حبيت أخرج شوية بره قراءة كتب المذاكرة والشغل وقررت أبدأ يومي النهاردة ب ( حواديت محلية الصنع ) - للكاتب علاء أحمد

الحقيقة الحواديت من كتر دقة الوصف فيها وجعتلي قلبي حرفياً..

أنا حد مش بيكتب ريڤيوهات بشكل مدروس أوي زي ما قال الكتاب و لكن الكتاب ده حسيت إني شايفة الوقت والأحداث بشكل دقيق جداً..

لازم أشهد بطريقة الوصف، الكاتب خلاني شوفت الأحداث ، قدر هنا يطبق المبدأ اللي اتعلمناه في الكتابة اللي بيقول

(Show Don't Tell)

علاء طبقه بالظبط فعلاً.. من اول

* تعريف لابد منه ..

تصوير حقيقي لطفولة رغم وصف الفقر المادي فيها إلا إنها ثرية جدا بالأحداث..

لفت نظري تشبيه نعل أبيه أو صوت مفاتيحه بالنغمات،

وصف مشهد المدرسة و عدم سداد المصروفات ووصف مشاعره بدقه ،

وصف شعور الفرحة بعلبة الهريسة،

والحزن المختلط بفرحة العيد مع لبس الجدات للإسود وزيارة المقابر واللعب هناك ،

مشهد الهروب من المدرسة ،

و الإعتراف بإن هي دي منابع ثقافته ، والجملة الجميلة جدا ( لكن نقصان الإنسان في شخصي مكتمل ) رائعة جداً كلها واقعية وبساطة .

* عملات أبي .. حلم الطفل اللي تفوق في دراسته الإبتدائية و منتظر تحقيق الوعد من ابيه بشراء العجلة المنتظرة اللي حلم بيها كتير و دي كانت المكافأة اللي والده بيدخر لها الأموال ،

وصفه الدقيق لمرور الوقت البطئ وإنتظاره طول الليل يعدي لحد ما غلبه النوم وصحي جري علشان تحقيق حلمه و ينزل سوق الجمعه ،

شعوره بخيبة الأمل وهو بيلف على محلات العجل و بيتفرجوا ويشوفوا الأنسب سعراً ،

وفضل ينزل مستوى الحلم إلى حد الغصة .. ( اللي اتنقل ليا بالظبط )

وفجأة شعور جبر الخاطر العجيب والمفاجأة اللي حصلت في إنه يفوز بالعجلة ( كسر الزيرو ) مكافأة لتفوقه الدراسي ، العجلة اللي كانت فاخرة لدرجة إنها تفوقت حتى على حلمه في رأيى الشخصي .

عشت المشاعر كاملة بواقعية وتصورت الأحداث فعلاً قصادي .

* السبنسة ، الطالب المتردد اللي من وجهة نظري طفل طبيعي في إنه يخاف يتعلق في مؤخرة قطار حتى لو أصحابه متعودين على كده..

وصف دقيق للحالة الشعورية و الأماكن والأصوات والروائح وختمت بكسر مضاعف لحازم ...

بس ما قولتش يا أستاذ علاء حصل ايه لحازم بعد كده... واخباره ايه؟

قرأت لحد هنا ولازم اعترف ان قلبي وجعني وحسيت بالغصة من دقة الوصف كأني عشت الأحداث ،

الكتاب باللغة العربية الفصحى ولكن الأسلوب بسيط وسهل في القراءة ،

كتاب هيفصلك عن دوشة الأحداث حواليك لأن الكاتب فعلاً هيقدر تخليك تعيش مع أحداثه وحياته ،

أسلوب ال Storytelling أو الحكي عنده جميل لدرجة كبيرة و إسم الكتاب نفسه أنا ربطته مع الأحداث ( حواديت محلية الصنع ) اللي وصلني إنه بيحكي عن نفسه هو لدرجة إن حقيقي حسيت مشاعره جدا..

أنصح بقراءته بجد هيفصلك بره حياتك علشان تعيش حياة علاء أحمد و تطلع منها بإلهامات كتير بجد من وجهة نظري المتواضعة.

#حواديت_محلية_الصنع

- الكاتب علاء أحمد

#دعاء_يحيى

شكراً أستاذ علاء على الحالة الإنسانية الحقيقة اللي موجوده وسط كلماتك Alaa Ahmed