مقدمة لابد منها انا كقارئة في كُتاب بقرأ لهم بعشم، بمعني ان اسمهم علي الكتاب بالنسبة لي يعني شراء غميضي وبدون قراءة الملخص الخلفي من باب مفاجأة الذات شيرين هنائي من الكُتاب دول

صيد فيل مجنح تعتبر رواية تصنف تشويقية وجريمة وبس كده وهعمل فيكوا زي ما عملت في نفسي ومش هقول هي بتتكلم علي ايه طيب ليه انا عجبتني الرواية:

اسلوب الراوي المختلف: اولاً لما بيبقي فيه اكتر من رواي ساعات الموضوع بيقلب ملل لأن في احداث مكررة لكن لأن الكاتبة لمؤاخذة صايعة استعاضت عن ده انها زودت تفاصيل أضافية من معلومات متاحة فقط من كل شخصية مما قتل عامل الملل وخلي القصة تتبني قدامك حتة حتة. الشخصيات وداوخلها ساعدت انك ترتبط بالشخصيات فابتديت تحبهم وتمنطق افعالهم وتتعاطف معاهم مهما كان الدافع والمنطق خُلل ولذلك شابو الكاتبة ربطينا بشخصيات تجيب هلع وخلتينا نعجب بيهم ما شاء الله

ثانياً البيلد اب والحبكة معمولة بصياعة بالرغم من قصر عدد صفحات الرواية الي ساعات قد تؤدي انك تحس انك اتكروت لكن البيلد اب صلب مفروش له كويس وبالرغم من قريتي او توقعي لبعض الأحداث الي اني ابنسطت بالفرد له من خلال الأحداث

الرواية بتطرح العديد والعديد من الأسئلة الفلسفية والوجودية والأخلاقية وبتخليك تشكك في ثوابت انت عارف انها موجودة ولكنك هتتساءل هل لو مفيش حد شايفني هل هتكون الثوابت ديه موجودة فعلاً ولا انا بضحك وبمثل علي نفسي وعلي الي حواليا عشان مضطر

شابو للمؤلفة الي خلتني والرواية لسه نازلة قاعدة اهو مستنية الأستغاثة القادمة تسلم ايديكي ودمتي مبدعة

#سو_ريفيو لرواية #صيد_فيل_مجنح

5 من 5