❞ «ودون أن يدفع الحي العربي ثمن عدم محاولة احتواء شاب كسفت الشمس يوم ميلاده، وأشرقت على مؤخرته» ❝

ماقرأتش قبل كده للدكتور/ أسامة علام، ويمكن ده عيب فيّ، لأني دايمًا بتردد أقرأ لحد جديد خوفًا إن الوقت يضيع على الفاضي لكن الحقيقة إن الكاتب فاجئني وأسعدني بعد ما خلصت رواية الحي العربي.

الرواية بتبدأ بحدث غريب وغير تقليدي، أشبه بخطاف صنارة بيترمي في أول سطر علشان يشدك تدخل عالم الرواية غصب عنك.

والأغرب إننا خلال سنة 2026 مستنيين حدث قريب جدًا من اللي الرواية بتتكلم عنه، ولو الدنيا مشيت في نفس السكة، فمش هاتبقى مجرد رواية هاتكون شبه نبوءة.

من أول ما الحكاية بدأت وأنا مشدود، وأنا بطبعي بحب اللي يعرف يحكي حدوته.

الأحداث بتنقلنا من صدمة لصدمة، لحد إعلان حكومة كندا عن قرار بيغيّر مصير كل سكان الحي العربي، ومن هنا الكاتب بياخدنا بسلاسة شديدة لطبقة تانية من الرواية: آل زعبوط.

الانتقال ده كان مدهش فعلًا، التعريف بالشخصيات مكتوب بحرفية، وكل شخصية واخدة حقها من غير حشو ولا مطّ.

حتى الشخصيات اللي بتظهر بعد كده، بتحس إنها داخلة مكانها الطبيعي، وعرفت أصلها وفصلها من غير ما تحس إن الكاتب بيشرحلك بالعافية.

خطوط الأحداث ماشية جنب بعض في نفس الوقت ونفس التصعيد، وده حافظ على زخم الأحداث و لم يشعرني بأي ملل.

الصراع هنا على مستويين:

**الأول هو صراع الكاتب نفسه، إنه يلمّ كل الخيوط دي من غير ما تقع منه، وحسيت كأنه بيصارع وحش(هايدرا) له كذا رأس، ونجح إنه يسيطر على أغلبهم.

**التاني صراع الشخصيات، وده كان واضح جدًا، لأن أغلب الشخصيات المؤثرة بتخوض رحلات بتتحول فيها بشكل مؤثر وواضح على المستوي المادي والمعنوي، لكنها تمت بسلاسة، كأن مركب ماشية على نهر هادي.

أنا شخصيًا ما ركزتش قوي في الرمزية، قد ما كنت مستمتع بالحكاية نفسها؛ حكاية ذكية، مترابطة، ومحبوكة، والدراما متعالجة بشكل محترم.

استخدام اللغه كان هادي جدا و معبر الحقيقة

كان نفسي أشوف شوية حاجات أكتر: – خط زمني أطول لياسين.

– تفاصيل أعمق عن تحوّل رحمن زعبوط ونرجس.

– وحدث الشِلتر اللي بات فيه وديع ونرجس كان صادم جدًا، وكنت أتمنى يكون أخف شوية، لأنهم ما يستاهلوش القسوة دي.

مش هاطوّل أكتر من كده علشان ما أحرقش الرواية،

بس حقيقي أنا مبسوط إني اتعرفت على حكّاء شاطر زي د/ أسامة علام، وإن شاء الله هاقرأ باقي أعماله واحدة واحدة.