عارف لما تفتح باب قديم في قلبك، وتفتكر صوت كان منسي، بس أول ما تسمعه تقول "أنا عارف الصوت دا.. بس ناسي هو جاي منين"
هو دا بالظبط إحساسي أول ما دخلت عالسطور الأولى من رواية سوليفچيا…
فيه نغمة غريبة جوا الرواية... مش نغمة موسيقى، لأ، نغمة وجع مش واضح مصدره، زي ما تكون بتسمع صوت قلب حد بيتكسر بس بـأناقة، واحدة واحدة بتشوف نفسك بذكرياتك بين السطور ودي كانت من ضمن الصدمات اللي ممكن تقابلها داخل العمل، لأن الكاتبة بتحطك قدام نفسك!
نقطة من أول السطر...
"سوليفچيا" مش بس عنوان، سوليفچيا دا "كود" روحاني، فيه مفاتيح لأبواب جوانا إحنا نفسنا قافلينها من سنين.
الكاتبة بريهان أحمد ما كتبتش رواية، دي فَتحت مرآة سحرية تخليك تشوف نفسك من منظور تاني، وتعيش جوا الحكاية وأنت قاعد في مكانك.
الرواية بتمشي على خطين: خط الوجع الشخصي، وخط البحث عن التوازن الروحي…
ويا سلام على إلتقاء الخطين دول في مشهد واحد يخليك توقف وتقرأ الجملة مرتين، وتقول لنفسك "هي بتكتبني؟ ولا أنا اللي جوه الرواية؟"
الكاتبة استخدمت رموز كتير، مش بتتقال كدا وخلاص، دي محتاجة قارئ صاحي..
عارف زي لما القرآن يقول:
"سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ"
هي بالضبط عملت كده...
أفكار بتلمس السما، بس بلغة بسيطة، روحها مشبعة بالحكمة، وكأن الكلمات طالعة من واحدة سمعت وقرأت وعاشت، فسَكبت كل دا على الورق بإخلاص.
الرواية دي هي سطر من الرحلة اللي كل واحد فينا بيمشيها جوا نفسه...
فيها البنت اللي بتدوَّر على صوتها وسط الزحمة..
فيها الراجل اللي كل ما يقرب من روحه، يخاف منها، وفيها الطفل اللي جوه كل واحد فينا ولسه بيعيط في سِرّه وهو كبير.
إنك تواري فكرة داخل فكرة هو دا الإنجاز الحقيقي..
إنك تنجح تقحمني جوا عملك هو دا النجاح الحقيقي..
إنك تخليني أتعاطف مع الشخصية وأغضب منها وابقى عاوز انتقم منها هو دا النجاح بالنسبالي.
في إنتظار كل جديد منك يا دكتور، وبالتوفيق والنجاح الدائم يارب العالمين..
في النهاية
"اللهم لا تجعلنا ممن قرأوا الحياة من فوق السطور، بل من فهموا الرسالة من بين السطور، ومشوا على نورها"
#سولفيجيا.
#مصطفى_الششتاوي!