رسائل صباحية مع القهوة

كتير مننا بيجي عليه وقت ويحس بالاحباط او الملل او عدم التوفيق او يحس انه معملش حاجه في حياته لحد دلوقتي او يبقى زي احمد سعد ويحس انه مغناطيس للأشخاص السيئة وكل دول بيحسو انهم لوحدهم في شعورهم ده او حتى لو اتعرضنا لموقف صعب كإختبار من اختبارات الحياة اللي مش بتنتهي وساعتها بنكون محتاجين كلمة تهون علينا الصعب اللي عايشينه ده او غالبا وانا منهم عاوزين رساله صباحيه من حد منعرفهوش تكون علامه اننا أقوى وأن كله حيعدي ونتفائل بده جدا حتى لو كان بوست على فيسبوك او رسالة او حكمة في نتيجة زي ورق بتتغير مع كل يوم جديد زي ما أهالينا كانو بيعملو زمان وده مش تطير مثلا في رأيي أنا بشوفها دعوة لتجديد روحنا وبث الأمل فيها بأي طريقة ممكنة.

ودي الفكرة اللي تبنتها الكاتبة هاجر سرحان في كتابها الأحدث رسائل صباحية مع القهوة والصادر عن الرسم بالكلمات للنشر و التوزيع إيماناً منها بنفس الفكرة ودعوة صريحة للتفاؤل في بداية كل يوم ولكن المرة دي بطريقة منظمة وقادرة انها تضيف جديد لك على المستوى الشخصي تقدر تلمسه مش بس حكمة او كلام جميل يريحك لحظيا لأنك على مدار 105 رسالة وهي رسائل الكتاب حتلاقي قصاد كل رسالة مساحه للتدوين تفرغ فيها شحنتك النفسية وترتب فيها عقلك وقلبك بواقعية وبدون اي تزييف لأنك ببساطة مش حتضحك على نفسك او على الأقل لو مش قادر تفهم اللغبطة اللي جواك الكتاب حيرتبها ويخليك تقدر تفهم انت حاسس بايه بالظبط .

الرسائل نفسها متنوعة جدا ما بين نصائح شخصية أو نفسية أو دعوة للتقرب من الله أو عدم التعلق بالبشر أو طرية التعامل معاهم أو دعوة للمقاومة والاستمرار في السعي لتحقيق الاحلام أو الرضا بالقضاء والقدر او تغيير طريقة تفكيرك او نصائح في العمل وغيره كتيير....

الكتاب كمان حنلاقي فيه جزء لا بأس بيه من الإختبارات الشخصية اللي بتحدد شخصياتنا من جميع الجوانب وعن نفسي اتفاجئت منها لانها وضحتلي حاجات فعلا ممكن تكون كانت غايبه عني او مش شايفه بوضوح.

حابه كمان أوضح أن النسخة الورقية من الكتاب لطيفة جدا وتبعث على الهدوء النفسي فعلا بألوانها وسومها المبهجة وتقدروا طبعا تقرأوها من أي رساله تحبوها كل يوم رسالة مش شرط بالترتيب .

تجربة قراءة اولى للكاتبة كانت لطيفة جدا على القلب ولا مانع من تكرارها.

#رسائل_صباحية_مع_القهوة

#هاجر_سرحان

#المعرض_قبل_المعرض_مع_الرسم_بالكلمات_2026