رواية: إيرَاث رَحمُ الطِّين

الكاتب: أدهم العبّودي

عدد الصفحات: 422 صفحة

دار النشر: سما للنشر والتوزيع

سنة النشر: 2025

بصراحة "إيراث رحم الطين" مش مجرد رواية بتقراها وتنساها بعد كده. من أول الصفحات حسيت إني غارقة جوه العالم اللي بناه أدهم العبودي عالم فيه الألم والأمل القوة والضعف النور والظل. الشخصيات مش أسماء بس كل واحد فيهم عنده عمق وتجربة بتخليك تحس بيها وكأنك عايش معاهم.

إيراث أولا.. الأبناء السبعة… كل شخصية ليها لحظاتها اللي بتخليك تتأمل في القرارات اللي بناخدها في حياتنا في التضحية في الوفاء في الغضب والخوف. أحببت الطريقة اللي الكاتب دمج بيها الأحداث الواقعية مع لمسة فانتازيا من غير ما تخلي القارئ يحس إنها بعيدة عن الحياة أو مش ملموسة.

اللغة مش سلسة بقدر إنها ممتعه فيه لحظات بتخليك توقف عند جملة معينة تعيدها اكتر من مره وتتأمل فيها ...المشاهد بين الماضي والحاضر بين الطبيعة والقوى الخارقة كلها متشابكة بطريقة تخليك متشوق تعرف إيه هي الخطوة الجاية للشخصيات.

القراءة هنا تجربة مش بس متابعة قصة. بتحس إنك جزء من الأحداث بتشاركهم مشاعرهم وبتشوف العالم من منظورات مختلفة. أدهم العبودي قدر يخلق نص غني ومعقد وفي نفس الوقت ممتع ومؤثر يخليك تحس إن الرواية دي هتفضل معاك حتى بعد ما تقفل آخر صفحة.

#مسابقات_مكتبة_وهبان

#مسابقة_ريفيوهات_إيراث