نبدأ المراجعة مع الغلاف الراقي والإهداء البسيط ومباشرة ندخل على كوكبة من القصص القصيرة وكلها بتدور حول الموت ما قبله وما أثره وما بعده.
كل قصة عبارة عن حالة كاملة وممكن نقول عن المجموعة أنها عشرة مشاهد ختامية عبقرية لعشر روايات مختلفة.
طبعا السرد كان باللغة العربية الفصحى والحوار كان بالفصحى بمقدار قليل جدا جدا وفي أضيق الحدود وده معناه أن الكاتب عارف كويس القاعدة اللي بتقول إن القصص القصير مش مستحب أنه يعتمد على الحوار من الأساس وقراره باستخدام الحوار في بعض المواضع البسيطة كان من منطلق التأكيد على الفكرة وبشكل خاص انا كنت مبسوط.
ونتكلم بقى عن الأفكار والمفاهيم والمعتقدات داخل كل فكرة أو قصة وهنا ممكن نختلف شوية أو كتير أو نتفق مع الكاتب لكن الأكيد إننا هننبسط بالرحلة وطريقة العرض.
وخد بالك عشان في حركة كتابية استثنائية في نهاية القصة السابعة.
طبعا في كل مجموعة قصصية هتلاقي اختلاف وتفضيلاتك شخصية وبالنسبة ليا كانت خاتمة الرحلة مسك وعنبر يعني القصة الأخيرة هي أجمل وأحلى قصص المجموعة عندي واللي وقفت معاها كتير اوي اوي.
شكرا على الرحلة.
في النهاية المجموعة القصصية موت مع إيقاف التنفيذ واحدة من أجمل ما قرأت من المجموعات القصصية هذا العام وطبعا بنصح بيها وبرشحها للجميع ورأيي الشخصي انها مش مناسبة للأطفال أو صغار السن.
#أحمدمجدي