متحف الغرائب أربع بوابات للرعب اللي بيقرب منك خطوة خطوة

وأنا بقرأ متحف الغرائب كان إحساسي إن كل قصة عبارة عن غرفة مغلقة وبمجرد ما بدخلها الباب بيقفل ورايا مفيش مهرب

العمل مكون من أربع قصص مختلفة لكن حاجة واحدة بتجمعهم الرعب اللي بيبدأ بتفصيلة صغيرة ويكبر لحد ما يبتلعك

1- نموذج بيكمان

القصة دي بتبدأ بلوحات مجرد لوحات

لكن الرسام “بيكمان” مش رسام عادي هو بيشوف كائنات محدش غيره يقدر يشوفها وبيعيد رسمها بشكل يخلي اللي يشوف اللوحة يحس إن في حاجة واقفة وراه

الفكرة نفسها مرعبة لكن التنفيذ كان أقل من توقعاتي يمكن لأن القصة بتحطيك في عالم غريب بسرعة من غير ما تهيّئك

2- أحلام في منزل ساحرة

دي من أكتر القصص اللي شدتني

“نيل جريمان” شخص مش عارف يميز بين حلم ولا حقيقة

يتوه بين مشاهد مرعبة بتحصل في البيت اللي عايش فيه

كل صفحة كنت بسأل نفسي

هو بيتهيأله ولا في حاجة حقيقية بتطارده؟

الكاتب لعب على الرعب النفسي باحتراف

3- الغريب

القصة دي مختلفة تمامًا

رجل عايش في عزلة لا يعرف حد ولا حد يعرفه غارق في الكتب لدرجة إن الخيال بقى بيخبط على بابه

وفي يوم يشوف قلعة قديمة مغطاة باللبلاب يدخلها

يلقي ناس بتهرب وتصرخ وكأنهم شافوا كابوس حيّ

ولما يبص يشوف الكائن اللي سبب كل الدهشة والخوف

القصة دي حسستني بإحساس الوحدة اللي بتتحول لرعب

4- فئران المقبرة

أكتر قصة مرعبة في المجموعة

ميسون، حارس مقبرة ماشي في طريق مش نظيف… بيفتح القبور ويسرق التوابيت

بس يكتشف إنه مش الوحيد اللي بينبش

في فئران ضخمة مش الشكل اللي بنشوفه في الشارع دي مخلوقات قادرة تشيل جسد بني آدم كامل

والمواجهة بينهم كانت كابوس كامل بمعنى الكلمة

القصص عمومًا جديدة ومليانة رعب نفسي وغرائبية مش تقليدية

الأولى ما كانتش قد التوقع لكن الثلاثة اللي بعدها ممتازين في بناء التوتر

الترجمة كانت سلسة جدًا ومخدمتش الأسلوب بس… خلتك تحس إنك جوّه كل مشهد

لو بتحب الرعب اللي بيشتغل على مخك قبل أعصابك متحف الغرائب اختيار ممتاز

#حصاد_العام

#أبجد

#فنجان_قهوة_وكتاب #مسابقة_حصاد_العام_مع_أبجد_وجروب_فنجان_قهوة_وكتاب