#قراءات_٢٠٢٣

كتاب البعض يريدها ساخنة للكاتبة سالي نصار.

من إصدار إبهار للنشر و التوزيع.

رحلة جديدة و المرة دي مع كتاب من نوعية كتب التنمية البشرية و العلاقات و الحقيقة إني مقلة جدًا في قراءة النوعية دي من الأعمال ، و ده لأني دايما بحس فيها بتكرار المحتوى و خيالية بعض التصورات و الحلول المطروحة لحل المشكلات … لكن ده لا يمنع إني اجرب من وقت للتاني و يقع في إيدي كتب مشجعة جدًا و محتواها حقيقي مختلف.

و ده اللي لقيته في هذا الكتاب ، رغم عنوانه الغريب و اللي كان مُقلق بالنسبالي و ما قدرتش افهم منه مدي ارتباطه بالمحتوى و قد ايه هو مناسب جدًا غير بعد قراءة العمل.

ببساطة هو كتاب عن العلاقات و تحديدًا من بداية الارتباط و اختيار شريك الحياة ، فالخطوبة ، فالزواج … كل دي خطوات مهمة جدًا في حياتنا و طبيعي بنتعرض فيها لمشاكل مختلفة منها اللي بتكون بسبب طبيعة الأشخاص و بيئتهم و تربيتهم و دي نقدر نميزها من بدري و نتفادي الدخول في تجارب تدمر حياتنا و مستقبلنا ، و منها مشاكل بسبب جهلنا و عدم معرفتنا و دي طبيعي بتحصل مع أي ارتباط يمكن بتكون سوء فهم ، عادات و معتقدات متوارثة ، أفكار من تجارب ناس حوالينا ، تدخل البعض في حياتنا ، نقص خبرة ، وسوسة شيطان … كل ده و اكتر بتناقشه الكاتبة بطريقة بسيطة و جذابة جدًا بنبدأ الحكاية من البداية مع آدم و جميلة من الإعجاب و حتى زواج ناجح عاش لسنين و سنين ، بنعرض المشكلة و نحللها من وجهات النظر المختلفة ، و بنوصل للحل بأسلم و أبسط الطرق.

استخدمت الكاتبة اللغة العامية و طوعتها بأسلوب راقي يشد القارئ و يوصله الفكرة بكل سلاسة ، اختيار العناوين كمان و ترتيبها على لطفه و خفة دمه كان كمان منطقي و مظبوط و خلى عرض الأفكار متدرج بشكل صحيح ، ساعد جدا في اندماجي مع الكتاب ، و اللي مع نهايته حسيت بإني حققت الاستفادة الكاملة من الكتاب و قدر فعلا هدفه يوصلني.

كتاب لطيف و مفيد جدًا جدًا ، سلس ، مُركز ، بعيد عن التكرار و الملل ، أنصح به كل محبي القراءة عن العلاقات و أكيد المقبلين على الارتباط و الزواج و المتزوجين حتى من سنين.

#قراءات_وترشيحات #كتب_في_كتب

#روايات_عربية #روايات_مترجمه

#أبجد

#البعض_يريدها_ساخنة