الدحيح - ما وراء الكواليس

الكتاب رائع جداً و قبل ما اسمع النسخه الصوتيه .. و انا بقرأ الكتاب كان صوت الدحيح و اسلوب بحكي جوا دماغي 😂

تحمست لمّا عرفت ان النسخه الصوتيه بصوته

.. الكتاب خلانا نقرب اكتر لشخصية احمد الغندور

انصحكم بقراءته ❤️

كتاب جميل استفدت منه كتير، أنصح الجميع بقراءته، كنت أتجاهل ظهوره دائمًا أمامي، ولكن بمجرد أن ضغطت عليه ضغطة عشوائية وبدأت أول سطر لم أستطع مقاومة تكملته حتى النهاية، على قد الأسلوب الفكاهي الجذاب وخفة الدم اللي خلوني أضحك كثيرًا إلى أن تدمع عيناي حرفيًا، خصوصًا أنه مكتوب بلغة عامية لذيذة جدًا شدتني أقرأ الكتاب كله في جلستين قصيرتين على قد المحتوى المفيد والنظريات العلمية في شتى المجالات اللي فعلًا بتفتّح المخ وقصص الكفاح والنجاح والدراما الإنسانية والحكمة الجميلة الموجودة بكثرة في الكتاب.. وكما قال جلال الدين الرومي: ما تبحث عنه يبحث عنك🌹

كتاب رائع جداً وسلسل وسهل كأنك بتسمع حلقة للدحيح بالظبط وييحكي ازاي بيكتبوا اسكربت الحلقات رازاي البرنامج بدأ ووصل وبتكلم عن فريق العمل خلف الكواليس وبيرد على معظم الانتقادات اللي اتوجهت للدحيح من اول ما بدأ

👏🏼👏🏼 👏🏼

انا احبك

آنـــــــٌتُـــــــ

عظمة كالعادة

💡كتاب الدحيح-ما وراء الكواليس

💡دار النشر: الشروق

💡الكاتب: طاهر المعتز بالله

💡عدد الصفحات: 585

💡نبذة عن الكتاب:

بص يا عزيزي

الكتاب مش بيتكلم عن كواليس أشهر البرامج في الوطن العربي بس، ولا عن صعوبات البدايات والتحديات اللي واجهها، لكن من البداية خالص..

اسمحولي اتكلم بالعامية في المراجعة دي عشان الكتاب كان عامي ولأول مرة ابقي متقبل فكرة ان اقرأ حاجة بالعامية ف أرجو انتوا كمان تتقابلوا ده😊

أحمد وليد الغندور، أو كما يعرف بالدحيح، اللي بدايته كانت في السعودية في أواخر التسعينات، واللي بنعرف من الكاتب ان إسمه كان هيبقي إسلام!! تخيل كده يا عزيزي لو كان عمو وليد سماه إسلام كان ايه مصير البشرية بعد القرار ده؟؟

المهم، أحمد وكعادة أي طفل كان بيحب اللعب والكارتون، ولأن ماكنش فيه حد يلعب معاه ف بدأ يتجه انه يألف قصص ودي كانت من الأسباب اللي كونت شخصيته في سن صغير.

بنشوف تضحية باباه ومامته انهم يستثمروا فيه وفي تعليمه ودخلوه المدرسة الدولية، وبنعرف إزاي احمد كان معتمد علي نفسه من صغره، وأثناء المدرسة كان محب للرياضة

وكسب بطولات ومسابقات تبع المدرسة في الكورة.

بنشوف بداياته مع القراءة وازاي كان منتقي لأنواع الادب اللي بيقرأها، يمكن يبان ده رفاهية او تشدد لبعض الناس اللي ممكن يقولوا يا عم اقرأ كل الأنواع واتطلع، لكن احمد كان محدد وجهته وانه مش مهتم يقرأ في حاجة مش حقيقية، لأنه ببساطة بيحب يكتشف العالم حواليه.

بنحس بدعم باباه لما لقي حبه للقراءة ف بدأ يساعده بإنه يجيب له كتب تاني "القراءة كل ما بتمارسها رغبتك فيها بتزيد مش بتقل" 😉

وازاي الظروف كانت بتتهيأ انه يغوص في عالم القراءة اكتر، من خلال قواعد المجتمع وانه لازم "couples" عشان تدخل المكان، ف مالقاش مكان يحتويه بعزوبيته غير المكتبة يا عزيزي.

وده خلاه يكتب اول قصة قصيرة ويكسب مسابقة للقصص القصيرة، وده بين قدرته علي ربط الأحداث ببعض في تسلسل وتناغم.

وكونه كان بيحب كل ما هو حقيقي عن كل ما هو خيالي ف ده نمي عنده القدرة علي الحكي اكتر، وانه إزاي كان بيستغل كل دقيقة عشان يكلم اهله عن كتاب قرئه.

كونه ماكنش تامر حسني الدفعة ولا الموس بتاعها خلاه يخلق لنفسه هوية عشان ينتمي للمجموعة، ف بقي المثقف بتاع الدفعة، كمثال حي لإسترانيجية المحيط الأزرق او Blue ocean strategy.

وبعد كده ننط لمرحلة الجامعة وما تحتويه من غموض بتاع هنخش كلية ايه؟ اللي كلنا مرينا بيها، وبالفعل غندور دخل الجامعة الأمريكية اللي كان ليها نصيب كبير اوي في تكوين شخصيته بسبب الانفتاح اللي بتتمتع بيه.

وبعد فترة في الجامعة، هيحصل موقف هيغير شكل المحتوي التعليمي في الوطن العربي.. مسابقة "FAME LAB"

وبالرغم من اختياره لموضوع معقد مقارنة بمدة المسابقة بس استرجع اللي اتعلمه من "ايريك لاندر" انه يحول التعقيد ده علي شكل قصص، وعبقريته في انه يستغل حدث رياضي مهم في الفترة دي كنا بنتعاير بيه لحد كأس العالم 2018😂 عشان يمهد لقصته.

وازاي استغل المسابقة في انه يزرع بذور البداية في تربة الدحيح. التربة الخصبة اللي اكيد هيقابلها عواصف وعوامل تعرية وأمطار🌧️⛈️

لكن تعالي نشوف إزاي قدرت تتغلب علي كل ده وبقت وصاحبة المقدمة الاشهر "اهلا وسهلا بكم في حلقة جديدة من برنامج الدحيح" ❤️

💡نقاط أعجبتني:

-الغوص في رحلة غندور من البداية خلق نوع من الترابط الغير مرئي بقيت حاسه قريب منك اكتر، أو صاحبك كده وده كسر خالص اي ملل في القراءة.

-توضيح الجوانب الحسنة والسيئة في القراءة، ف كان فيه نوع من الأمانة، مش موضح لك ان القراءة دي غذاء العقل وبس، لا وضح كمان تأثيرها علي غندور في الدراسة.

- اعجبني منطقيته حتي في حب المواد، وان له أسبابه مش مجرد اني بكره المادة الماث ف مفيش قدامي غير البيولوجي، لا كان فيه اسباب لتلك العلاقة وبالتالي ده اللي خلاها تقوي اكتر.

-إصراره في انه يحب اللي بيعملوا وواثق فيه، وانه مستمع ممتاز، وبيترك مساحة للناس بدون الحجر علي آرائهم وده خلق عنده مفاهيم اكتر ووسع مداركه.

-التطور الشخصي في حياته علي مدار سنين دراسته، من شخص مش لاقي حد يلعب معاه وهو طفل، لإعتماده علي نفسه في ابتدائي، لشخصيته الاجتماعية المندفعة في ثانوي.

-حسيت بترابط شخصي بيني وبينه لانه مر بظروف شبهي شوية ولو مش كلها بس حتي إصابته كانت زيي ف حسيت انه شبهي كده وده قوي برضو اواصر معينة خليتني ماشوفهوش الدحيح زي الاول.

-اتعلمت خبرات حياتية وعرفت معلومات عن الجامعة الأمريكية والمجتمع ده شكله ايه، بطريقة ماكنتش هستوعب بيها الجزء ده غير كده.. بالحكي.

💡التقييم: 5/5

#فنجان_قهوة_وكتاب

#حصاد_العام

#مسابقة_حصاد_العام_مع_أبحد_وجروب_فنجان_قهوة_وكتاب

#الدحيح

الكتاب الرابع

اسم العمل:الدحيح - ما وراء الكواليس

الكاتب: طاهر المعتز بالله

عدد الصفحات:262 أبجد

صادر عن:دار الشروق

التقييم:⭐⭐⭐⭐⭐

(مراجعة بالعامية)

الكتاب مش بس بيتكلم عن كواليس البرنامج ،لكن بيحكى من البداية خالص ..

السعودية في التسعينات، من وقت ما "عمو وليد الغندور" خلف ابنه الكبير وكان عايز يسميه "اسلام"، وربنا ستر وسماه أحمد ،"أحمد وليد الغندور" الشهير (بالدحيح)واللى كان كأى طفل بيحب الكارتون والالعاب بس لأنه الابن الأكبر مكنش في حد بيلعب معاه فكان بيألف قصص وده كان أول الأسباب اللى كونت شخصيته...

🌹بنشوف علاقته بأهله، وبالذات باباه وحبه ودعمه المتواصل ليه (حبيت جدااا عمو وليد الغندور وحبه لأولاده واستثماره في مستقبلهم) وإزاي استثمار فى تعليم أحمد ودخاله المدرسة الدولية ،إزاي غندور كان معتمد على نفسه وأثناء الدراسة كسب بطولات ومسابقات رياضية..

🌹بنحس بدعم باباه لما شجعه على القراءة وبدأ يساعده ويجيب له كتب تانية (القراءة كل ما بتمارسها، رغبتك فيها بتزيد مش بتقل)، وهو كان منتقى لانواع الادب اللى بيقرأه وانه مش مهتم يقرأ حاجة مش حقيقية لكن بيحب يكتشف العالم حواليه، والظروف كانت بتساعده اكتر بسبب قواعد المجتمع مالقاش مكان يحتويه غير المكتبة، وده نمى عنده القدرة علي الحكى والكتابة وخلاه يخلق لنفسه هوية "مثقف الدفعة" (بجد انبهرت بمدى حبه الغير محدود للتعلم طول الوقت)

ولما وصل لمرحلة هندخل كلية ايه وقع اختياره على الجامعة الأمريكية اللى كانت ليها نصيب كبير فى تكوين شخصيته (بالإضافة لجروب ندوات واكلات 😂)

وتيجي مسابقة "FAME LAB" اللى هتكون التربة الخصبة اللى يزرع فيها بذرة " الدحيح" لما يستغل جون مجدى عبد الغنى علشان يمهد لموضوع معقد ويحوله لقصص ممتعة ومن هنا تبدأ رحلة مكنتش سهلة ولا مفروشة بالورد يا عزيزى

📎رأيي والنقاط اللى عجبتني

( الكتاب كان فاصل لطيف جدا بعد كمية الفلسفة اللى قرأتها الفترة اللى فاتت) بداية معرفتى بالدحيح كانت من سنة (أن تأتى متأخراً خير من أن لا تأتي أبدا) ومن وقتها وهو رفيق دايما ليا فى المطبخ وبسمع الحلقات اللى فاتت والحلقات اللى جاية 😅😂

🌲 أسلوب الحكي فى الكتاب ممتع جدا جدا محستش بنفسي غير وهو بيخلص فى ترابط غريب خلقه الكاتب وكأنه واحد صاحبى وقاعدين بنحكى ومش حاسيين بالوقت وده كسر الملل والعامية خلقت جو جميل جدا

🌲 اتعرفت على جوانب جديدة في شخصية الدحيح بالذات الجانب العائلى والإنسانى بعيد عن المحتوى

عجبني جدا شخصية والده وأتاثرت بدعمه ليه لما اخده وراح برج القاهرة وقاله انه واثق فيه وفى اختياراته وأنهم دلوقتى فى أعلى قمة ويتمنى يشوفه فى أعلى مكانة

واتاثرت ببكاء باباه وهو مش عارف يعمل ايه وابنه بيتم تكفيره قدام عنيه ،قد ايه ده موقف صعب على أى أب وأم معندهمش اغلى من ولادهم (ياريت ده يخلى الناس تعيد حساباتها)

🌲 على عكس ما بنشوف غندور طول الوقت بيتكلم فى الحلقات لكنه بشهادة الجميع مستمع جيد جداً وبيحب يسمع اكتر ما يتكلم

🍁 برشحلك الكتاب يا عزيزي لانه يستحق والرحلة حلوة وممتعة ومليانة تفاصيل وصعود وهبوط وإصرار وروح الفريق فيه جميلة جدااا وبينهم شئ مشترك وهو حب العلم و المعرفة. #حصاد_العام

#أبجد

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب

الدحيح

❞ إذا أردت أن تصنع فيلما واحدا فاكتب عن باتمان

‫ وإذا أردت أن تصنع سلسلة تستمر لعقود فاكتب عن الأفنجرز

‫ وإذا أردت ألا تصنع شيئا

‫ فاكتب كتابك وابقى خد الزبالة معاك وانت نازل ❝

لماذا الدحيح أحمد الغندور ؟

لانه شاب مثلنا تماماً مر بكل ما مررنا به

بداية من احساس الضياع والتشتت وانك عاوز تعمل حاجة زى الناس المهمة اللى هناك دى

ومش عارف

الى ان تصبح مهم زى الناس المهمة وتبقى هناك معاهم

حياتنا المتغيرة كل يوم

كل يوم يظهر لنا ترند وكل يوم يظهر اختراع

وكل يوم حياتنا بتتشكل

النجاح أصبح عبر الإنترنت ، والناجح الكل يراه

العلم نور ولكن نورنا يكاد ينير حجرتنا فقط

بما اننا فى جروب ثقافى كام واحد فى عيلتنا بيقرأ ؟

فالشاب الذى قرأ وتعلم ومر بكل ما مررنا به

فجيلنا لم يكن لديه قدوة مننا

ولكن عند ظهور شاب

نجح فى تبسيط العلم وظهر فى منصة نشاهدها كل يوم

ليعرفنا مالم نكن نعرفه

وينجح معنا

الكاتب نجح فى اظهار الجانب الانسانى فى حياة احمد الغندور

ونجح أيضاً فى زرع الأمل فى قلوبنا ان نتعلم

ونواكب العصر ونشارك ما نتعلمه مع اصدقاء لهم نفس ميولنا

فحتى جروب فنجان قهوة وكتاب

فهو رمز للنجاح

فنحن نقرأ ونكتب عن ما نقرأه ونشاركه معاً

حتى نتشارك المعرفة ونتشارك النجاح

شكراً طاهر انك ابرزت شخصية مننا شعرت بكل ما شعرنا به

بداية من اللعب وعدم اللامبالاه الى احساس المسؤلية والنجاح

‏

#أبجد

#الدحيح_ما_وراء_الكواليس

#طاهر_المعتز_بالله

#نجم_الاسبوع

#حصاد_العام

#مسابقة_حصاد_العام_مع_أبجد_وجروب_فنجان_قهوة_وكتاب

#فنجان_قهوة_وكتاب

كتاب حلو جدا ومفيد في معرفة تفاصيل تجربة ناجحة زي برنامج الدحيح ومش بس البرنامج لكن كمان فريق العمل وازاي قصصهم فيها كفاح قبل ما يتقاطع طريقهم مع البرنامج وأحمد الغندور.

برغم إني مبحبش الكتب بالعامية لكن الكتاب هنا حافظ على أسلوب الدحيح في الحلقات وخلاني أحس أني بقرا سكريبت حلقة من الحلقات ودا قربني اكتر للكتاب والبرنامج.

النسخة الصوتية سمعتها بعد ما قرأت الكتاب ولقيت نفسي بعيده كله تاني لأني حسيت إني بتفرج فعلاً على حلقة للدحيح بتلقائيته وارتجاله وأسلوبه.

الكتاب حقيقى أكثر من رائع مجهود كبير و محترم و أضاف ليا متعة كبيرة انى اعرف اللى وراء الكواليس لاكتر برنامج بحبه و بقدر كل القائمين عليه ..كانت رحلة ممتعة فى القراءة و الاستماع كمان و كما ذكرنا غندور "الكنز فى الرحلة "

كتاب جميل،، خفيف،،غنى

📚اسم الكتاب: الدحيح

📚اسم الكاتب: طاهر المعتز بالله

📚عدد الصفحات: 616

📚خلينا متفقين على أن برنامج الدحيح كان فى فترة ما مشهور اوى والكل كان بيتكلم عليه ومستحيل تفتح اى تطبيق من التطبيقات وميطلعش قدامك مقطع للبرنامج وبالرغم من نجاح البرنامج محدش سأل مين احمد الغندور اللى فى الوقت ده حديث الناس وفى الكتاب ده الكاتب( طاهر المعتز بالله عرفنا ) عرفنا على احمد الغندور مقدم برنامج الدحيح وطبيعة العلاقة بينهم كانت ايه وان هو ازاى انضم للبرنامج وبقى من ضمن فريق الكتابة بتاع البرنامج .

📚الكاتب بيحكى عن حياة احمد الغندور من وقت ميلاده فى السعودية ودخوله المدرسة هناك وزيهم زى اى أسرة مغتربة كانوا بينزلوا بلدهم المنصورة فى الإجازات بدأ احمد القراءة بسبب والده لأن هو كان بيشجعوا باستمرار أن هو يقرأ وبالفعل أصبح احمد من مدمنين القراءة وبقيت المكتبة المكان المفضل ليه ويمكن ده اللى أثر على علاقاته الاجتماعية .

📚بدأنا نتعرف أكثر على حياة احمد وفترة المراهقة بتاعتوا اللى كانت مختلفة عن الكثير من أصدقائه لأن احمد لما رجع من الإجازة اللى كان بنزل فيها مصر لقى أن هو هيبقى عندوا وقت فراغ كتير وعكس اكتر الشباب فكر احمد ازاى يستغل الفراغ ده وبدأ يدور على كورسات مجانيه وياخدها وبسبب الكورسات ديه احمد عرف وفهم حاجات كتير جدا كانت حواليه ومكنش يعرف عنها حاجة

📚تفوق احمد الدارسى كان سبب لدخوله الجامعة الأمريكية وهناك بدأ مرحلة جديدة فى حياة احمد الغندور حياة كلها أنشطة ومغامرات والحاجة اللطيفة فى حياة احمد فى الجامعة هو أن كل ما يشوف بنت ويعجب بيها مكنش يروح يكلمها كان يشوف هى شاطرة فى ايه ويروح ياخد كورس فيه علشان يعرف يتكلم معاها ويبقى فى بينهم حاجات مشتركة فضلنا مع حياة احمد شوية لحد ما وصلنا الى ازاى بدأت فكرة برنامج( الدحيح ) احمد كان عندوا مسابقة فى الجامعة وهى انك تحضر موضوع علمى وتشرحها فى تلت دقائق بس احمد خسرفى المسابقة ديه وده كان السبب اللى خلى احمد يبدأ برنامج الدحيح نزل احمد اول حلقه من البرنامج وعلى الرغم من أن الحلقة جابت مشاهدات مش كتيرة بس ده موقفش احمد بالعكس ده خليه يدور اكتر ويعرف اكتر ويطور مستوى البرنامج علشان يقدم حلقات جديدة فى مواضيع يمكن محدش اتكلم عنها قبل كدة .

📚استمر الكاتب فى التحدث عن البرنامج والحلقات اللى كان بيقدمها وازاى كانوا بيشتغلوا على الحلقات والأفكار ديه والمشاكل اللى كان بيواجهة البرنامج وخصوصاً مع سفر أحمد إلى الصين وعدم وجود احمد بشكل دائم فى مصر وده كان السبب اللى خلى احمد يفكر ينشأ فريق كتابة للبرنامج وكان من ضمن الفريق ده طاهر المعتز بالله .

اتعرفنا على كل كاتب كان بيتضم للبرنامج على الرغم أن ده كان بيحصل بشكل سريع بس رغم كدة الكاتب كان يعتبر بيذكر كل حاجة عنهم وعلى الرغم من أن كل كاتب كان يكتب حاجة مختلفة علشان ترضى جميع الاذواق عند الناس إلا أن مكنش بينهم تنافس من يبقى الافضل بالعكس كل واحد كان مميز جدا فى المكان اللي بيكتب فيه وكل واحد كان هموا نجاح البرنامج علشان ده نجاحهم كلهم مش نجاح احمد بس

📚برنامج الدحيح كان بيقدم افكار يمكن محدش اتكلم عنها بالشكل ده وعلى الرغم من نجاح البرنامج اللى باقى ليه قاعدة جماهيرية كبيرة كبيرة وبقى الناس بيستنوا الحلقات الجديدة إلا أن ده ممنعش أن البرنامج يتهاجم .

📚رحلة طويلة حكى فيها الكاتب عن كواليس برنامج الدحيح من أول بداية الفكرة وكواليس العمل على البرنامج والحلقات وتكوين فريق خاص بيه لحد ما وقف البرنامج وبطل يتعرض

الكتاب ده مكنش رحلة فى حياة احمد ولا عن البرنامج بس لا ده كمان كان رد على كل اللى انتقد وهاجم البرنامج .

📚السبب اللى خلى الكتاب خفيف بالشكل ده هو الأسلوب الشيق والممتع واللغة البسيطة اللى الكاتب استخدمها فى الكتابة .

📚وفى الاخر الكتاب عبارة عن دعم بيقولك أن مهما كانت ظروفك وامكانياتك متوقفش سعى لان مهما واجهت عقبات ووقعت مسيرك هتقوم تانى وتنجح وان من المهم جدا انك حتى لو بتفكر بره الصندوق متخفش من رد فعل الناس لأن إيمانك انت بنفسك وبفكرتك هتخلى الناس تصدق ده

📚اقتباسات من العمل

❞ والإحباط لا يقل خطورة عن تدهور الاقتصاد

‫ وبما إن الناس كلها بتشيّر أخبارها الوحشة بس

‫ مهم نكسر سواد اللوحة بشوية بياض

‫ حتى وإن كان مجرد نقطة صغيرة

‫ الأمل مهم

‫ والأمل هنا أمل حقيقي ❝

‏

❞ والحكي في حد ذاته على قد ما هو موهبة

‫ على قد ما هو حرفة بيتم تحسينها زي أي حرفة بالاستمرار والممارسة

‫ حكاية ورا حكاية ورا حكاية

‫ بيعلموك إزاي ترتب الاحداث وتربطهم ببعض

‫ وإزاي تركز على نقطة مهمة وتعدي بسرعة على نقطة تانية أقل أهمية ❝

‏

❞ ‫ وعشان حد يتعلم حاجة ويفهمها بعمق محتاج يدور ويقرا ويتفرج بنفسه ❝

❞ استخدام القصص كأداة لتوصيل المعلومات يعتبر أحسن طريقة للتدريس لأن الطلبة بيفضلوا مركزين طبقا لإحدى الدراسات تقديم المعلومة في صورة قصة بيتسبب في زيادة القدرة على استدعائها بنسبة ٤٠٪ أكتر من لو تم تقديمها كنقط منفصلة ❝

‫

❞ ‫ الكاتب الشاطر هو اللي يوصل أكبر كم من المعاني بأقل قدر من الكلام ❝

‏❞ ‫ أشياء كتير بناخدها كمُسلمات ومابنعرفش قيمتها غير لما بنبعد عنها ❝

❞ الكبر والغرور هو بداية النهاية لأي شخص مهما كان في كل زمان ومكان ❝

‏

❞ الدرس الثالث هو إن زي ما في قصص نجاح بتتولد من رحم المعاناة والصراع مع الأهل

‫ في قصص تانية بتنجح بسبب دعم الأهل وتشجيعهم ❝

#الدحيح_ما_وراء_الكواليس

#طاهر_المعتز_بالله

#حصاد_العام

#أبجد

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب

اسم الكتاب// الدحيح .ما وراء الكواليس

اسم الكاتب//طاهر المعتز بالله

دار النشر//الشروق

عدد الصفحات//٥١٤

تقييم الكتاب//⭐⭐⭐⭐

القراءة إلكترونية على أبجد

📄العنوان// مناسب لموضوع الكتاب فالكتاب يتكلم عن برنامج الدحيح و مؤسسه احمد غندور

🧧الغلاف// بسيط و عليه صورة صاحب فكرة الدحيح .

لمن يناسب هذا الكتاب//الى كل من يريد معرفة أكثر عن برنامج الدحيح و يريد معرفة حقيقة ما حدث بخصوص اتهامهم بالالحاد و غيرها من المشكلات التي واجهتهم فى البرنامج و كيف استطاعوا مواجهتها و بعض النصائح الهامة لتبدأ مشروعك الخاص .

الأسلوب و اللغة//

الكاتب استخدم اللغة العربية و العامية المصرية البسيطة و اللغة الإنجليزية و الكتابة الانجليزيه بحروف عربية.اسلوب الكاتب بسيط به بساطة و مرح خفيف .

عن الكتاب //

الكتاب يدور حول غندور من مرحلة زواج والديه إلى ما وصل إليه مرورا بحياته فى السعودية و كيف أثرت عليه الوحدة هناك و جعلته ما هو عليه الآن من علم و إلمام بالمعلومات التي ساعدت الوحدة فى تكوينها بدل الدخول فى اكتئاب أو حزن .و ركزت على دعم والديه و ثقتهم به و بقراراته حتى فى دخول الجامعة التى هى من الأهمية بما كان عند الأسر المصرية.و لم يجبروه و لكن قدموا النصيحة التى يروها و تركوا القرار له .و عندما انتقل إلى الجامعة الأمريكية في مصر ،كانت مرحلة أخرى من حياته اكتسب فيها مهارات مختلفة أثقلت شخصيته .و بعدها تكلم الكاتب عن مراحل البرنامج الشهير الدحيح و كيف بدا و كل ما مر به إلى وقت إيقافه مؤقتا .و كيف كان لأفراد الفريق الدور فى نجاحه و انتشاره و كيف أنهم نجحوا فى مشاريعهم الخاصة فكانت تجربة أثقلت شخصياتهم جميعا .

أكثر ما أعجبنى فى الكتاب // اسلوب الكاتب الشيف فى سرد المعلومات الشخصية و العلمية بطريقة مبسطة و خفيفة .

الكاتب نجح فى توصيل الفكرة بشكل جيد و لكننى شعرت أن

كان يمكن أن يكون أفضل أن تكون اللغة العربية سردا افضل و التقليل من المصطلحات الإنجليزية و إلغاء تماما كتابة اللغة الإنجليزية بحروف عربية و هو ما يسمونه بالفرانكو أراب ، حتى يتناسب الكتاب مع الجميع و ليس جيل الجديد الذي أصبح لا يميز فى كلامه بين اللغات.

خلال القراءة أحسس القلق أن يعتمد هذا التداخل بين اللغات فى الكتب الموجهة لجيل لم يعد يعتمد اللغة العربية فى حديثق و يقاس مستواه العلمى و الاجتماعى بمقدتر المامه و تحدثه باللغة الإنجليزية .

أفكار مهمة لخصها الكتاب//

❞ التغلب على الشك والبدء بالفعل ضروري لعمل أي حاجة في الدنيا ❝

❞ اعمل اللي تقدر عليه وهتلاقي خطوط ابتدت تفتح قدامك ❝

❞ ‫ «ما تبحث عنه يبحث عنك ❝

❞ جملة الجمهور بيحب المحتوى الرديء دي أسطورة بيروّجها صُناع المحتوى الرديء ❝

اقتباسات//

✒️❞ ‫ خد الهدوء وحسن الاستماع وحب القراءة من باباه

‫ وخد حس الفكاهة وحب الموسيقى من مامته وخد الطيبة من الاتنين اللي كانوا مصممين إنهم مايوفروش أي جهد أو فلوس ❝

✒️❞ المشكلة إن أوقات اللي مابيحبش يزعل حد ده الناس هي اللي بتزعله ❝

✒️❞ ‫ ده إلى جانب إنه بيحب الناس ومابيحبش يخسرهم وعشان كده في أي صراع بيفضّل يبقى على الحياد‫ لإيمانه الشديد بأن كل صراع في العالم بينبع من افتراض الفهم الأفضل ❝

الخاتمة//

كل واحد محتاج يبدأ من غير تسويف أو خوف لأنهما أداتا للفشل . ابدأ و ثق فى نفسك و ربك فالله أمرنا بالسعي و ليس علينا ادراك النجاح والتوفيق من وحده و كثيرا ما نحتاج الدعم من الأهل و الأصدقاء فاسمع لهم إذا شجعوك و أن أحبطوك فابتعد و قرر ما تراه مناسبا حتى لا تندم على عدم التجربة حتى لو فشلت فهذه خطوة لنجاح قادم بإذن الله.

اعرف الحقيقة بنفسك و لا تثق بأى أحد يكفر شخص آخر لانه اصبح سهل على البعض الحكم على الآخرين دون مناقشتهم حتى و معرفة مقصدهم .

#حصاد_العام

#أبجد

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب

"مشروع صيف ٢٠٢٣ مع قراءات السيرة الشخصية لناس  أود أن أعرفهم أو أعرف أكثر عنهم، أو أشخاص أثرت في تاريخ البشرية ولا أعرف عنهم شيئا"

أعرف عن برنامج الدحيح من زمان، ولكن لم أشاهد أي حلقة له، لكوني من محبي المحتوى المكتوب أكثر من المرئي، ولكن من خلال السوشيال ميديا وصلتني أصوات عنه، والجدل الذي أثير عنه دينيا، فلما وجدت هذا الكتاب رأيت أنه يناسب هدف مشروعي لأتعرف على شخصية جديدة.

الكتاب يحكي قصة حياة أحمد غندور، الذي أحب القراءة من نعومة أظافره ووصل به هذا الحب لإدمان المعرفة، واتخذ طريقا في الحياة يهدف لتوصيل وتبسيط العلوم للعامة من خلال منصات السوشيال ميديا، مستخدما صناعة المحتوى لعصر الكتب وتلخيص دراسات وموسوعات عن موضوع معين في كل حلقة، بإسلوب بسيط وممتع وسريع بدون ملل...

بدأ الدحيح رحلته بفيديو جمع ٥٠ مشاهدة، ولكنه لم يحبط ولم يتوقف، ظل يسعى خلف حلمه حتى تصدر "الترند" وقارب حجم مشاهداته المليار مشاهدة!

طبعا هذه الرحلة وهذا النجاح لم يكن جهدا منفردا لغندور، ولكن الدحيح كان خلفه مجموعة عمل متميزة قوامها غندور الذي جمع حوله أشخاص لهم مواهب مختلفة ويجمعهم نفس الشغف لخلق محتوى هادف وفريد ينشر المعرفة.

رحلة نجاح الدحيح صعبة ومليئة بالتحديات ولحظات إحباط وحوائط سد تنذر بنهاية الدحيح، ولكن غندور والمجموعة لم يستسلموا وقاموا بفتح أبواب في كل حائط منهم ليعبروا من نجاح الى نجاح، ولازالت الرحلة مستمرة.

الكثير من الناس لا يعرفون الجهد والكفاح المبذول خلف أي نجاح، وخصوصا في حالات المؤثرين على السوشيال ميديا، فالبعض يعتقد انها "شغلانة سهلة" وفلوس من غير تعب، لايستطيع الكثير تخيل أن الفيديوهات التي يتم نشرها ومدتها دقائق معدودة، تأتي بعد تحضير ساعات وأيام وممكن شهور كمان، وأن الحفاظ على النجاح أصعب من النجاح نفسه. ما نراه هو قمة جبل الجليد.

أسعدني التعرف على غندور ومجموعة عمل الدحيح، وقد شجعني الكتاب على أن أشاهد الفيديوهات التي ذكرت في الكتاب كنقط محورية لمراحل نجاح أو مصادر جدل في رحلته.

كتاب مفيد لمن يريد التعرف على الدحيح خلف الكواليس كما يقول العنوان، وأيضا لمن يريد التعرف على صناعة المحتوى وعالم المؤثرين...

محمد متولي 

قرات الكتاب نسخة ورقية في يناير 2023

وقبل ذلك سمعت جزء كبير منه ككتاب صوتي. اسلوب الكاتب رائع و جميل وحتى استخدامه للكتابة بالعامية المصرية لم يخل بمحتوى الكتاب او السرد فيه. تفهم قصة البرنامج و قصة المقدم و ان وراءه فريق عمل يعمل بشكل تكاملي رائع . استمتعت بالكتاب فهو قصه مشوقه سردت بالسهل الممتنع.

كواليس برنامج الدحيح من نقطة البداية و بمراحل تصاعدية لوصوله الى قمة برامج صناعة المحتوى

❞ عزيزي المُشاهِد أيًّا كانت قدراتك وأيًّا كان موقعك

ابدأ أينما كنت

وتذكّر إنه على الرغم من إن الجملة كليشيه واتهرست في ميت فيلم قبل كده

إلا إن حقيقي «الكنز في الرحلة»

والرحلة اللي داخلة على المليار مشاهدة

‫ بدأت بشاب عمل فيديو جاب ٥٠ مشاهدة بس

‫ لكنه قرر يكمل للآخر ❝

خلصت كتاب اللي هو رحلة لحياة ناس كتير وبشكل أكبر أحمد الغندور لحد برنامج الدحيح والكتاب عامل زي الغوص في البحر وأنت بتستكشف أنواع سمكاته المختلفة والمبهرة للعين✨

تفتكر إزاي بدأ الدحيح!؟

هل الدحيح كبرنامج بيمثل أحمد الغندور نفسه؟

مين وإيه اللي خلى البرنامج لدلوقتي موجود بل بتوسع وانتشار ونجاح رغم المعوقات والكثير من الهجوم على البرنامج من بدايته حتى الآن!

إزاي التعاون قدر يشكل برنامج ناجح ومميز زي برنامج الدحيح، اللي شخصيًا متفرجتش عليه كتير بس البعض القليل اللي اتفرجت عليه كان مبهر، لدرجة أني كنت وقتها اقدر اقول المعلومات اللي اتقالت في الفيديو اللي حضرته من أول مشاهدة بنسبة ٥٠٪ ودي مجرد مشاهدة واحدة مش تعمق وتركيز كبير!

أحمد الغندور شخص ملهم، مثابر، مثقف، بيحب يتعلم، بس مش بيحب يغير العالم😂.

كتاب الدحيح هو معمول بشكل حلو وكمان لو جربتوا الصوتي بتاعه اللي بصوت أحمد الغندور نفسه على إحدى التطبيقات الصوتية هتحبوه أوي، بنفس طريقته في الفيديوهات بتاعته😂💜

العمل ككتابة عجبني تقنية كتابة كأنه سكريبت زي الاسكريبتات اللي في البرنامج نفسه.

فيه ناس كتير أوي زي ما توقعت ورا نجاح البرنامج دة وضحهملنا الكاتب من خلاص لقطات طويلة أو قصيرة لهم في الكتاب.

*واجب التنويه أن الكتاب مكتوب بالعامية، وأنا حبيته بسبب الصوتي بتاعها أكتر، يعني كنت بقراها واسمعها في نفس الوقت💃👀

العمل الأول الكتروني✨

‏#حصاد_العام

#أبجد

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب

#الدحيح_ما_وراء_الكواليس

#طاهر_المعتز_بالله

#قراءات_٢٠٢١

#الكتاب_التاسع_والسبعون

كتاب الدحيح ما وراء الكواليس للكاتب طاهر المعتز بالله.

من إصدار دار الشروق.

رحلة مع كتاب لذيذ بيحكي قصة نجاح برنامج الدحيح لأحمد الغندور ، بداية الحكاية مع الغندور نفسه نشأته ، طفولته و شبابه ، فكرة البرنامج و ازاي استثمر أحمد موهبته و حبه للقراءة خاصة المحتوي العلمي في انه يبدأ مشروعه ع اليوتيوب ، رحلة الصعود من بداية صغيرة لمنظومة متكاملة ناجحة انها توصل لعدد كبير من المتابعين.

الجميل ان الكاتب في وسط الحكاية عرض و ركز علي نقط مهمة جداً و اساسية لنجاح أي عمل خاصة لو بيقدم محتوي مختلف :-

- دعم الأهل لأولادهم مهم و أساسي جداً ، إيمانهم الفعلي بقدراتهم و مواهبهم حقيقي بيعمل اختلاف كبير و بيكون له عظيم الأثر في رحلة نجاح الاولاد.

- دايما البداية بتكون صعبة و بتحتاج مننا صبر كتير و كل ما تجاوزنا صعاب كل ما فرحنا اكتر بلحظة الوصول.

- العمل بروح الجماعة و الفريق و التفاني و الاخلاص أساسي لنجاح أي منظومة.

- أي شغل في الدنيا لازم يكون فيه فترات هبوط و صعود ده الطبيعي و ده زي ما ممكن يكسرنا و يخوفنا ممكن كمان يدفعنا و يزقنا لقدام.

الكاتب استخدم لغة عامية سهلة لا تخلو من قدر كبير من السخرية و القلش و ده بيسهل وصول الكتاب لفئات كتير خاصة جيل المراهقيين و الشباب الصغير المفتون بقصص النجاح الكتير اللي مغرقة السوشيال ميديا و اللي كتير منها للأسف دون المستوي و لا يستحق الضجة المعمولة حواليه.

كتاب ممتع دمه خفيف استمتعت به خاصة اني كنت محظوظة بسماعه بصوت أحمد الغندور علي تطبيق ستوري تل.

#ريفيوهات_مكتبة_وهبان

#الدحيح

ا

إسم الكتاب..الدحيح ما وراء الكواليس

إسم الكاتب.. طاهر المعتز بالله

دار النشر..دار الشروق

تاريخ النشر ٢٠٢١

عدد الصفحات ٥٤١

التقييم.. ٣

الكتاب حلو ومكتوب بلغة سهلة وبسيطة وتحس إنك بتقرأ بصوت الدحيح ودي ميزة إن بطل الكتاب عارفينه وشايفين فيديوهاته..

المهم..

الكتاب بيحكي قصة أحمد الغندور كلها وهي فعلاً قصة كفاح لأنه كان طفل مختلف من الطفولة وذكي جداً واهتماماته غير أصحابه وده بيعرض أي طفل للتنمر..

بيبين دور أسرته في حياته دورهم كان مشجع جداً ويعتبروا سبب مهم لنجاحه..

إيمانهم به وبقدراته..

إختيار التخصص في الجامعة إللي مكنش سهل يحدد هو عايز إيه بالظبط وتعطشه للعلم..

والتحديات إللي واجهته في بداية طريقه لحد ما ظهر والناس بدأت تعرفه..

والكتاب بيبين إن ده مكنش سهل واتعرض لإخفاقات كتير..

جميل إنه دخل الناس في جو صناعة المادة المنشورة كمان وبين أهمية ودور العمل الجماعي والفريق إللي معاه...

#حصاد_العام

#أبجد

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب

بعض الأجزاء كانت مهمة لفهم خلفية البرنامج وبعضها الآخر إطناب لا معنى له ..

الكتاب تكلم عن حياة مقدمً برنامج الدحيح وعن معاناتو في تصوير البرنامج

الفكرة كانت حلوة وواعدة جدا .. ويخرج منها كتاب معتبر، عرض قصة حياة الغندور هتتقاطع أكيد مع قراء كتير من مواليد التسعينات الجميلة وما بعدها، وهيلاقوا فيها في تفاصيل كتير

بس الطريقة اللي خرج بيها الكتاب في اعتقادي مش موفقة خالص .. أولا انه بالعامية .. ثانيًا ان الكلام يكون في نص الصفحة علشان حجم الكتاب يكبر ..

خسارة

الكتاب بكل صراحة خيب توقعاتي. توقعت كتابًا يقدم قصة الدحيح بأسلوب احترافي وسرد ممتع، لكن اللي حصلنا عليه كان أقرب لسكريبت حلقة، أو حتى بودكاست، وليس كتاب بالمعنى الحقيقي.

الأسلوب كان عامي بزيادة، وكأن الكاتب بيحاول يخاطبك كصاحب، وهذا ممكن يعجب البعض، لكن بالنسبة لي ما كان مناسب كفاية لكتاب. فوق هذا كله، كل شوية كلمة إنجليزي هُنا وهُنا، لدرجة ما أستطعت ان أعرف انا بقرأ كتاب عربي أو إنجليزي! نعم بيشرح المصطلحات، لكن هذا لا يعوضني عن الإزعاج اللي سببه هذا الإسلوب.

اللي خلاني أكمل الكتاب هو قصة الدحيح نفسها. قصة ملهمة صراحة وتستحق إنها تُعرض بشكل أفضل من ذلك. ولو كان الكتاب اتقدم بأسلوب أقوى وأكثر ترتيبًا، كان ممكن يطلع تجربة ممتازة.

ولذلك، تقيمي للكتاب نجمتين: واحدة عشان القصة، وواحدة عشان المجهود، والباقي على التنفيذ اللي كان ممكن يصبح أحسن.

أرخص حاجة في عالم الكتابة إنك تكتب بالعامية تحت ستار الرواج و التبسيط، اللي بيكتب كتاب non fiction أو fiction بالعامية يروح يشتغل أي حاجة غير إنه يبقى كاتب محترف، بصراحة عيب جدا إن دار الشروق تنشر كتاب بالعامية.

علي الرغم إني مصرية وعايشة في مصر إلا إني أول مرة أسمع إن فيه برنامج إسمه الدحيح..

جايز جهل مني أو يمكن عشان أنا مش متابعة جيدة لمواقع التواصل الإجتماعي ..بس أياً كانت الأسباب، أنا عرفت عنه لما نزل عليه كتاب..

وبما إن هذا الموقع لتقييم الكتب وليس لتقييم البرامج فالمراجعة هنا لتقييم هذا الكتاب ولا علاقة لها بالبرنامج من قريب أو بعيد أياً كان محتواه...

الدحيح- ما وراء الكواليس...'كتاب' لطاهر المعتز بالله وهو أحد المشاركين في كتابة برنامج الدحيح..

الكتاب بيتكلم عن شخصية مقدم البرنامج أحمد الغندور وكيف بدأ حياته في السعودية ثم طالباً في الجامعة الأمريكية بالقاهرة وبياخدنا الكاتب للتعرف علي بداية البرنامج والصعوبات اللي واجهتهم و بيعرفنا أيضاً علي فريق العمل و إزاي كانوا بيطوروا من نفسهم وبيبحثوا علي أفكار جديدة لتقديم محتوي هادف ومتنوع في نفس الوقت...

طبعاً بالنسبة لواحدة زيي متعرفش أصلاً البرنامج ده عن إيه فكل الكلام اللي في الكتاب كان بالنسبة لي غير مهم بالمرة وحسيت إن الكاتب بيعرفنا بفريق إشتغل مع بيل جيتس !

بس أنا طبعاً مش مقياس ..في ناس غيري من متابعين البرنامج ممكن يهتموا بهذه التفاصيل..

إسلوب الكاتب واللغة اللي إستخدمها من أسوأ ما يكون!!ويمكن يكون من أوحش الكتب اللي قريتها في حياتي كلها..

لغة عامية رخيصة...إسلوب ردئ...الاستعانة بأمثال وكلمات سوقية في كل الكتاب...

البلد اللي خرج منها نجيب محفوظ،يوسف إدريس،توفيق الحكيم ،عباس العقاد و طه حسين جيه اليوم اللي ينزل فيها كتاب من دار 'محترمة' يتقال فيه كلام زي..

محدش عامل كيتو ولا كتاكيتو...!

سايبلي مآسي بدل ما تسيبلي فيلا في مراسي!

البلد اللي طلعت بهاء طاهر،صلاح عيسي،رضوي عاشور،سلوي بكر،منصورة عز الدين و المنسي قنديل ..الناس بقي يعجبها كتب بيتكتب فيها...

بنت الكلب عضتني في إيدي..

اللي حيتهور حيتعور،ركبه الزوحليقة والمعمل ريحته منيلة!!!

ليه بتعملوا فينا كدة؟!

ليه بتقللوا من قيمتنا كدة؟!

ليه بتنزلونا لتحت و إحنا بنحاول نطلع لفوق؟!

يقول الكاتب في الكتاب إنه بيحب القراءة ..الصراحة أنا معرفش إيه نوعية الكتب اللي هو بيقرأها بس سؤالي له، لو حضرتك قارئ زي ما بتقول هل يرضيك تقرأ كتاب بهذه اللغة و هذا المستوي؟!

وزي ما بيقول إنه بيحب القراءة يقول أيضاً إنه بيحب الكتابة وعلي حسب تعبيره ' بس الكتابة لسة ما بتحبنيش..'

نصيحة لوجه الله- من قارئة علي قدها-لو حتستمر بهذا المستوي هي عمرها ما حتحبك...!!

و أخيراً وبنفس إسلوب الكاتب (مش إسلوبي أنا)نسأل هذه الأسئلة...

هل ده عمل أدبي ؟لا أدبي دي -لا مؤاخذة يعني- تبقي خالتك...

هل يستاهل أضيع فيه وقتي؟ وقت ايه يا عم اللي إنت مهتم بيه..صلي علي النبي...

هل يستحق الضجة عليه والتقييمات العالية؟

و علي رأي المطربة القديرة روبي..ده ماس و إحنا كلنا نحاس..هوباااا....!

لا ينصح به ككتاب خفيف أو لذيذ ولا كفاصل بين الكتب التقيلة ...لإنه بمنتهي البساطة مينفعش نقول عليه أصلاً كلمة كتاب...

أنا أحب أسميه حاجة تانية..بس ححتفظ بيها لنفسي !

كتب المقروءة 2

كتاب الدحيح ما وراء الكواليس لـ طاهر المعتز بالله

كتاب خفيف بيحكي مسيرة الدحيح و بدأت تكوينه كبرنامج مشهور بيتابعه الملايين و الآراء و الانتقادات تعرض ليها أحمد الغندور في حياته .

ذكر الكتاب بشكل مميز حياة الأشخاص كان ليهم دور كبير في مواضيع الدحيح و إزاي عملوا بيئة إجتماعية في الاستديو كانت مبنيه اكتر علي حبهم للعلم و عرضهم لمعلومات .

كان الكاتب طاهر واحد منهم بل اسماء شخصيات كتير زي " محمد عيطا / غادة علي / أحمد مجدي " وغيرهم .

حبيت أننا بنتعرف علي ناس كتير و بنعرف مجالات كل واحد منهم و طموحاته بل لحظة وصوله لبرنامج .

حاجة مزعجة بالنسبالي هي كتر الأمثلة و النكت كانت كتير أوي لدرجة بتفصلني عن موضوع ، هي كانت طريفة و كل حاجة بس بردو مزعجة !!

كتاب هيكون ممتع لكل محبين الدحيح و مشجعين ليه عشان يتعرفوا أكتر عن كُتاب الحلقات و يدركوا كم واحد ساهم في إنشاء فيديو كد يبدو بسيط لكنهم عانوا مجهود كبير عشان يوصلهم بالشكل ده !

❞ الكُتاب بقم شلة تربطهم علاقة صداقة قوية

‫ وده على قد ما بيبقى مريح لأعضاء المجموعة على قد ما بيبقى صعب للي بينضم جديد لأنه بيفضل فترة حاسس إنه outsider‫ وبيبقى قاعد كأنه بيتف هورج على حلقة سيتكون‫ مجموعة من طلاب ابتدائي المتحمسين بشدة للمواضيع اللي بيتكلموا فيها وعندهم القدرة على تغيير المواضيع وعدم احترام المواعيد والتهريج اللا نهائي

‫ ووسطهم ميس غادة ماسكة العصاية وبتصارع عشان يلحقوا يناقشوا مواضيع الحلقات الجديدة كلها قبل نهاية الاجتماع‫ تجربة ممتعة ولكنها مرعبة ❝

#حصاد_العام

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب

#أبجد

كتاب تافه جدا. من ناحية السرد فهو لا يرقي حتي لقصاصات مجمعة في صورة مقال. وأما من ناحية المضمون فهو سطحي ولا يستحق بذل عناء وضعة في كتاب ولا حتي مقال. في النهاية أنا حزين علي الوقت الذي ضاع في قراءة هذا الكتاب.

على الرغم ان ماوعد به الكاتب القارئ من البداية تم تحقيقه في نهاية الكتاب ؛إلا أن الكتاب مشتت والإيقاع بطئ هذا بالإضافة إلى اقحام عبارات انجليزية كان مشتت للقارئ . #حصاد _العام#فنجان_قهوة _وكتاب#أبجد