قبل ما أتكلم عن المجموعة القصصية حابة أحكي عن تجربتي قبل ما أقرأ، بداية معرفتي بالكاتب كانت من سنتين لما بوكتوكر كانت مرشحة "كم مرة سنبيع القمر" وللصدفة كنت بشوفها كذا مرة كترشيح، وقريت منها جزء كبير فعلاً وكان شاددني جدًا أسلوب الكاتب بالإضافة للجهد المبذول في الرسومات اللي كانت بتضيف للمجموعة روح حلوة وبتدخلنا أكتر في المود، وبعدها في السنة بعدها ٢٥ لما كنت في ألتراس فنجان قهوة كنت بحضر معاهم لايف د. أسامة علام وكنت بحب كلامه جدًا واللايف كان حقيقي جميل وممليتش خالص وقتها، دة كله وأنا معرفش إن الدكتور هو هو نفسه الكاتب😂😂، وبعدها بفترة صغيرة عرفت وكنت مبهورة، وعدت التجربة تاني بعد ما كنت متأكدة خلاص أن الدكتور هو هو نفس الكاتب مع "طريق متسع لشخص وحيد" وحقيقي اتبسط بالتجربة وكانت لذيذة حقيقي.
"طريق متسع لشخص وحيد"
بيقدملنا في المجموعة دي الكاتب مشاعر الغربة اللي بتخلينا نستنبط أن أكيد فيه وحدة، ومشاعر مختلفة تمامًا زي الألفة مع أشخاص ممكن كان أول مرة يقابلهم، والحنين لموطن الذكريات والطفولة، ومدى ارتباط الشخص بمهنة هو حبها زي ما بيقولوا "إفعل ما تحب كي تحب ما تفعل" وهو دة اللي كان ظاهر في قصص كتير من المجموعة.
هي مجموعة قصصية أشبه بأدب الرحلات، ممكن نقول إنها بتسرد لحظات من جوة بيت لشخص وحيد، أو عيادة لطبيب بيطري بيحب الحيوانات وبيحب مهنته أو حتى الشارع وتعامله مع بيئة وتقاليد غير أصله الحقيقي، بيبان لنا إن كل قصة ماسكها شخصية واحدة وإحنا بنمشي معاه ونستمتع لحكيه عن مواقف مر بيها، وعن خوفه من أن كل اللي بيحصل معاه من سعادة يطلع وهم!
في الاقتباس: ❞ تشبه النوارس في التنقل بين عالمين: بحر ويابسة، بلدك الأم وكندا، أو حياة حقيقية يسمونها الجنون وحياة خارج حدود هذا البيت لا تعترف بوجودنا كبشر ❝ عاملة زي كدة الشخصية في القصص كلها.
في أغلب القصص مفيش نهاية محددة وتريحك، فيه نهاية تخليك تفكر هو ليه سابها كدة وليه معملهاش حاجة تانية؟ ودة كله بيقودك لإن تتفاعل مع العمل وتفكر فيه وياخد جزء من تفكيرك ويتملك عليه.
❞ يبدأ يومي عادة بإزاحة ستارة النافذة الثقيلة ليكون وجودها أول شيء تقع عليه عيناي… فيتأكد شعوري بأنه ما زالت هناك إمكانية لإصلاح ما كان… وهي… . السيدة الغجرية بوجهها العجوز بلا زمن ❝
تفاصيل صغيرة زي دي في القصص، ممكن تحس أن طيب وأنا مالي، بس لو فكرت فيها، هتلاقيها بتحرك حاجة جواك، إن التفاصيل دي ممكن تكون بتحصل مع حد فينا وتفرق معاه فعلاً، ودة بيخلي المجموعة القصصية قريبة لينا حتى وإن كانت فيها نهايات غريبة أو مش دايما مباشرة.
من جانب تاني بنشوف شخصيات من بيئات وثقافات مختلفة، على حسب زيارات الشخصية ومدى تعاملها مع الآخرين
الحلو والمفاجئ كمان في المجموعة القصصية دي و "كم مرة سنبيع القمر" هو أن الكاتب قادر يخليك تعيش مع القصص كلها رغم أن القصة ممكن متعديش التلات صفحات! واللغة المكتوبة بيها القصص حلوة وتحسسك بشعور حلو رغم أن ممكن القصص تكون فيها نهايات حزينة أصلًا!
حابة أختم المراجعة بإني حبيت قلم الكاتب للمرة التانية، واللغة حقيقي جميلة، ولا أنسى ذكر أن الرسومات اللي جوة المجموعة دي جميلة وأنا بحب النوع دة أوي من الرسم🩷🩷🩷🥰.
#عالم_اسامة_علام_الروائي_في_الفنجان
#مسابقات_فنجان_قهوة_وكتاب