لما بتبدأ في قراءة أول عدد من سلسلة ، بتكون في ترقب ، هل هتكمل باقي أعدادها ؟ هل هتفضل السلسلة تشدك ؟ طب ايه اللي هيضيفه الكاتب في كل عدد ؟سلسلة واخدة شكل أدب الرحلات إلى حد ما، طب هل هنفضل نتابع رحلات الكاتبة بنفس الاشخاص و شكل السرد ، دا مش هيكون ممل ؟
الاسئلة دي جاوب عليها بالنسبالي الكتاب الثاني رسائل البحر من سلسلة عن العشق والسفر
الكاتبة تعمقت أكثر في التاريخ في العدد الثاني ، عمق أثقل الكتاب جدا عن العدد الاول ، شدني جدا وخلاني اشوف السلسلة بنظرة مختلفة ، خلي الكتاب أهمية ومرجع تاريخي اقدر ارجعله وأستعيد القصص المذكورة ، مرجع مش هحتاج معاه اعمل بحث او حتي ادرو علي صور او روايات مختلفة لقصة موجودة ، من دقة البحث اللي قامت به الكاتبة
عرفت اني قدام كاتبة مهتمة تجرنا لمعرفة التاريخ حتي وإحنا بنتسلي وبنستمتع معاها بأجواء الرحلة
اهتمامها دا ظهر بإنها وازنت بين الجزء التاريخي في الكتاب و الحكايات اللطيفة بين الاسرة ، فبين كل قصة تاريخية دسمه هتلاقي حكاية لطيفة او موقف طريف مع الزوج و الاولاد او موقف ظريف حصلهم
الكاتبة عندها عين ثاقبة بتشوف بيها ماوراء الحدث ، اي لقطة عينها بتقع عليها بتجيب تاريخها وقصتها كاملة واي روايات مختلفة اتحكت عليها ، مش مجرد كاميرا بتصورلنا المكان والحدث ، بتفرجنا معاها بٱهتمامتها هي وروحها .
بنشوف معاها بعين الباحثة التاريخية بالبحث التاريخي المكثف للاماكن اللي زارتها
بعين المهندسة المعمارية المحبة للفنون بالوصف الدقيق للعمارة واي نوع فن قابلها
بعين المحبة للمطبخ وهي بتعرفنا تاريخ الاكلات والروايات المختلفة عليها
بمنظور الزوجة المحبة و الام ومرونتها في التعامل مع اختلافات الاطفال و اهتمامتهم
اتشديت للكتاب اكتر عشان زارت فيه الكاتبة جزر وانا من محبين البحر ، سردتلنا ٤ رسائل من الجزر اللي زارتها ، انا اعجبت بشدة بالرسالة الاولي علي الرغم من ثقلها في الجزء التاريخي لكن كانت مشوقة ودسمة وانبهرت جدا و اتأثرت بأغلب القصص والاحداث التاريخية الشيقة فيها
كتاب عن العشق والسفر رسائل البحر كتاب بالنسبالي شامل مش مهم تصنيفه مش ضرورى اصلا المهم الاستمتاع والاستفادة ، كتاب قيم بذل فيه مجهود كبير واضح ، كتاب مسلي ، قيم جدا ، مش هتحب تخلصه
كتاب بيوعدني إني هستمر في حب السلسلة وهنتظر بلهفة باقي الأعداد