وجهة نظر و ملاحظات عن رواية عين القرش تحتوي علي حرق للأحداث
- نبدأ من اسم الرواية عين القرش غير معبر عن محتوي العمل احنا بنتكلم عن رواية جريمة نفسية و قاتل متسلسل حتي لو فرضنا ان الاسم جاي من فكرة المراقبة فكان فيه عناصر توفر اسم جذاب اكتر.
- الغلاف ركز علي عنصرين العين و القرش بمعني انه ركز علي الاسم فقط طب محتوي العمل فين
- نيجي للرواية نفسها ففكرة الرواية حلوة و فيها تفاصيل و اجزاء كتير نفسيه داخل شخصية البطل خالد .
وبالنسبة لبناء شخصية خالد الضغط اللي اتحط فيه بسبب شاديه و كلام أهل المنطقة عليها كان دافعه للقتل لكن فيه أجزاء كان لازم تتفسر لان في جزء في حياتِه بقي غامض زي سن خالد لم يتم ذكره ، مستوي تعليمه لم يتم ذكره و لما اتقال انه اختار يدرس في كلية فنون جميلة طب دخلها ازاي و كمان بعد ما تم اكتشاف انه قاتل و بعد تحريات المحققين عنه مفيش اثبات انه كمل دراسة و تم قيده في اي جامعة !
والفترة من بعد هروبه بعد حريق الورشه و العثور علي فلوس المنشار دي غامضه و بان بعد كده ان حصل تغيرات كتير في حياته و تكوين شخصيته كمان ، جزء كمان كان محتاج يتفسر في فكرة احتفاظ القاتل بتذكار الجريمة اللي اتمثل في اذن الضحيه دافع القتل الخيانه انما الاذن ليه؟ ؟ طب الضحايا الرجال ليه زرار قميص؟
- جريمة قتل حمو فتحي تم فيها تشويه الوجه و البصمات و القاء الجثة في الترعة ازاي قدرت والدته تتعرف عليه بعد تاثير التحلل و مدة الجثة في الماء كان الاوقع يتم التعرف عليه بتحليل DNA.
- نيجي لجزء عزت في جزء قدر مع كلام حامد انه يصدق انه بيتخيل وجوده ثم بنكتشف انه حقيقي و حامد اللي حطه في سكته طب ده تم ازاي كان محتاجين فلاش باك لاتفاق حامد و عزت و ازاي قدر خالد يوصله.
- نيجي لجزء غريب شوية بالنسبالي كمان في خالد فكرة عجزه الجنسي و عدم قدرته علي الاستمتاع الطبيعي حتي لو جاي من ادمان الإباحية الموجوده عنده و حبه للعنف فمفيش حاجه اتكتبت تقول حتي انه حاول يقلد اللي بيشوفه و الجزء ده الكاتب كان اقل جرأة رغم ان قلمه كان جرئ في بداية العمل و اجزاء تانيه.
نيجي لجزء النهاية اللي اتسبب في قتل خالد و قتل فكرة العمل كمان
- خالد شخص مش اجتماعي خالص و عنده نسبة شك و عارف ان سلمي علي علاقة بحامد و دخلت في علاقه معاه بالغصب ، ازاي آمن لها انه يديها سلاح و يبقي معاها رغم انه عامل خطه محكمه لتخدير حامد و جيهان و فكرة جرأة سلمي في ذبح خالد برده مش منطقية خالص حتي لو بدافع الخوف و انها تخلص منه
-فيه جزء مكتوب في المشهد ده الحبل اللي نزله خالد قبل ما تقتله سلمي كان ايه الغرض منه؟
-فكرة هروب سلمي شهرين و موتها و هي بتهرب و تتخبط في العربية غربية شوية و خصوصا مع جملة خالد خدي بالك و انتي بتعدي الطريق