أول عمل أقرأه لدوستوفيسكي ويُقال إنه أول أعماله برضه فعلاً
على الرغم إني قريت كتاب صديقتي نهال النجار في رسايلها لدوستوفيسكي إلا إني مكنتش لسة قريت حاجة ليه هو نفسه
والفضل هنا برضه يرجع لصديقتي هبة علي السراج اللي ترجمت الرواية في ترجمة حديثة لأن لو مكنتش هي اللي ترجمتها كانت هتفضل في جدول القراءات المؤجلة مع بقية أعماله كلها إلى أن يأذن الله في علم الغيب كدة يعني هيتقروا امتى إن شاء الله :D
بس كان نفسي والله إن الرواية تكون أسعد من كدة شوية :[
على الرغم من إن دي أول قراية لدوستوفيسكي إلا إن خبرتي بالنوع ده من الأعمال الكلاسيكية كانت بتقولي إن النهاية مش هي اللي بتمناها بس لحد آخر لحظة كنت بمني نفسي إنه يكسر توقعاتي ويكون له نهاية مختلفة
كان نفسي في النهاية إنها تختار البطل ومترجعش لحبيبها القديم أو هو ميظهرش فعلاً تاني أصلاً وتكون قصة واتقفلت خلاص ع كدة
قلبي وجعني عليه أوي الحقيقة وكنت مخضوضة عليه في آخر الصفحات وبكمل قراية وأنا بنهج من خوفي وقلقي
بس برضه النهاية دي فتحت في دماغي باب لأسئلة وتحليلات كتير مش عارفة إجاباتها الفعلية اللي ممكن تكون
هل اختيارها لحبيبها القديم أول ما رجع وشافته كان نابع من حب حقيقي فعلاً ليه ولا تعود لإنها سستمت نفسها ع اختياره طول الفترة اللي فاتت وكان صعب عليها إنها تغير قرارها لصالح واحد لسة عارفاه من كام يوم وملحقتش تبني في خيالها الحياة الزوجية اللي بتتمناها وتتخيلها معاه؟
في رسالتها اللي بعتتها له تعرفه فيها إنهم حددوا ميعاد الفرح كانت بتقوله ياريت كان ينفع أحبكم انتم الاتنين وليه مكنتش انت هو أو هو كان انت؟
وفي اعتقادي ده معناه إن مشاعرها متلخبطة ومش عارفة تقرر فعلاً وممكن يكون اختيارها لحبيبها القديم نابع من التزامها معاه بوعد قطعته ع نفسها فشايفة إنها لازم توفيه، خصوصاً إنها اتفقت مع البطل من الأول إنه ميحبهاش وحكياله كل حاجة، وهو اللي أخل بالاتفاق وحبها، وهي استسلمت في لحظة يأس انها ترتبط بيه بدل الحبيب اللي سابها، بس أول ما ظهر رجعت له بناء على وعدها، وأكيد طبعاً لسة عندها مشاعر ناحيته بس أعتقد إنها ممكن تبقى محتاجة وقت كافي عشان تقدر تحدد مشاعرها الحقيقية ناحية مين فيهم؟
من حكايتها مع حبيبها الأولاني من الواضح إن مكنش فيه بينهم أي حوارات متبادلة بشكل كامل على الرغم من طول المدة اللي من المفترض إنه قضاها عندهم كمستأجر، بس هو بعت لها كتب تقراها هي وجدتها، وهي عاشت مع الكتب دي، وخرجوا مرة في وجود جدتها يتفرجوا على مسرحية، متكلموش فيها خالص غير شوية تبادل نظرات، وهي اتعلقت بيه لانها حست انه أهتم بيها بشكل خاص، ولما جه يمشي كانت عايزة تهرب معاه وتتجوزه على الرغم إنه مكنش طلب منها الجواز ولا عبر لها عن مشاعره، بس لما هي راحت له قالها إنه محتاج سنة عشان يجهز نفسه ولما يرجع بعد السنة دي لو كانت هي لسة بتحبه وهتوافق عليه هيجي يتجوزها
بس ده معناه إن العلاقة كلها قايمة على شوية نظرات وكلام كتب هو بيفضلها وهي قرتها فحبيت اللي في الكتب وبناء عليه حبت اللي إداها الكتب دي؛ فهل ده كافي إن تقوم عليه علاقة وحياة كاملة؟
في حين إنها مع البطل راوي الرواية على الرغم من قصر المدة اللي عرفوا بعض فيها (أربع ليالي) هم اتكلموا في كل حاجة وأي حاجة وحكوا حكاياتهم وحياتهم كلها لبعض وكان فيه بينهم أرضيات مشتركة كتير، وكانت قادرة تكون معاه على طبيعتها من غير ما تخاف من حاجة ولا من حكمه عليها
فأنهي فيهم هو الحب الحقيقي فعلاً؟
هل ممكن يكون البطل ده هو حبها الحقيقي اللي ضيعته بغباء تمسكها بالشيء اللي رسمته في خيالها وعدم قدرتها على التفريق بين الخيال والواقع؟
هل ممكن إنها تيجي في يوم من الأيام تندم إنها فضلت الحبيب الأول ده وسابت البطل وتتمنى لو ترجع بيها الأيام وتختاره هو؟
بيتهيألي إن دي قصة بتتكرر كل يوم مع آلاف من البشر، فيه ناس بتقدر تميز حبها الحقيقي من أول نظرة وتعرف تطلعه وتختاره من بين الآلاف، وفيه ناس ممكن تعيش عمرها كله في حيرة إنه كان ده ولا ده؟
فبجد فعلاً ممكن يكون إيه المعيار اللي الواحد يقدر يحكم من خلاله؟ هل الانجذاب العاطفي وحده كافي؟ هل اللي سبق كل النبأ؟ هل اللي يقدر يقدم التزام فوري ويعبر عن مشاعره بشكل أكبر هو الأولى؟ هل الفكرة في إننا نختار مين أولى أو لا أصلاً؟
أسئلة كتير بجد حاسة إنها ممكن تفجر نافوخي ومش عارفة ألاقيلها إجابات، ومكنتش قادرة أكتب الريفيو ده بالفصحى من كتر ما أنا حاسة إني بهذي أصلاً
وأنا بقرأ الرواية جه في دماغي الفيلم الهندي saawariya اللي كان أول ظهور لرانبير كابور وسونام كابور مع سلمان خان، على الرغم إني مشفتش الفيلم نفسه لكن شفت أغانيه وحسيت منها قصة الفيلم؛ فدورت على معلوماته ولاقيته متاخد فعلاً من رواية الليالي البيضاء
ومكنتش عارفة ليه الرواية اسمها كدة كنت فاكرة مجرد اسم عادي أو إنها ليالي بيضا عشان داق فيها طعم الحب لأول مرة فمحبش يخليها ليالي سودا يعني :D بس قريت في ريفيو ع الجود ريدز لواحدة بتقول إن السبب في الاسم إن ليالي روسيا مبتغربش فيها الشمس بشكل كامل وبتفضل السما بيضا زي وقت المغرب عندنا كدة عشان كدة هم لياليهم بيضا مش سودة
الحقيقة أنا كنت عارفة معلومة ان الدنيا مبتضلمش في روسيا دي بس مجاش في بالي خالص ربطها باسم الرواية
في النهاية أكيد هقرأ لدوستوفيسكي تاني بس محتاجة أفوق الأول شوية من اللي حاصل فيا دلوقتي ده، ومحتاجة ألاقي أجوبة للأسئلة اللي هتفرتك نافوخي دي
#الليالي_البيضاء لـ #فيودور_دوستوفيسكس
ترجمة #هبة_علي_السراج
#جولة_في_الكتب #روايات
#سارة_الليثي
*ملحوظة: امبارح كنت بتكلم مع بنت خالتي عن الأوضاع الاقتصادية والفرق بينها وبين زمان وكدة، وبقولها بقرأ رواية البطل فيها بيقول للبطلة إنه فقير وهو عنده خدامة في البيت، وحبيبها الأولاني قالها إنه مش هيقدر يتجوزها دلوقتي عشان هو فقير ومش هيقدر يصرف عليها وهو مأجر شقة عندهم، طب ما يتجوزها فيها طب يعني هي الناس دي كان إيه مفهومها عن الفقر بالظبط؟ 🤨