#مسابقات_فنجان_قهوة_وكتاب

#معرض_القاهرة_الدولي_للكتاب

#المعرض_قبل_المعرض_في_الفنجان

الكتاب التاني

.......

ثانوية عامة دايسة على وشي بكساح مش مواد تقريبا😂، ففي وسط المعمعة أنا بلجأ لشيء هو الركن الأهدى والألطف في يومي "القراءة على أبجد" شفت قائمة المعرض قبل المعرض ووقعت عيني على كتاب بالفعل كنت شفته على صفحة الدار ومهتميتش أوي، قلت طيب ما أحمله وأشوف إيه الدنيا جوة، هو صغير مش كبير وشايفة كلام مشجع عليه، بالفعل بدأته وحقيقي من أول فصل عجبني أوي، هتكلم عن كل قصة بشكل مختصر بس متقرأش المراجعة غير بعد ما تكون خلصت الكتاب علشان محرقش حاجة عليك.

❞ وهكذا أدركت أن الامتنان ليس عادة عابرة تمارس على عجل، بل هو سر يغير الحياة بأكملها؛ فكل كلمة شكر تُكتب في دفترك هي سطر جديد في حكاية رضا قلبك وسلامك الداخلي. ❝

أول فصل بتاخدك من إيدك الكاتبة وتوريك موقف في الشارع وتعلمك درس وهو مهم جدا "الامتنان" من بعد الموقف بتشرح أهمية الامتنان، الأثر الراجع للشخص مش هتعرف تحس بيه غير لما تعمل اللي وصفته في الكتاب، والشيء الجميل أنها كتبت وشرحت إزاي نكون ممتنين ومنبطلش ندون في الدفتر للعادة الجميلة دي وإن إحنا نفضل دايما فاكرين نعم وفضل ربنا علينا طول الوقت ومنكلش ولا نمل من المجاهدة في الحياة رغم ضيقاتها.

❞ عليك أن تدرك جيدًا أن المقارنة خدعة من خدع الشيطان، وأن ما نراه من حياة الآخرين ليس إلا جزءًا صغيرًا من الحقيقة.. فلا أحد يعيش حياة كاملة وكل منزل له أبوابه المغلقة من حديد وأسراره الصامتة الأشد إيلامًا مما تظن❝

مع تاني فصل بتدخل في موضوع الحسد، واللي هو مرتبط بشكل كويس بالامتنان والشكر على اللي نمتلكه، الحقيقة أن الكاتبة هنا أبدعت في أنها تخرج مشاعر كتير عن طريق الأسئلة اللي قدمتها للي هيدون في الدفتر بتاعه، الأسئلة هتخليك تعمل ريفريش كدة وينعشك.

❞ ولكن لا بأس بوجود الأخطاء، لولا الأخطاء ما تقدمنا وأصبحنا أقوى وأنضج حينما نتخذ ذلك لصالحنا.. ❝

الفصل التالت اتكلمت عن سن العشرين، وما هو متوقع من اللي في السن دة أن كان من الشخص نفسه أو حتى اللي حواليه أملًا فيه، وهي كلامها حقيقي جدا.

❞ التشتت يسرق منا العمر والكثير من الإنجازات، نفكر في النواقص، نبدأ الكثير ولا نكمل ولو شيء واحد، تائهين بين الكثير من الأهداف والأمنيات والنتيجة أننا لا نصل لأي شيء❝

بتنتقل بينا الكاتبة لشوية نصايح بالتفصيل وبعد كدة بتجمل دة كله في أنك متضيعش وقتك، وأسئلة كمان بتسألها ليك علشان تقعد مع نفسك وتجاوب على كل حاجة وتحاول تحسن من دة.

فكرت قبل كدة تعمل كل حاجة في حياتك كأنك حاسس فعلاً بوجود ربنا وأنه بيراقبك على اللي بتعمله، أوقات حد مننا يتغافل عن وجود ربنا ويعمل حاجة غلط وممكن إحنا بنعمل حساب الناس وشكلنا قدامهم ونفسنا وننسى رب الناس!

في الجزء دة الكاتبة بتقول احترس..

لو قعدت اتكلم عن كل فصل مش هخلص، بس اللي اقدر اقوله أن الكتاب دة مهم وحلو أوي للناس اللي بتحب تعمل جورنالينج أو تدوين في الدفتر عن نفسها.

خصوصًا آخر فصل لما اتكلمت عن أن الجورنالينج والتدوين هو ثيرابي، هي معاها حق جدا لأني بحب التدوين واتفقت معاها.

اقتباسات:

❞ ‫ حيـن تكتب ما يثقلك، يصبح ألمك أخف قليلاً. وحين تكتب ما تحلم به، يبدأ الكون في التحرك نحوه. ❝

‏❞ ‫ أحيانًا لا نحتاج إلى من يسمعنا بقدر ما نحتاج إلى ورقة وقلم لنكون أكثر شفافية مع أنفسنا. التدوين ليس مجرد كتابة أفكار عابرة، بل هو نافذة نطلّ منها على ما يكُن داخلنا؛ نرى ما لا نراه وسط ضجيج الأيام. ❝