#مهرجان_كتوبيا_في_فنجان_قهوة_وكتاب

رواية عين القرش من روايات أدب الجريمة والغموض، رواية هتحسسك إنك عايز تخلصها دلوقتي قبل بكرة.

بتبدأ أحداث الرواية بحاجة زي إنك بتجيب من نهاية الرواية وتحط في أول فصل، ودة بيدي للقارئ دفعة للقراءة أكتر في الرواية وهينجذب، أما عن أحداث الرواية فهي بتبدأ بوجود جثتين لطبيب نفسي روائي والطالبة جيهان اللي هم تعرف عليها وهنعرف إنها من كلية الطب، الاتنين مقتـ..ـولين بحرفية شديدة، حتى القاتـ..ـل مسابش وراه أثر يعرفوه منه، وبعدين هنرجع بالزمن لحياة الأبطال، وهيبقى في تراجع وتزامن كتير في الأحداث، بس مش هتتوه القارئ اللي بيركز في روايات الغموض والجريـ..ـمة .

الأحداث ماشية بسلاسة رهيبة حتى وإن كان في عودة للماضي أو ما شابه في اللعب بالأزمنة للعودة لحياة الشخصيات لمعرفة خلفياتهم.

الكاتب لاحظت جدًا إنه بيهتم حتى بأصغر التفاصيل، بس اللي استغربته.. إنه شرح طريقة تحضير سم، ومفهمتش المغزى من عرضه بالدقة والتفاصيل دي.

كان فيه كذا حاجة اعتبرتها مفاجأة في الرواية وفكرتها جديدة عليا.

شخصيات الرواية معقدة، ولكل شخصية ماضي أنيل من الشخصية التانية، بس بالنسبالي كانت الشخصية الأصعب في تفاصيلها وسردها ونشأتها وكل حاجة هي شخصية خالد، تكوين الشخصية دي وتطوراتها رهيبة بجد.

تقريبًا دي رابع تجربة ليا مع قلم الكاتب وهو حقيقي عنده أفكار مبهرة، وطريقته حلوة وجذابة ومشوقة بطريقة حلوة أوي، أنا حبيت أوي سلسلة إكس والحاجات دي وطبعًا رواية عين القرش بقت جمب أخواتها.

رواية حلوة فعلًا، فيه حاجات اتمنيت تكون مش موجودة بس هي اللي بانية الرواية أصلًا، بس واجب التنبيه على فئة العمر المناسب إن يقرأ الرواية .

....

اسم العمل: عين القرش

اسم الكاتب: أحمد محمد علي

عدد الصفحات: 252 ص

متوفرة ورقي وعلى أبجد

عن دار كتوبيا