🖋مراجعة العدد الأول من سيرة ورد الحكاوي "التاجر لمّا أفلس"

بحب النص اللي بيحيي جوايا ذكريات قديمة وحاجات حلوة، الرواية فكرتني بالقصص اللي كان بابا الله يرحمه كان بيحكيها لينا واحنا صغيرين.. الحكاية اللي تخليك قاعد كدا منتبه عايز تعرف اللي هيحصل فيها وفي نفس الوقت تفهم الحكمة منها، الحكاية اللي بتعتمد على بساطة السرد.

📝التاجر لمّا أفلس عمل قصير وبسيط في شكله، لكنه قائم على فكرة واضحة ومباشرة انه الإفلاس مش مجرد خسارة فلوس، ده لحظة بتكشف الإنسان والمجتمع اللي حواليه.

🖋السرد في الرواية: سرد هادي من غير تعقيد في الزمن ولا تشابك أحداث، بالعكس بسيط وسلس.. ركزت الكاتبة مش على الأفلاس نفسه او سببه قد ما ركزت على الوضع فيما للتاجر ونظرة التاجر لنفسه وتعامل اللي حواليه مع الأمر... الجزء الفانتازي في السرد خلى للحكاية طعم مختلف ومثير.

📝اللغة بسيطة وواضحة قريبة من الحكي، ومن غير استعراض أو جمل تقيلة، الأسلوب هادي وبيبعد عن الوعظ المباشر وده نقطة قوة تتحسب للنص.

🖋من نقاط القوة إن الفكرة الأساسية متماسكة من أول العنوان لحد النهاية، وإن الرواية بتقدم مدخل مناسب لفكرة السلسلة نفسها. كمان بساطة النص بتخليه سهل القراءة وسلس، وده مهم في أي عمل افتتاحي.

📝الشخصيات كان محدودة في الرواية ودا خلي ليها طعم مختلف ومميز في تركيز القارىء انه يربط الشخصيات ببعض وميتوهش جو الحكاية.. أكتر شخصية حبيتها كان "معروف" بغموضه (◔‿◔) حسيته شبه الواقع أوي.

👌🏻في المجمل حكاية التاجر لمّا أفلس رواية بتشبه قصص كتير بنسمعها في الشارع المصري، وبتطرح سؤال مهم: الإنسان قيمته في إيه؟ في اللي معاه ولا في اللي يفضل معاه لما كل حاجة تروح؟

#كتوبيا_للنشر_والتوزيع

#فنجان_ومراجعة_سلسلة_ورد_الحكاوي

#مسابقات_فنجان_قهوة_وكتاب