"إيراث...رحم الطين وقوة الأساطير"

في كاتب بيبتدي مشواره الادبي بشكل عادي وبيكمل بشكل طبيعي، وفي كاتب بيحب كل فتره انه يغير من جلده تماما وده اللي عمله بالظبط الكاتب ادهم العبودي في روايته الجديده ايراث رحم الطين" الصادره عن دار سما للنشر والتوزيع"

الروايه من النوع الفانتازي او المثيولوجيا او ما يسمى بالاساطير ،بتبتدي بمشهد عن ولادة طفال ولكن مش من رحم ام او سيده كالمعتاده لا من رحم الارض في طقس قاسي جدا ، في وسط ده بيتولد ايراث اللي بعكس كل اللي حواليه بيتولدوا فخدهم ملتصق ببطنهم وبياكلوا بشكل صعب جدا عشان مشاكل في تكوين الفك هو كان انسان عادي جدا بطوله وتكوينه الجسدي وكان بالطبيعيه سيدهم

الوضع بيكمل فتره طويله لحد ما بيتولد من باطن الارض مخلوق مختلف عن الولاد وكانت "أولا" اول سيده على الارض

بنشوف مع أولا و إيراث مراحل الدهشه الاولى، من تكوينها وشكلها المختلف وبعدين محاولتها المستمره لتعليمه اللغه واول كلمه قالها "أولا" وهو بيشاور عليها ، بعد كده بنشوف الاحساس الاول في كل حاجه الدهشه الحب استكشاف حاجات كثير بنعيشها مع اولا وايراث والجزء ده تحديدا كان مفضل جدا بالنسبه لي الطبيعه البكر، هقبتس منه

"وكخائفٍ مِنْ مصيرٍ مبهمٍ، بدا مرغمًا على البكاءِ، مدفوعًا عبْر مشاعر ملتبسةٍ لا يُمكن الإحاطةُ بمنبعِها ولا جدواها، لكنَّه بكى، قبالة هذا الجلالِ بكى، ومثْله لمْ يعرف البكاءَ إلَّا في سنواتِه الأولى حيثُ يبدأ في مزاولةِ الحياةِ."

بنشوف معاهم الصراع الابدي بين الخير والشر والغيره الاولى من قومه بسبب تملكه او تبعيه اولا ليه دي لدرجه انهم نفوه من وسطهم وشعوره بالغربه الشديده بعيد عنهم وبعد كده لجوئهم ليه ورجوعه وسطهم

بنكمل الرحله مع ولاده سبعه اولاد من اولا وايراث، بعد كدة بتتولد مجموعه بنات ويبدا الطقس الولاده من الارض يختفي تماما وبدات الولاده العاديه جدا من رحم ام ولكن الامور مش هتفضل بالاستقرار ده كثير

في الجزء الثاني من الرواية بنشوف صراع الخير والشر وصراع الالهه اللي اكتشفت انها ما بقاش ليها سلطه على الارض فبدا صراع كانت نتيجته ان ايراث قرر يبعت ولاده السبعه لرحله نحو المجهول بحيث انهم يواجهوا الصراع دة ويرجعوا له او ما يرجعوش وهنا بدا الجزء الاساطير بشكل كامل

بالنسبه لي انا ك زهره مش بحب الاساطير اليونانيه ومش قارئه ليها فبالتالي الاجزاء دي كانت صعبه عليا، ما عجبنيش المزج بين الاساطير وبين قصص الانبياء تحديدا قصه سيدنا سليمان، انا ما حبتش الجزء ده خالص وبالتالي ما حبيتش باقي الروايه

كمان الروايه فيها كميه وصف مش طبيعيه في الاول كنت مبسوطه جدا باللغه والفرق والاختلاف ولكن مع الثلث الثاني من الروايه بدات احس ان الموضوع بقي فيه إاستعراض لغوي او وصف زياده في الجمل بشكل مش عاجبني، كمان زود صعوبه الرؤيه التشكيل الكثير جدا اللي كان بيخليني اقرا الجمله مره واثنين واوقات ثلاثه لمجرد ان انا افهم المعنى او افهم المقصود بالظبط من الجمله دي، كمان كثره الصراعات بين الالهه والشخصيات الكتير قوي اللي كانت في النص لغبطتني جدا في القرايه

في المجمل الروايه هتكون علامه فارقه في مشوار ادهم العبودي لانها مختلفه فعلا، وهتبقى كويسه قوي لاي حد بيحب الاساطير اليونانيه والمثيولوجيا

#قراءات_حرة

#قراءات_اغسطس

#إيراث_رحم_الطين

1/26