⚠️ لا يوجد تقييم لعدم إكمالي للعمل ⚠️
الحقيقة دي كانت اول تجربة ليا مع الاستاذ اشرف العشماوي و طبعا مش هقول هتبقي الاخيرة برغم مأساتي مع العمل دا لأن هذا الرجل قامة في عالم الادب و بالطبع هقرأ له اعمال تاني و متاكد انها هتعجني.. لكن نرجع لنقطة الجمعية السرية للمواطنين .. للاسف انا معرفتش اكمل العمل دا توقفت عند ٦٠٪ و كان لسه فاضل حوالي ١٣٠ ص (( علي أبجد)) ولم أستطيع 😑
طب ايه هتفضل تقول العمل معجبكش كدا بدون اسباب ولا ايه؟؟ 🤔
لا طبعا عمر دا ما كان أسلوبي في إبداء رأيي 👌♥️
نبذة مختصرة عن العمل او بدايته بمعني أصح، عبارة عن عملية سرقة للوحة زهرة الخشخاش من احد المتاحف علي يد بطل العمل معتوق الرفاعي، عن طريق سرقة الأصلية و وضع اخري مكانها مقلدة بيد البطل ذاته و دا لأنه موهوب بالرسم و بقوة كمان.. و بعدها بيحصل زي خلافات بينه و بين شريكه في الفلوس و هكذا و بيخلع شريكه الي هو إسماعيل من غير ما ياخد معتوق حقه في العملية لأجل حُجة ما!
إنما العمل في المجمل بيناقش فترة الفساد في البلد و عدم وجود وظائف للشباب و طبعا عن حياة المهمشين الصعبة و المميتة في بعض الأحيان و ازاي الانسان ممكن يعمل اي شيء لو حس ان وحش الفقر بدأ يضغط بفكه عليه..
مشاكلي الشخصية من وجة نظري في العمل
اولا ارتفاع سقف توقعاتي للغاية نتيجة لما سمتعه عن العمل من كلام عظيم، و طبعا كل شخص عجبه العمل فوق فوق راسي هي فقط أراء و اختلاف أذواق.. مما جعلني متحمس لتجربة تختلف عن دي بكتيييير 😓
ثانيا .. وصولي لحد ٤٠٪ من العمل تقريبا ولم أري الحدث الرئيسي للعمل او بالأدق الدخول في لُب الموضوع، كل دا كان مجرد فرش او تمهيد تخطي تلت الرواية !
ثالثا سرد ممل و في حشو كتير.. اللغة قوية مفيش كلام بس بصراحة انا حسيت بملل من رتم السرد و عدم وجود محرك قوي للأحداث ( إلا نادرا )، يمكن اسلوب السرد يعجب ناس كتير ولكنه لم يعجبني إطلاقاً
من المميزات او الحاجات الحلوة الي شفتها ( يجب مراعاة اني بحكم لحد ٦٠٪ فقط من العمل ) كانت تكمن في وصول مشاعر معتوق الرفاعي بقوة و اتقان اذا كانت حزن او حسرة، فرح او حتي جنون..
أتمني اكون وضحت وجهة نظري في عدم اعجابي بالعمل عادي جدا لو العيوب حضرتك شايفها مميزات انت قارئ و انا قارئ ولكل منا ذوقه الخاص و استاذ اشرف العشماوي كاتب كبير و طبعا انا مش محتاج اقول كدا اصلا
و باذن الله واثق من تجربة افضل في أحد اعماله السابقة ♥️♥️