#مسابقة_ريفيوهات_عزة_سلطان

#فنجان_قهوة_وكتاب

فيه كتاب لما تخلصه بتحس إنك مش عارف تكتب مراجعة عنه، ممكن تتكلم عنه مع قراء تانيين بس متعرفش تعمله مراجعة تليق بيه، ودة اللي حصل مع المجموعة القصصية "حافة رطبة" كنت محتاجة أخد وقت علشان أعرف أعبّر عن شعوري تجاهها، لأني لما باخد وقت ما بين قراءة العمل وكتابة مراجعة بحس إني هعرف أديها حقها أو هعرف أكون محايدة في التقييم، مشاعر الرواية كتير وخلت مشاعري معاها كمان متلخبطة

هتلاقي نفسك في واحدة من القصص..

سواء اللي بتتكلم عن التيه، الصراع اللي بيحصل في دماغك على أفعال خارجة منك، الأهل والتغرب عنهم، صراع شخصيتك مع المبادئ في مجتمعات غريبة عنك.

ممكن تلاقي والدك في واحدة من قصص الغربة، بيجي وقت عليه مش عارف ينزلكم البلد علشان هو متكفل بمصاريفكم ورعايتكم من ناحية الماديات، أو مش عارف ينزل يعزّي في حد من قرايبه لو اتوفى!

الغربة شعورها مش سهل، شعور إنك تسيب أهلك وكل ما تحب في مكان وتروح مكان أنت مش ضامن هيحصلك إيه فيه دة مؤلم.

هتشوف نفسك في قصة اللي بتشكل سيدة وصراعها مع اللي حواليها في معتقداتهم أو طريقة تفكيرهم ولبسهم وكل ما يتعلق بيهم.

ممكن متلاقيش نفسك، لأنك تايه، زي التيه اللي بيحصل في قصة من القصص، وعدم استوعاب الواقع والحقيقة.

عدم ذكر اسم في كل قصة هيخلي الشخصية كأنها أنت أو إنك بتقرأ عن نفسك مش عن فلانة، ودي حاجة حلوة في المجموعة القصصية.

الشخصية في كل قصة دايمًا احساسها بيكون على الحافة خالص، يعني ممكن تنهار في أي وقت، كل شخصية كانت بتمثل انهيار في قصتها... بالمعنى إنها هشة ودة يمكن علشان كدة الكاتبة اختارت إن المرأة تكون هي الشخصية المحورية في كل قصة، مش بالقصد أكيد إنها علشان أنثى تكون هشة وبتنكسر بسرعة أو بتنهار بسرعة، بس هي أكيد بتصور فئات كتير ممكن يحصل معاهم كدة.

أسلوب الكاتبة ولغة المجموعة القصصية كانوا من العوامل المميزة واللي هتحببك فيها 💖

اسم العمل: حافة رطبة

اسم الكاتبة: عزة سلطان

عن دار بيت الحكمة للثقافة - Baytelhekma

عدد الصفحات: 125 أبجد