أولي مراجعات عام 2024 ♥️♥️

وكذلك أولي قراءات لهذا الكاتب بالنسبة لي.. وشكله كدا لم يخيب ظني 😊

بتبدأ احداث الرواية بحدث في منتهي الاثارة والغموض، مجهول بيدخل احد المنازل ويخلص علي الاسرة الي فيه الي مكونة من اب وام وطفلين.. ولد وبنت.. وللغريب ان المقتحم دا قرر انه ميخلصش علي الطفلة رغم انه كان يقدر، ولكنه لم يتركها كما كانت.. والي هي تبقي فيكتوريا..

فالمطروح هنا من أسئلة مين المقتحم وليه عمل الفعل الشنيع دا، ليه قتل كل الاسرة ما عدا الطفلة دي بالذات؟؟ وليه بيدهن وشوش ضحاياه برشاش أسود ؟؟

حقيقي كل الاسئلة تم الاجابة عليها ف العمل لحد اخر فصل.. والكاتب تمكن من قفل كل الثغرات..

⚠️يصلح العمل لمن هم +18 لوجود مشاهد عنيفة وجنسية⚠️

من اهم جوانب العمل دا هو المتعة وانك تكون مشدود لأخر صفحة عشان تعرف مين القاتل في رحلة ملئية بالمشاكل النفسية والعقد الطفولية والكثير من الريبة والشك، والعمل نجح ف دا بدرجة امتياز

سرد الرواية كان سلس وتسلسل الاحداث كان مظبوط بحيث يقتل لحظات الملل الي ممكن تتسرب لك في بعض الأحيان القليلة..

وصف ممتاز لعالم الرواية من مكان ومشاعر...إلخ

و المشاعر الداخلية بالذات هنا جبارة

لأن بطلة الرواية (فيكتوريا) الشخصية المحورية، طبعا بتعاني من صدمات وعقد نفسية خطيرة واكيد انت عرفت ليه من النبدة الي فوق👆

ودا كان محتاج تدخل وعمق قوي في شخصيتها وفعلا تم تقديمها كشخصية غير متزنة نفسيا بشكل جميل جداا، ومربك ليك حتي انت كقارئ ودا نجاح كبير من الكاتب

رسم الشخصيات كان مظبوط بحيث كل شخصية خادت ما يكفي من رسم لتؤدي دروها في العمل بنجاح، وأشيد بالطبيب النفسي والقاتل (طبعا بعد فيكتوريا).. الاتنين دول بالذات خدوا تدرج مظبوط لحد ما وصلوا للذروة 🔥

أجواء العمل كانت سوداوية وقاسية بعض الشيء مما زاد من جمال النص، لأن بصراحة انت كقارئ محتاج تدخل في مود زي دا عشان تعرف تتصل بروح العمل

والي اتفرج علي مسلسل Sharp objects او حتي قرأ الرواية (الي بنفس الأسم) هيلاحظ تشابه أجواء وتشابه مشاهد كمان.. دا لان فيكتوريا تعرضت بطريقة ما لنفس الي تعرضتله بطلة sharp objects.. ولكن مش بنفس الشكل عشان محدش يعتقد اني بقول في اقتباس او نحت... إطلاقاً 🫢

وطبعا لم أغفل عن ذكر جودة الترجمة الي كانت موفقة وليس عليها غبار الحمدلله.. وعرفت تنقل روح النص كويس ♥️

النهاية كذلك، جت حلوة وكنت خايف لتفسد جمال العمل.. ولكن كانت موفقة واحب اقولك ان في خدع وشك كتير.. ما هو بما ان العمل يعتبر مندرج تحت فئة من فلعها.. هو اه مش بالطريقة النمطية بتاعتها ولكن مقاربة لأن في قاتل ولغز وبحث عنه

فاحب اقولك انه صعب التخمين وهتتسوح لأخر كام صفحة عشان تستوعب مين هو بجد.. ودا كان مسك الختام لعمل صالح جدا لقضاء وقت ممتع ومشوق.. وكئيب في بعض الأوقات..

ملحوظة حبيت اقولها خارج المراجعة غلاف الترجمة حلو ولكن الغلاف الاصلي احلي بصراحة♥️