📌فلسطينيٌّ يهرب من الأزقَّة، والمخيَّم، والاحتلال، والالتباسات؛ ليكتب رواية يردُّ بها على دان براون صاحب رواية شيفرة دافنشي.. أيّ هراء هذا؟! أيّ تفاهة متقوقعة هذه⁉️

هراء فعلا من وجهة نظر صاحبك مراد

اللى فى غيابات السجون مأسور والتهمة فلسطينى

وأنت يا نور بتكلمه فى شوية سطور 📝عايزة تكتبها عن المجدلية اللى شاغلة تفكيرك 💭

ولا أنت واخدها ذريعة تدخل بها لأماكن نفسك تكون فيها 🤔… مستوطنات صعب دخولها للغير ولازم تفتيش وسين وجيم ✍️ هيصعبوا عليك بحثك اللى متيم به

طيب هتروح ازاى وأنت مجرد لاجىء فقير 🤷‍♀️وفلسطينى الهوية كمان

تيجى فى دماغك فكرة 💡 تلبس القناع 🎭

اللى مكانش لك يد فيه

ده ربنا سبحانه اللى خلقك به هيئة أشكنازية مستحيل يتشك فيك غير كمان إجادة للعبرية بطلاقة ولا كأنك مولود فى تل أبيب

ناقصك هوية 🪪 من اللى هى وتبقى واحد منهم مليون المية..

بس معقول تطلع من جلدك علشان مجرد رواية عايز تكتبها 😏

ما الأولى تكتب عن واقعكم اللى أنتوا فيه وتحكى الظلم اللى بقالكم سنين فيه🥺

يستاهل بحثك تلبس قناع " أور شابيرا " بالأيام ..

ما هو أكل العيش يحب الخفية

وللوصول لمبتغاك كل شىء مباح

📌لكنَّني هنا لأغراض بحثيَّة روائيَّة تاريخيَّة مجدليَّة مُحدَّدة.

قادر يا " نور " تفصل بين حقيقتك وبين " أور " 🤔

تخبط وصراع وكتير حوارات هتدور بين الشخصيتين اللى هما فى الحقيقة واحد مش اتنين

عاداتك وتقاليدك ودينك هيتركنوا على جنب لحد ما تعدى الخط طيب وبعد المرور هتبقى مع أى فريق

هتفضل فى حيرة يا نور شكلك كتير لحد ما يجى اللى يفوقك و يعرفك غلطك فين بس ياترى هتكون خسرت قد ايه

رواية مختلفة عن السائد لما بنيجى نتكلم عن أرض الميعاد

شدتك فى اتجاه روائى لكن فى الحقيقة هى وصلت فكر بعض اللى عايشين هناك

صراعهم الداخلى بين أنا فلسطينى وديه أرضى لكن على أرض الواقع أنا لاجىء فى مخيم لا عارف اتحرك فى شوارعى ولا واخد راحتى حتى فى دراستى …

📌 أنا هو المسخ الذي وُلد من رحم النكبة، والأزقَّة والحيْرة والغربة، والصمت..

حبيت حوارات بطل الرواية بينه وبين نفسه حتى فى حكاياته وتبريراته لصديقه وفضفضته على الورق

هتلاقى فى الرواية معلومات من مصادر كتير عن " مريم المجدلية " وده نتيجة بحث البطل اللى على أساسه مبنية فكرة الرواية ممكن تحس أنها بتشتتك بس أنا عن نفسى حبيتها وبقى عندى فضول أعرف أكتر عنها بعد ما خلصت الرواية..

استصعبت بس الفقرات اللى كان فيها شرح للمواقع الآثارية والمعلومات الجغرافية وحسيتها كتير بزيادة..

لكن فى المجمل عمل استمتعت به وحبيت فكرته ..