● دَه مش الريڤيو، ده مجرد رأي.

الكَلام الكتير عن الرواية، وإنّها صعبة خلاني أقرر أدي الرواية فُرصة.

وبعد ما خلصت الفصل الأول، وعلى الرغم إن فيه حد نزل بوست قدرت أستعين بيه كقاموس عشان أقدر أفهم، فـ ده رأيي:

هي القصة ممكن تكون حلوة فعلًا، وتشدك تكملها، بس للأسف على الأغلب مش هتكمل لأنك مش حاسس..

وأنا هنا بقول مش حاسس مش "مش فاهم" لأن رغم صعوبة اللغة، واحدة واحدة هتفهم حتى لو قرأت على مهلك.

لكن النقطة.. أنتَ مش حاسس العمل، اللهجة مخلياك مش قادر تحدد نوع السرد، أو جماله ودي حاجة مهمة -بالنسبة لي على الاقل- عشان أحسّه، وأعيشه..

فللأسف حتى لو القصة حلوة، فهي ضاعت حلاوتها بسبب اللغة اللي مكتوبة بيها :))

خُضت مناقشة صغيرة مع شخصين، وكان عندنا أسئلة كتير أوي، مِن أهمها ليه الكَاتب يعرض بالطريقة دي؟

وإن "فكرة وجود اللغة مش حلوة، وفزلكة، عشان مفيش منطق يخليه يحط لغة زي دي في الرواية.."

ده رأي.

كان ردي: "مقدرش أقول فزلكة من غير ما نعرف الكاتب، كاتب بيها ليه..؟ لكن اللي أقدر اقوله إن حرام قصة حلوة تضيع بسبب لغة مش ناس كتير هتفهمها.."

قريت برضه ان ده تاني عمل ليه يستخدم فيها نفس اللغة، وأنه برضه استخدمها في اللي فات بس الفرق انه كان حاطط هوامش كتير عشان الناس تفهم. لكن النقاد انتقدوا وقللو منها..

فالمرة دي محطش هوامش لكن شرح جوه الرواية، ومع ذلك حاسه كأنه معملش حاجة.. مازلت مش حاسه بحاجة..

فـ "ليه؟"

لو نفس القصة اتكتبت باللغة الفصحى الجميلة بمفرداتها حتى ببعض الفزلكة زي ما نَاس بتقول عشان الكاتب يبين مهاراته..

والله كانت هتبقى أجمل بكتير وهتعجب ناس كتير، خصوصا انها بتحكي عن تاريخ الطوارق اللي نصنا منعرفش عنهم حاجة!

لكن ليه أحتاج مرجع أو قاموس وانا بقرأ!

سَبب مِن أسباب حبي للقراءة هي المتعة، فـ إيه المتعة وأنا مش فاهمه ولا حاسه المكتوب!

" أنا فعلا جيت اقرأ شوية وأشوف قلبت بعيني كده لقيت فعلا ايه ده يعني افهم ايه دلوقتي فلا هو بصراحة يعني كده بيبين أن هو عنده ثقافه بده اوي وكده وبيتمنظر فده هيؤدي لنتائج مش كويسه في رأيي انا"

-ده رأي شخص غيري.

فـ لو فكرنا فعلًا أعتقد اه، حتى لو هو مش قصده دَه، على الاقل ده اللي ظهر لينا من طريقة عرضه فعلًا..

- سُلحفاةُ القراءة 🐢📚