✍️ ريفيو عن كتاب "قلق مستعمل – رحلة إلى دروب السكينة"

للكاتب علاء أحمد

عن دار المحرر

ملحوظة 🤐: صحيح أن الكاتب صاحبي وشهادتي فيه مجروحة.. لكن أنا في التقييم معرفش أبويا ولذلك وجب التنويه 👌👇.

وهذا أول ريفيو لن أقيمه بإيجابيات وسلبيات ولغة عربية فصحى.. ولكن سوف أترك مشاعري هي من تكتبه.

الكتاب ده مش مجرد صفحات، ده صوت بيخرج من جواك أنت شخصيًا من غير ما تتكلم، حسيت وأنا بقرأه كأني قاعد في جلسة مصارحة مع نفسي، ومع حد شايفني كويس وبيفهم اللي مش قادر أعبر عنه.

فيه فقرات بكيت فيها بصدق، مش بس عشان الكلام، لكن عشان الوجع اللي حسيته إنه بتاعي.

الكاتب شرح القلق كإنه شخص بيعيش معانا، بياكل ويشرب وينام جوانا، لدرجة إننا بنخاف نعيش من غيره، كأن الطمأنينة بقت حاجة غريبة.

الكتاب ده مش مجرد كلمات مكتوبة.. ده مراية لنفوس كتير كانت بتصارع في صمت، مش بيحكي عن القلق كمرض أو حالة نفسية وبس، لكنه بيغوص في تفاصيله الدقيقة، بيقلب المواجع بلُطف، وبيمد إيد حنونة للي محتاج حد يطبطب عليه.

من أول صفحة، حسيت إن الكاتب بيتكلم بلساني، كل كلمة كانت بتلمس حاجة جوايا، كأنها اتكتبت من جوا قلبي، حسيت إني مكشوف قدام الكتاب، كأني فاصل الجدار اللي بيني وبين الحقيقة اللي بهرب منها من زمان.

اللي شدني أكتر هو بساطة اللغة وصدق المشاعر، مفيش تنظير، مفيش تعقيد.. فيه وجع، فيه دفء، وفيه فهم حقيقي، وصفه لحالة القلق، إزاي بنخاف من كل حاجة، وإزاي بنهدم نفسنا بصمت وبنعيش دايمًا في حالة تأهب.. كله كان واقعي بشكل مرعب.

🤍 اقتباسات خلتني أقف شوية وأسكت:

📌 "هو قلَق مُستعمل، استُعمل مراراً في قصصنا وقصص غيرنا، لكننا لا نكُف عن معاملته كما لو كان اكتشافًا حديثاً. "

📌 "القلق لا يأتي بجديد.. نحن فقط ننسى."

📌 "نصبح لا نخاف القلق.. بل نخاف غيابه."

📌 "القلق ليس نبياً يطرق أبوابنا بالحق، بل ظن يتكرر، وهوس يُعاد تدويره."

📌 "الطمأنينة ليست وهما، لكنها لا تأتي وحدها.. نحتاج أن نصنعها بوعينا، بانتباهنا، بصحبة تُشبهنا."

📌 "ربما آن الأوان أن نُدرك حقيقته.. أن ننتزع منه دهشة البدايات وبريق الزيف."

📌"اللطف ينزل عند البلاء، لكن عندما تتحايل البلاء عند وقوعه، فأنك تعيشه دون اللطف".

📘 ليه تقرأ الكتاب ده؟

لأنه بيوصف اللي مش بتعرف تشرحه، وبيحضنك من غير كلام، لأنه بيساعدك تفهم نفسك أكتر، وتطبطب عليها بدل ما تفضل تهاجمها، لأنه ببساطة.. كتاب مش هينسيك وجعك، بس هيخليك تحس إنك مش فيه لوحدك.

الكتاب على تطبيق أبجد.

⭐⭐⭐⭐⭐

التقييم الشخصي: 5 نجوم.

#ريفيو_الروائي_محمد_عبد_العزيز_الشربيني