"حواديت محلية الصنع"

🔹أنا كمي شخص شرقي جداً يعني بحب الحاجات مصرية الهوية بزيادة أفلام عربي ابيض واسود ومسلسلات من أول ما دخل التليفزيون مصر، بالنسبالي بحة وبجة الي في السيدة زينب دول ديت عاطفي للغاية، بعشق العيد الكبير وطقوسه والدبح واللحمة الضاني والكوارع والممبار وما شابه وفي شم النسيم رنجة وبصل .

🔹عربية الفول دي بالنسبالي إغراء، عمري ما اتعاطفت مع الاكل الصيني ولا الياباني ولا الحاجات الغريبة دي .

🔹حتى لما بحس إني مخنوقة بحب أتمشي في شوارع مصر القديمة والحسين والغورية وباب الفتوح بحب الأجواء دي جداً وخاصة السيدة زينب في تجهيزات رمضان ومولد النبي .

🔹بعتبر أن الفانوس هو الصفيح أبو شمعة الحاجات المريبة الصيني دي مبعترفش بيها .

🔻🔻جت فترة لكتّاب كتير بدأوا يكتبوا قصص وروايات أحداثها في بلاد أجنبي وتقرا الرواية ولا القصة ولا حتى تشوف المسلسل مش إحنا ولا شبهنا ومعرفش ليه بندورة الإلهام من ثقافة تانية بدون داعي مش عايزة أقول إن معظمهم نحت من أفلام أجنبي اصلاً .

🙏🏻🙏🏻 لحد ما قرأت المجموعة القصصية "حواديت محلية الصنع" جماله في إن حواديته مصرية جداً بتمر عليك يومياً تقريباً ممكن متنتبهالهاش لكن لما تقرأ القصص تحس إنها على أد بساطتها عميقة جداً وتلمسك جداً.

🙏🏻🙏🏻الألفاظ والسرد سلس جداً من غير فزلكة ولا أفورة في المصطلحات والكلمات، تنفعل معاها كأن الشخصيات قاعدة معاك وبتحكيلك تفاصيل حياتها .

#حوادبت_محلية_الصنع

للكاتب Alaa Ahmed

السراج للنشر والتوزيع - Seraj for Publishing & Distribution

#ريفيو

#May_Saleh