"ليلة حب..بين الأحلام المؤجلة والواقع الصعب"

قراءة جديدة بعد سنوات طويلة للكاتبة "دينا عماد" وروايتها الأحدث"ليلة حب" والصادرة عن "دار الرسم بالكلمات للنشر والتوزيع"، رواية بعنوان لافت و غلاف رقيق جداً بيوحي بإننا هنعيش مع قصة حب لطيفة جداً، ولكن...

الرواية بتدخل بينا بيت آية، اللي ف يوم وليلة لقت نفسها أرملة لزوج قرر

يهرب من كل الضغوط وي ن ت ح ر ويسيبها تواجه الزمن بولادها لوحدهم تماماً، ف وقت بسيط جداً وبدون رفاهية الإنهيار بتلاقي آية نفسها أم وأب وممرضة، بمساعدة صديقة عمرها "هالة" بتبتدي بصعوبة مشروع جديد، بتقابل ف الطريق"سيف"، ياترى إيه اللي هيحصل؟؟

الرواية على صغير حجمها بس بتناقش كذا قضية، زي الإبتزاز الإلكتروني بكذا طريقة ف الرواية، إزاي الناس بتتصرف، يمكن بتحط نور على طريقة تصرف سريعة وفعالة، كمان بتناقش فكرة وجود السند، سواء زوج أو أصدقاء...مهم جداً يكون الإنسان حواليه دايرة أمان طول الوقت، فكرة السكن مع الأهل، كمان مشاكل المراهقة مع ولاد آية خاصة "عمر" اليل كانت مشاكله أكتر من فرح بكتير، الجملة دي "بس الحب الحقيقي مش إنك تسامح وتعدّي. الحب الحقيقي إنك توقف الغلط علشان اللي بتحبّه ما يضيعش." لخصت كتير قوي ف تعاملاها مع ولادها

"لأنه ولأول مرة لم يُطلب منها أن تكون غير نفسها. كانت تعرف أن الخطوة القادمة بيدها هي، لا بيد أحدٍ آخر.. لكنها لا تعرف من أين تبدأ."...عجبتني حقيقي رحلة آية، سعيدة فعلاً إنها قدرت تواجه دة كله، أشفقت على سيف على طول الرواية تقريباً رغم غيظي منه ف بعض الأوقات

الرواية مكتوبة حلو، السرد فصحى والحوار بالعامية ، الربط بين الشخصيات ووصفها كان جميل، التركيز على آية بصفتها البطلة كان جميل و برضة حسيت إن باقي الشخصيات أخدت فرصتها ف الحكاية، الكتابة كمان لذيذة ف الرواية خلصت ف جلستين بالظبط

رواية اجتماعية لطيفة، تصلح لفك بلوك قراءة أو بين قراءات تقيلة

#صحبة2026

#قراءات_حرة

#قراءات_يناير

12/3