرة السفر والحركة بين العواصم بدون تعقيد مفتعل في الأحداث ومن خلال التنقل ده عرفنا على إفريقيا بطريقته الخاصة مش كصورة نمطية ولا كديكور بعيد لكن كمساحة مليانة حياة وتفاصيل وإنسان خصوصا لما انتقلت الرحلة إلى أبيدجان حسيت إن الكاتب مش بس بيحكي عن مكان لكنه بيحاول يقرب القارئ من روح القارة نفسها فتح لنا نوافذ جديدة نشوف منها العالم وكأن الرحلة ما كانتش رحلة سراج وحده لكنها رحلة القارئ كمان لاكتشاف إفريقيا بعيون مختلفة الرواية بتناقش فكرة إن كل واحد فينا بيرسم شكل لحياته، لكن الواقع ممكن يغير الاتجاه أحيانا بنمشي في سكة مش بتاعتنا ونكتشف متأخر إننا كنا بنحقق حلم حد تاني مش حلمنا بنقابل ناس وناس تخرج من حياتنا وكل واحد فيهم يسيب أثر، أحيانا ندبة وأحيانا درس

وفي النهايةالرواية ما بتديناش إجابة واضحة النهاية كانت مفتوحة وكأن الكاتب قرر يسيب سراج واقف في محطة جديدة من غير ما يقولنا القطار هيوديه فين ما نعرفش

هل قدر فعلا يتصالح مع ماضيه؟ هل لقى السلام اللي كان بيدور عليه؟ ولا هيفضل في دايرة الهروب من مدينة لمدينة؟

النهاية المفتوحة خلت السؤال الأهم معلق في ذهن القارئ إيه اللي حصل لسراج بعد كده؟ يمكن ده كان مقصود إن رحلة سراج ما تخلصش بنقطة في آخر السطر لأن الرحلات النفسية عمرها ما بتنتهي فجأة ويمكن الكاتب كان عايز يقول إن كل واحد فينا هو اللي يكتب نهاية حكايته بنفسه

📌الكاتب عنده لغة قوية جدا وده باين بوضوح في كتابة الرواية قوة لغته مش بس في المفردات لكن في طريقته في صياغة الجمل وبناء المعنى تحس إن عنده سيطرة كاملة على الكلمة عارف إمتى يختصر وإمتى يطول وإزاي يحمل الجملة إحساس أكبر من حجمها اللغة طالعة واثقة ناضجة ومليانة حضور واضحة إن الكاتب متمكن من أدواته وإن القوة دي ظهرت جليا في كل صفحة من الرواية سواء في السرد أو في التعبير عن المشاعر والصراعات الداخلية

📌السرد اعتمد بشكل كبير على التداعي الحر وكأن الأفكار بتخرج بدون ترتيب صارم ده خلى الإيقاع أحيانا بطيء لكنه بطء مقصود يناسب فكرة التأمل والهروب الداخلي ممكن قارئ يحب الأسلوب ده لأنه بيحسسه إنه قريب جدا من البطل وممكن قارئ تاني يحس إنه محتاج حبكة أوضح فيرى إنه رهان الكاتب يختار العمق النفسي على حساب الحركة الدرامية

📌 الحوار فكان قليل نسبيا لكنه لما بيظهر بيكشف مسافات بين الشخصيات الحوارات مش طويلة ومفيهاش جدال صاخب لكنها بتوضح الاختلافات اللي أدت للشرخ والأوضح من الحوار الخارجي هو الحوار الداخلي سراج بيتكلم مع نفسه أكتر ما بيتكلم مع الناس وده بيعكس وحدة عميقة أكتر من أي مشهد درامي

📌اقتباسات

❞ لا بأس، فالنسيان يجعل الحياة ممكنة ويسكّن الألم، لكن أشياءَ لا تغادر الذاكرة ولا تبلى دلائلها، بل تتجدد لتعيث في أروقة النفس. ❝

‏

❞ «عقلك لا يجيد التعامل مع المشاعر السلبية، وهذا ما حدث. لم تحسب أنك ستخفق أو تتألم، هذا ما أحدث الأزمة، العقل الإنساني في المجمل يعمل على تهيئتك لتفادي آثار الصدمات، ألم تسمع أحدهم يقول إنه رأى شريط حياته يمر أمام عينيه عندما أوشك أن يموت؟ هذه هي، ومن ذلك أيضًا أنه عندما يستبد بالإنسان خوف أو قلق يقوم العقل بمحاولة تفاديه بفرض «سيناريوهات» محتملة للخروج من المأزق، ومنها توقع الإخفاق وما يترتب عليه، وبذلك يعدّك عقلك لاحتمال الأوجاع. ❝

‏

❞ تنبعث العنقاء من رماد النار ويخرج النجم الندي من شقوق الأرض القاحلة، ويشج أعتامَ الليل البهيم خيطٌ من ضياء الفجر، فلمَ لا أبعث أنا أيضًا من جديد!». ❝

‏

#أبجد

#بلاد_جان

#أحمد_فريد_المرسي

#مسابقات_مكتبة_وهبان

#مسابقة_ريفيوهات_بلاد_جان

#اقتباسات_بلاد_جان