عدد لطيف جدا جدا والله ويمكن ساهم في الشعور ده إني ناسية الأعداد الأولى اللهم إلا التفاصيل الرئيسية 😂

العدد ده صفحاته كتير وقصصه مختلفة عن أشخاص مختلفين بيجمع بينهم غرابة الأشياء اللي بتحصل معاهم واللي سببها بطريقة أو بأخرى بحثهم عن الحب.

-تبدأ القصة الأساسية بحفل زواج عصام ابن أخ أسامة (زوج سهير).. لكن منذ قرر عصام الزواج تحدث له حوادث غريبة بدون سبب أو مبرر منطقي لكنه يقرر أن يكمل في طريق الزواج..

يصلوا سالمين (إلى حد ما) للاحتفال في مركبة نيلية بالزفاف السعيد.. هنا بقى بتحصل بلاوي (حاجات اظهر حاجات اختفي 😂)

-المهم أن الأحداث تجبر كل من المحاصرين في حفل الزفاف أن يفسر الأمور حسب معتقداته.. أسامة كالعادة يبحث عن التفسير العلمي وراء الأحداث.. سهير تشعر أن هناك ما لا تسطيع تفسيره او معرفه ماهيته.. وباقي الحضور بين تفسير الحوادث بأنها بسبب جن عاشق أو النداهة أو سكان النيل.. مع فلاش باك لأحداث ما تدعم كل تفسير يخرجوا به..

-عجبتني قصة الريس خولي.. الشخصية حلوة أوي وغريبة وغامضة ولها هيبة كدة ❤️

وعجبني الجزء الأخير اللي كل واحد فيه بيتكلم عن تعريفه للحب من وجهة نظره ومن واقع خبرته وتجاربه وأكيد عجبني نقير سهير ولاشين في الآخر..

بس هايفضل سؤال مهم ف بالي من العدد اللي فات.. هو ايه اللي حصل في اليابان؟ 🙄 (على غرار هو ايه اللي حصل في جمصة؟ بصوت أحمد أمين)