هي فين الضحية التامنة؟! الريفيو م السنة اللي فاتت هاااي عليكم 🙋🏻♀️
طبعا في جدل حاصل من كام يوم بسبب كنزي مدبولي
الأول انا لا اعرف كنزي ولا متابعاها ولا اعرف المحتوي اللي بتقدمه, بس من لما شوفت روايتها علي ابجد من قبل الضجة وانا حملتها وقلت هقراها من باب الفضول ليس إلا, وافتكرت سحبها من وسطها بتاع السنة اللي فاتت مع اني اصلا مكنتش معترضة علي سحبها من وسطها خالص قرأت الرواية في أربع ايام :.)
المفروض الرواية يكون فيها شخصيات ووصف وأحداث وحوار
_ القصة عادية والأحداث عادية ومتوقعة والنهاية متوقعة لكن دي مش المشكلة ما في كتير روايات نفس الفكرة لكن المعالجة مختلفة مثلا فكرة الغربة والسفر اتعالجت كتير مثال البلدة الاخري ل ابراهيم عبد المجيد_ دق الطبول ل محمد البساطي _ ربيع الشتات ل سراج منير مفيش واحدة شبه التانية . لكن الرواية هنا زي حلقات التركي والهندي حاجة كدة لايت بنتسلي بيها _
_مش معترضة علي الحوار بالعامية خالص لكن ع الاقل تكون عامية مقبولة لأن العامية لها اصول برضة زي الفصحي
_المفروض يكون في وصف للشخصيات مكانش في ده, حتي وصفها للأبطال مفيش غير نازلي اللي غلطت مرة قالت شقرا ومرة قالت سمرة
_ بتنط ف الأحداث بشكل مش طبيعي يعني عندها فرط حركة وتشتت انتباه وفاشلة دراسياً فجأة بقت شاطرة وفجأة دخلت كلية اعلام وجابت امتياز مع مرتبة الشرف واشتغلت ف اكبر جريدة ف مصر ولأنها شاطرة وبتعمل لوحدها الشغل اللي بيعمله الفريق كله ف اسبوع هي بتعمله ف يوم بقت بتشتغل ف اكبر قناة ف مصر وهنا عاوزة اقول كلمة باسم يوسف بس بلاش ما انا خريجة كلية الاعلام واتدربت في جرايد ومجلات وبقولك ان ده مبيحصلش كدة والله
_ مفيش منطق عندها ف الوقت يعني المسافة من القاهرة لمطروح ساعة ونص _ رئيس التحرير اتصل بيها تلاتة الفجر عشان يقولها علي انهم لقو ضحية تانية وبعت لها اللوكيشن وراحت له في بضع ثواني ده غير انها اعترضت انها تخرج مع المذيع ف شغل الساعة اتناشر لكن مكانش عندها مشكلة ف الساعة تلاتة الفجر _ اهل زين ف كندا بس بقوا ف لوس انجلوس اللي بتبعد عن القاهرة 19 ساعة _ طب ما نفكر شوية ونسأل جوجل ف المسافات بدل اللخبطة دي وخلينا منطقيين اه بس هي قالت انها بتكتب رواية خيالية مش واقعية فمالناش دعوة بالمسافات يا موههي
_ بتحشر كلام انجليش كتير في الحوارفي الرواية لية مع انه ممكن يتكتب بالعربي عادي؟!
_ قالت ان اسمها نازلي وابوها اسمه احمد لكن ف فصل تاني قالت ان اختها اسمها حلا عوض احمد السيد وف فصل القاتل قالت ان اسمها نازلي مصطفي ؟؟! يعني انت مين بالظبط؟
_ طيب ازاي ف الفصل 21 ليلي اخت زين سلمت عليها وعلي سعيد وقالت له انها اخت زين وف الفصل 22 كان حاجة تانية شوفو كدة
❞ أومأت برأسها وكأنها فقدت قدرتها على الكلام لوهلة، ثم قالت في إحراج:
- أنا ليلى القاضي… أخت زين.
قال في لباقة:
- اتشرفت بيكِ.
ثم التفت إلى نازلي التي جلست تنظر لنا في دهشة مشابهة لدهشتي. نظر لي متسائلًا:
- انت أكيد تعرف نازلي، انتم اشتغلتوا سوا. ❝
ده الفصل 21
❞ نظرت إلى زين ثم إليَّ، ثم اتسعت عيناها كأنها أدركت شيئًا لتتنحنح متسائلة بنبرة مرحة:
- ماكنتش أعرف أن انتِ وأخويا كنتوا بتشتغلوا مع بعض. انتِ بتشتغلي في الطب الشرعي؟
التفت لها زين، بينما تعلقت عيناي بها.
أخوها؟ إذن هي أخته؟ يا لقلبي الأحمق، لقد قفز لتوه من السعادة بعدما أعلن عن كرهه له منذ دقيقتين. أدركت أنها لا تزال تنتظر إجابتي، لذا أجبت على الفور:
- لا، أنا صحفية. ❝ده الفصل 22
_ قالت في حوار لها انها كتبت الرواية بصيغة تعدد الرواة أو الأصوات المتعددة لكن هوتعدد الرواة كان نازلي وزين بس طول الرواية وفصل واحد بس القاتل بس ما علينا
_ قالت ان الرواية اتراجعت لغويا واملائيا ست مرات طيب والأخطاء دي كانت اية " هززت رأسي بعدم رضا، تلك الفتاة تكذب، لكن متى؟ ❝متي ازاي يعني المفروض لماذا؟
_❞ شعرت بسكين قد غرزت في قلبي، كان يفكر في مصلحتي قبل أن يموت كعادته. أومأت برأسي وامتلأت عيني بالدموع، وقلت بنبرة مهزوزة لكن بثقة: ❝
يعني اية بنبرة مهزوزة لكن بثقة ؟
_ واحدة صحفية مش عارفة لغة الجسد يعني اية لكن عارفة الـ ALS طب ازاي
" ماما فريدة اتوفت بسبب مرض اسمه التصلب الجانبي الضموري.
- عارفاه… اسمه ALS؟ ❝
_ قالت انها مبتعترفش بورش الكتابة مستشهدة بكلام دكتور احمد خالد توفيق اللي معرفش هو صح والا غلط لكن ورش الكتابة علي الأقل اللي انا حضرتها بتركز علي حاجات أساسية زي اجادة اللغة العربية الفصحي وعلامات الترقيم حتي لو هكتب بالعامية _ انها بتركز علي بناء الشخصيات _ بتركز علي التسلسل المنطقي للأحداث _ بتركز انها تعطي معلومات صحيحة للقارئ حتي لو الرواية خيالية يعني مش هينفع نقول ان الدم لونه أزرق مش أحمر لان ده مش منطقي
ولو مش هتقدر تعمل ده في وظيفة اسمها محرر ومصحح لغوي
_ الغلاف حلو مفيش كلام بس هما لقو الجثة الأولي في شنطة سفر كبيرة مش ف برميل
_ معنديش مشكلة انك تكتبي ميكس جريمة ورمانسي بس يكون منطقي مش زي المسلسلات التركي اللي انت معجبة بيها
_ هي فين الضحية التامنة؟
