علي الرغم إني مصرية وعايشة في مصر إلا إني أول مرة أسمع إن فيه برنامج إسمه الدحيح..
جايز جهل مني أو يمكن عشان أنا مش متابعة جيدة لمواقع التواصل الإجتماعي ..بس أياً كانت الأسباب، أنا عرفت عنه لما نزل عليه كتاب..
وبما إن هذا الموقع لتقييم الكتب وليس لتقييم البرامج فالمراجعة هنا لتقييم هذا الكتاب ولا علاقة لها بالبرنامج من قريب أو بعيد أياً كان محتواه...
الدحيح- ما وراء الكواليس...'كتاب' لطاهر المعتز بالله وهو أحد المشاركين في كتابة برنامج الدحيح..
الكتاب بيتكلم عن شخصية مقدم البرنامج أحمد الغندور وكيف بدأ حياته في السعودية ثم طالباً في الجامعة الأمريكية بالقاهرة وبياخدنا الكاتب للتعرف علي بداية البرنامج والصعوبات اللي واجهتهم و بيعرفنا أيضاً علي فريق العمل و إزاي كانوا بيطوروا من نفسهم وبيبحثوا علي أفكار جديدة لتقديم محتوي هادف ومتنوع في نفس الوقت...
طبعاً بالنسبة لواحدة زيي متعرفش أصلاً البرنامج ده عن إيه فكل الكلام اللي في الكتاب كان بالنسبة لي غير مهم بالمرة وحسيت إن الكاتب بيعرفنا بفريق إشتغل مع بيل جيتس !
بس أنا طبعاً مش مقياس ..في ناس غيري من متابعين البرنامج ممكن يهتموا بهذه التفاصيل..
إسلوب الكاتب واللغة اللي إستخدمها من أسوأ ما يكون!!ويمكن يكون من أوحش الكتب اللي قريتها في حياتي كلها..
لغة عامية رخيصة...إسلوب ردئ...الاستعانة بأمثال وكلمات سوقية في كل الكتاب...
البلد اللي خرج منها نجيب محفوظ،يوسف إدريس،توفيق الحكيم ،عباس العقاد و طه حسين جيه اليوم اللي ينزل فيها كتاب من دار 'محترمة' يتقال فيه كلام زي..
محدش عامل كيتو ولا كتاكيتو...!
سايبلي مآسي بدل ما تسيبلي فيلا في مراسي!
البلد اللي طلعت بهاء طاهر،صلاح عيسي،رضوي عاشور،سلوي بكر،منصورة عز الدين و المنسي قنديل ..الناس بقي يعجبها كتب بيتكتب فيها...
بنت الكلب عضتني في إيدي..
اللي حيتهور حيتعور،ركبه الزوحليقة والمعمل ريحته منيلة!!!
ليه بتعملوا فينا كدة؟!
ليه بتقللوا من قيمتنا كدة؟!
ليه بتنزلونا لتحت و إحنا بنحاول نطلع لفوق؟!
يقول الكاتب في الكتاب إنه بيحب القراءة ..الصراحة أنا معرفش إيه نوعية الكتب اللي هو بيقرأها بس سؤالي له، لو حضرتك قارئ زي ما بتقول هل يرضيك تقرأ كتاب بهذه اللغة و هذا المستوي؟!
وزي ما بيقول إنه بيحب القراءة يقول أيضاً إنه بيحب الكتابة وعلي حسب تعبيره ' بس الكتابة لسة ما بتحبنيش..'
نصيحة لوجه الله- من قارئة علي قدها-لو حتستمر بهذا المستوي هي عمرها ما حتحبك...!!
و أخيراً وبنفس إسلوب الكاتب (مش إسلوبي أنا)نسأل هذه الأسئلة...
هل ده عمل أدبي ؟لا أدبي دي -لا مؤاخذة يعني- تبقي خالتك...
هل يستاهل أضيع فيه وقتي؟ وقت ايه يا عم اللي إنت مهتم بيه..صلي علي النبي...
هل يستحق الضجة عليه والتقييمات العالية؟
و علي رأي المطربة القديرة روبي..ده ماس و إحنا كلنا نحاس..هوباااا....!
لا ينصح به ككتاب خفيف أو لذيذ ولا كفاصل بين الكتب التقيلة ...لإنه بمنتهي البساطة مينفعش نقول عليه أصلاً كلمة كتاب...
أنا أحب أسميه حاجة تانية..بس ححتفظ بيها لنفسي !