المشاركة الإلكترونية الثالثة

العمل : الدحيح (ما وراء الكواليس)

دار النشر: دار الشروق

المؤلف: طاهر المعتز بالله

عدد الصفحات: ٥٠٥ صفحة على أبجد

التقييم: ٤.٥/٥

❞ الحياة مش خط مستقيم

‫ الصعود والهبوط جزأ لا يتجزأ منها

‫ وأحيانًا فترات المعاناة بتكون أشبه بمعسكر تأهيلي لتجهيزك لما هو قادم ❝

ده الإقتباس الشامل للكتاب من وجهة نظرى

الكتاب كان قريب ليا اوى وأثر فيا عشان أطلعنى على ما خلف الكاميرا وما خلف الدحيح نفسه

أحمد الغندور طلع شخص طبيعى زينا كلنا مش تنين مُجنح 😂

الطبيعى إن كل حد فينا عنده حاجات ساهمت وشكلت فى بناء شخصيته عشان يطلع هو بدءا من الحمض النووي المورث لينا إنتهاءً بالتعليم والبيئة المحيطة

الكتاب رجعنى لذكرى أول حلقة إتفرجت عليها للدحيح أنا فاكرة إنى فضلت متنحة خايفة أغمض عينى حاجة تفوتني يمكن كاتمة نفسى كمان عشان أستوعب كم المعلومات اللى الدحيح بيقولها وإزاى بسطها كدة وكمية الزهو والغرور لما يقول حاجة انا عارفاها😂

انا كنت سامعة الكتاب بصوت الدحيح حقيقة مش مجازاً لأنى فعلا حملت الأوديو من ستورى تيل وكنت ماشية فى الكتاب بصوت أحمد الغندور وتعليقاته المرحة للكاتب وده أمتعنى فوق متعة الكتاب الصراحة كإنى بسمع حلقة للدحيح بس طويلة شوية

ظروف حياة أحمد الغندور ونشأته زى ما كان فيها مميزات ساعدته يحصل على تعليم أفضل كان فيها سلبيات زى الوحدة وهنا بنشوف الفرق بين الشخص الواعى الذى والشخص المهمل اللى بيكون عنده إمكانيات وبيختار ميستغلهاش

أحمد قضى وحدته بين الكتب وفى المكتبة ومستسلمش حتى بعد الموقف المحبط اللى حصله من مدير المكتبة وده بيدينا إنطباع عن المثابرة اللى لسة هنشوفها أكتر لما يتنفذ البرنامج ومراحل ال ups & downs اللى هيعدي بيها أحمد

هنعرف إن عادى نحبط ونحس إننا مش قادرين بس لازم نقوم ونكمل تانى وإن إستمرارية السعى مع توفيق ربنا تعنى أكبر حتمية الوصول

طبعا إتعرفت على ناس كتير من فريق الكتابة والتصوير وعرفت إن الموضوع مش بسيط زى ما كان باين خالص لا دى خلية نحل نشطة بتشتغل شهور عشان حلقة ١٠ دقايق أو ربع ساعة تطلع بالشكل المشرف اللى بنشوفه

الدحيح قصة نجاح لشاب مصرى مكافح بالرغم من الإمتيازات اللى سهلت طريقه لكنه عمل حاجة محدش قدر يعملها قبل كدة فى مصر بالرغم ان أكيد كان فيه ناس عندهم نفس الإمتيازات وأكتر

حبيت أسلوب الكتابة والسرد الأبعد ما يكون عن الملل مع إستخدام مصطلحات الجيل الجديد خصوصا مع سماعها بصوت أحمد الغندور

كتاب خفيف وممتع بالرغم من حجمه الكبير وعُمقه الفلسفى المُبطن (الكنز فى الرحلة)

أول تجربة ليا مع قلم أستاذ طاهر المعتز بالله وأكيد هكررها♥️

#الدحيح_ما_وراء_الكواليس

#طاهر_المعتز_بالله

#حصاد_العام

#أبجد

#فنجان_قهوة_وكتاب

#حصاد_العام_مع_أبجد_وجروب_فنجان_قهوة_وكتاب