🔖 مبدأيا أن لما قررت افتح العمل ده كان على أساس أنها رواية لكن اكتشفت أن الطبعة ديه مجمعة تحت اسم " قنديل أم هاشم " + مجموعة من المقالات والقصص القصيرة 🗒️اللى الكاتب كتبهم فى اعوام ومجلات وجرائد 📰 مختلفة لكن النصيب الأكبر فى عدد الصفحات كان لقصة " قنديل أم هاشم " واللى بتحكى عن " إسماعيل " ابن الحاج رجب اللى كان كل أمله أنه يعلمه تعليم عالى ومايبقاش شاب عادى حتى لو طلب الأمر يعيشوا على الأرض

وده ما يمنعش أنه اتربى على الدين والأصول ما هو من جاور السيدة لازم ينوبه جانب

بس أى جانب ياترى ( الإيمانى ولا الخرافى )

فى حى السيدة هتلاقى العجب … وحتى لو متعلم مضطر تساير أهله ، ناس طيبة ومسلمة وعنده أمل فى ربنا ثم بركة السيدة " قنديل أم هاشم " اللى زيته من وجهة نظرهم فيه الشفى والخير … خرافات توارثوها وسلموا بها ومهما اتكتبلهم من أدوية 💊 لا يمكن تمنعهم عن تخيلاتهم …

ولما سافر 🧳 " اسماعيل " وجتله منحة يتعلم الطب فى بلاد برا … اتفاجأ وعمل مقارنة وشتان الفرق

هل هيرجع بعلمه ويشفى أهله وأهل السيدة بعلمه وطبه ولا ببركة زيت السيدة 🤷‍♀️

📌كيف يستطيع أن يعيش بينهم؟ وكيف يجد راحته في هذه الدار؟

📌هل يعود إلى أوربا ليعيش وسط أناس يفهمون الحياة؟

حبيت القصة جدااا وحبيت بساطة أهل السيدة

و عجبتنى النهاية واللى وراها وديه كانت أول حدوتة فى المجموعة

يليها ٥ قصص اخرى كل واحدة ليها طبع مختلف وحكمة من ورا السطور مش صريحة مذكورة لكن من المضمون هتعرف ايه المطلوب حبيت شخصيات أغلبهم وبساطة تعبيراتهم

وحسيت أنى بتفرج فى كل قصة على فيلم أبيض وأسود بشكل الطربوش والعمة وبدل الأفندية رايحة جاية والحارات بضيقها وريحتها وشبابيك بيوتها 💙

أول عمل اقراه للكاتب و هحب اكرر التجربة من تانى مع رواية او قصة أيا كانت

📌وديه اسامى القصص اللى كانت فى المجموعة

🖇️ قنديل أم هاشم ( من ١٢ فصل صغيرين )

🖇️السلحفاة تطير

🖇️كنا ثلاثة أيتام

🖇️كن…. كان

🖇️ القديس لا يحار

🖇️ بينى وبينك